އަދާލަތު ޕާޓީގެ ރައީސް އައްޝައިޚް އިމްރާން އަބުދުﷲ ހައްޔަރުކޮށް، ޖަލަށްލާފައިވަނީ އަސްލެއް ނެތް ދައުވާއެއްގެ މައްޗަށް ބިނާކޮށްކަމަށް ކުރީގެ ރައީސް އަލްއުސްތާޒު މައުމޫން އަބުދުލްގައްޔޫމް ވިދާޅުވެއްޖެއެވެ.
ރައީސް މައުމޫން މިހެން ވިދާޅުވީ 2015 ވަނަ އަހަރު ރާއްޖޭގައި ބޭއްވުނު މޭޑޭގެ ބިޔަ އެއްވުމަށްފަހު އަދާލަތު ޕާޓީގެ ރައީސް އައްޝައިޚް އިމްރާން އަބުދުﷲ ހައްޔަރުކޮށް އެމަނިކުފާނުގެ މައްޗަށް ދައުވާ އުފުލާ 12 އަހަރަށް ޖަލަށްލީތާ 1000 ދުވަސް ފާއިތުވެފައިވާތީ އެކަމާއި ކަންބޮޑުވުން ފާޅު ކުރައްވާ ކުރެއްވި ޓްވީޓެއްގައެވެ.
މައުމޫންގެ ޓްވީޓްގައި ވިދާޅުވެފައިވަނީ އަދާލަތު ޕާޓީގެ ރައީސް އައްޝައިޚް އިމްރާން އަބުދުﷲ އަސްލެއް ނެތް ދައުވާއެއްގެ މައްޗަށް ބިނާކޮށްކަމަށް ޖަލަށްލާފައިވާތާ 1000 ދުވަސް ހަމަވެފައިވާކަމަށެވެ. އަދި ނާއިންސާފާއި ބޭއިންސާފު އަބަދު ދެމި ނޯންނާނެކަމަށްވެސް ވިދާޅުވެ ރައީސް މައުމޫން ވަނީ މިހާރު ފުދިއްޖެކަމަށް ވިދާޅުވެފައެވެ.
މި ޓްވީޓްގައި ރައީސް މައުމޫން ވަނީ ޝައިޚް އިމްރާން އަބުދުﷲ ވަގުތުން މިނިވަންކުރުމަށްވެސް ގޮވާލާފައެވެ.
މިވަގުތު ސިޔާސީ މައިދާނުން ފެންނަންހުރި އެންމެ ހިތްވަރު ގަދަ އެއް ލީޑަރުގެ ގޮތުގައި ގިނަ ބަޔަކު ސިފަ ކުރާ އަދާލަތު ޕާޓީގެ ރައީސް އައްޝައިޚް އިމްރާން އަބުދުﷲ ޖަލަށްލެވުނުތާ 1000 ދުވަސް ހަމަވާނީ މާދަމާއެވެ.
ޝައިޚް އިމްރާން ޖަލުގައި 1000 ދުވަސް ހޭދަކުރެއްވުން ފާހަގަކުރުމަށް ގުޅިފައިވާ ސިޔާސީ ޕާޓީތަކުން މާދަމާ ރޭ ބޮޑު ޖަލްސާއެއް ބޭއްވުމަށް ނިންމާފައިވާއިރު، އިއްޔެ އެމްޑީޕީގެ ހަރުގެ ކުރިމަތީވެސް ހަރަކާތްތަކެއް ވަނީ ހިންގާފައެވެ.
ޝައިޚް އިމްރާން އަބުދުﷲ ހައްޔަރުކޮށް 12 އަހަރުގެ ދިގު މުއްދަތުގެ ހުކުމެއް އިއްވީ އެމަނިކުފާނު ދެއްކެވިކަމަށް ބުނާ ވާހަކަތަކާއި ގުޅިގެންކަން ފާހަގަކުރައްވާ ގިނަ ބަޔަކު ދަނީ އެއީ ބޭއިންސާފު ޝަރީއަތެއްކަމަށް ބުނަމުންނެވެ.
އިމްރާން ޖަލުގައި ހޭދަކުރެއްވި މުއްދަތުގައި ތިން ފަހަރެއްގެ މަތިން ގޭ ބަންދަށް ބަދަލުކޮށްފައިވާއިރު، ޖަލުގައި އެމަނިކުފާނު ވަނީ ގިނަ ހައްގުތަކަކުން މަހުރޫމްކޮށް ބޮޑެތި ކުށްވެރިންނާއިއެކުވެސް ގިނަ ދުވަސްތަކެއް ވަންދެން ބަންދުކޮށްފައި ބަހައްޓާފައެވެ.