އިބްރާހިމް ނާސިރު އިންޓަނޭޝަނަލް އެއާޕޯޓް ހިންގާ ޖީއެމްއާރު ކުންފުނި ރާއްޖެ އިން ބޭރުކޮށްލުމަށް ފަހު ބޯޑާ ކޮންޓްރޯލްގެ މައްސަލާގައި ވެސް ތެދުވާނެ ކަމަށް ޖީއެމްއާރާ ދެކޮޅަށް މަސައްކަތްކުރަމުން އަންނަ ގައުމީ އިއްތިހާދުން މިއަދު ބުނެފި އެވެ.
އިއްތިހާދުން ޓްރޭޑާސް ހޮޓެލްގައި ބޭއްވި ނިއުސް ކޮންފަރެންސްގައި އެ ހަރަކާތުގެ އުޅުއްވާ ޓޫރިޒަމް މިނިސްޓްރީގެ ސްޓޭޓް މިނިސްޓަރު އަހުމަދު ޝަމީމް ވިދާޅުވީ 23 ޑިސެމްބަރުގައި ވެސް ނުކުންނަން ޖެހުނީ ގައުމީ ފެންވަރުގައި ނުކުމެ ކުރަންޖެހޭ ކަންތައްތަކެއް އެބަހުރި ކަމަށް ފެނިގެން ކަމަށާއި ގައުމުގެ އިސްތިގުލާލަށް ހުރަސް އެޅޭ އަދި ކޮރަޕްޝަނުގެ ބޮޑެތި މައްސަލަތަކާ ދެކޮޅަށް އެ އިއްތިހާދުން އަބަދު ވެސް މަސައްކަތްކުރާނެ ކަމަށެވެ.
"އަޅުގަނޑުމެން ހިންގާ ހަރަކާތްތަކަށް އެކި ނަން ބަދަލުވަމުން ވަމުން މި ދަނީ. 23 ޑިސެމްބަރު އިއްތިހާދާ އެކި ގޮތް ގޮތަށް. ރައްޔިތުންގެ ގައުމީ ހަރަކާތުގެ ގޮތުގައި ނުކުންނަންޖެހުނީ ވެސް، އަޅުގަނޑުމެންނަށް އެބަ ފެނޭ ރާއްޖޭގެ ގައުމީ ފެންވަރުގައި ބަޔަކު ނުކުމެ ކުރަންހުރި ބައިވަރު މަސައްކަތްތަކެއް އެބަހުރި ތަން." ޝަމީމް ވިދާޅުވި އެވެ.
އަދާލަތު ޕާޓީގެ ރައީސް ޝައިހް އިމްރާން އަބްދުﷲ ވެސް ބައިވެރި ވަޑައިގެންނެވި މި ނިއުސް ކޮންފަރެންސްގައި ޝަމީމް ވިދާޅުވީ އިންޑިއާގެ ޖީއެމްއާރު ބޭރުކުރުމަށް ނުކުތީ އެއީ މި ވަގުތަށް އެންމެ މުހިންމު ކަމެއްގެ ގޮތުގައި ދެކޭތީ ކަމަށާއި ދިވެހި ރައްޔިތުންނަށް ބަލައި ނުގަނެވޭ ފަދަ ކޮންމެ ކަމަކާ ދެކޮޅަށް އެ އިއްތިހާދުން ނުކުންނާނެ ކަމަށެވެ.
"ބޯޑާ ކޮންޓްރޯލަކީ ވެސް ބަލަންޖެހޭ ކަމެއް. އަޅުގަނޑުމެން ފަހަތަކަށް ނުޖެހޭނަން. އެއީ ކިހިނެއް ވެގެން އުޅޭ ކަމެއްތޯ، އެ ކަމުގެ ހަގީގަތް ރައްޔިތުންނަށް އިރާދަކުރެއްވިއްޔާ ހާމަކޮށްދޭނަން،" އޭނާ ވިދާޅުވި އެވެ.
ޝަމީމް ވިދާޅުވީ ޖީއެމްއާރާއި ބޯޑާ ކޮންޓްރޯލްގެ މައްސަލައެކޭ އެއްގޮތަށް ރައްޔިތުން މަޖިލީހުން ހިންގާ ގާނޫނާ ހިލާފު އަމަލުތަކާ ދެކޮޅަށް ވެސް އިއްތިހާދުން ތެދުވާންޖެހޭ ކަމަށެވެ.
"މިހާރު އަޅުގަނޑުމެން އެބަޖެހޭ ރައްޔިތުން މަޖިލީސް އެއީ ރައްޔިތުންގެ މަޖިލީހެއްތޯ ބަލަން ވެސް. އެކަން ވެސް މި ތިބީ ކުރާ ގޮތަށޭ އަޅުގަނޑުމެންނާ އެކު ތިބޭފުޅުން ބައިވެރިވާށޭ. އަޅުގަނޑުމެން ފަހަތަކަށް ނުޖެހޭނަމޭ. ރައްޔިތުން މަޖިލީހުގައި އެބަ ހިނގާ އިންސާނުން ބުއްދި ގަބޫލުނުކުރެވޭ ދަރަޖައިގެ ކަންތައްތައް،" ޝަމީމް ވިދާޅުވި އެވެ.
އޭނާ ވިދާޅުވީ "މުޅި ގައުމު އޮތީ ތިމަންނާމެންގެ ދަށުވެފަޔޭ" ބައެއް މެންބަރުންނަށް ހީފުޅުވާ ކަމަށާއި "ބޭނުން އެއްޗެއް ހެދިދާނެޔޭ" އެ ބޭފުޅުން ހީކުރައްވާ ކަމަށެވެ. ނަމަވެސް އެކަމާ ވެސް އިހުތިޖާޖުކުރާނެ ކަމަށް އޭނާ ވިދާޅުވި އެވެ.
ބޯޑާ ކޮންޓްރޯލް ސިސްޓަމް ގާއިމުކުރުމުގެ މަސައްކަތް ނެކްސް ބިޒްއާ ހަވާލުކޮށްފައިވާ އިރު އެ ކަމުގައި ކޮރަޕްޝަންގެ އަމަލުތަކެއް އުޅޭ ކަމަށް ތުހުމަތުކޮށް އެންޓި ކޮރަޕްޝަން ކޮމިޝަން (އޭސީސީ) އާއި ރައްޔިތުން މަޖިލީހުގެ މާލިއްޔަތު ކޮމިޓީން ދަނީ އެ މައްސަލަ ބަލަމުންނެވެ. ބޯޑާ ކޮންޓްރޯލް ސިސްޓަމްގެ މައްސަލާގައި ގައުމީ އިއްތިހާދުން މާ ބޮޑު މަސައްކަތްތަކެއް ނުކުރާތީ ބައެއް ފަރާތްތަކުން ދަނީ ފާޑުކިޔަމުންނެވެ. ނެކްސް ބިޒްއާ ބޯޑާ ކޮންޓްރޯލް ސިސްޓަމް ހަވާލުކޮށްފައިވާ މައްސަލާގައި އަޑު އުފުލާނެ ކަމަށް ގައުމީ އިއްތިހާދުގެ ހަރަކާތްތަކުގައި ބައިވެރިވަމުން އަންނަ ޕީޕީއެމުން ވަރަށް ފަހުން ވަނި އިއުލާނުކޮށްފަ އެވެ.