އަހުމަދު ޒާހިރު (ހިރިގާ)
މުއްސަނދިން ޗުއްޓީ ހޭދަ ކުރުމަށް ހާއްސަކޮށްގެން ރާއްޖޭގައި މިހާތަނަށް ހަދައިފައިވާ އެންމެ އަގު ބޮޑު ރިސޯޓު، ވަން އެންޑް އޮންލީ ރީތި ރަށް، ރައީސުލްޖުމުހޫރިއްޔާ އަލްއުސްތާޒު މައުމޫނު އަބްދުލްގައްޔޫމު ރޭ ރަސްމީކޮށް ހުޅުއްވައިދެއްވައިފި އެވެ.
ޕްރައިވެޓް 40 ސުވިމިން ޕޫލާއި 130 ވިލާގެ މައްޗަށް އެކުލެވޭ 178 މިލިއަން ޑޮލަރުގެ ރިސޯޓު ހުޅުވައި ދެއްވަމުން ރައީސް މައުމޫނު ވިދާޅުވީ ވަން އެންޑް އޮންލީ ރީތި ރަށް ބައިނަލް އަގުވާމީ ފެންވަރަށް ތަަރައްގީކޮށް ހުޅުވިގެން ދިއުމުން ދައްކައިދެނީ ސުނާމީގެ ހާދިސާ އަށް ފަހު ދިވެހި ޓޫރިޒަމްގެ ސިނާއަތު އަލުން ދިރުވުމަށް ކުރެވެމުންދާ މަސައްކަތުގެ ހެއްކެއް ކަމަށެވެ.
"ރީތި ރަށް ހުޅުވުމުގެ ސަބަބުން ދިވެހިރާއްޖެ އަކީ ޓޫރިޒަމްގައި، ދުނިޔޭގައި ފެންވަރުގައި އެންމެ ކުރީ ސަފުގައި އަދިވެސް ގުނާލެވޭ ގައުމެއްކަން ހާމަވެގެން ދާނެ،" ރައީސް މައުމޫނު ވިދާޅުވި އެވެ.
ރީތި ރަށުގެ ކުރީގެ ސައިޒަށް ވުރެ ފަސް ގުނަ އިތުރަށް ހިއްކައި، ބޯވައެއްގެ ސިފައިގައިވާ ރަށުގައި ހުރިހާ ވިލައެއް ވެސް ހުންނަނީ ގޮނޑުދޮށަށް ނޫނީ އުދަރެހަށް ދިގުކޮށެވެ. މޫދުގައި 32 ވިލާ ހުރެ އެވެ. އެނޫން ހުރިހާ ތަނެއް ވެސް ހުންނަނީ ގޮނޑުދޮށުގަ އެވެ. އެއް ވިލާ އިން އަނެއް ވިލައާ ދޭތެރޭ މަދުވެގެން 20- 30 މީޓަރުގެ ދުރުމިން ހުރެ އެވެ. ރިސޯޓުގެ 130 ވިލާގެ ތެރެއިން، ލާވާ ސްޓޯނުން ކަނޑާ ނަގާފައިވާ 40 ސުވިމިން ޕޫލާ އެކު ވާ ވިލާތަކުގެ ތެރެއިން 37 ތަނަކީ ޕްރައިވެޓް ތަންތަނެވެ.
ކަޒުނާ އިންޓަނޭޝަނަލްގެ ވަން އެންޑް އޮންލީން ހިންގާ ރިސޯޓުގައި ރާއްޖެ އެންމެ މަޝްހޫރު ރިސޯޓުތަކާ އަޅާ ބަލާ އިރު ވެސް ވަރަށް ތަފާތު ފެންވަރުގައި ހަދާފައިވާ ތަންތަން ހިމެނެ އެވެ. އޭގެ ތެރޭގައި ވިލާތަކުގެ އިތުރަށް، ވަށައިގެން ބިއްލޫރި ޖަހައި، އެތެރެ ފެންނަ ގޮތަށް ހަދާފައިވާ ބަދިގެ އާއި ރަށާ ގުޅުވައިގެން މޫދު ތެރޭގައި ހަދާފައިވާ މުއްސަނދި ކުރެހުންތަކުން ކަނޑާނަގާފައިވާ ރެސްޓޯރެންޓް ފާހަގަ ކުރެވެ އެވެ.
ރަށުގެ މެދު ތެރޭގައި ވަނީ އެއް ފަރާތުން އަނެއް ފަރާތަށް އޮއި ދެމޭ ގޮތަށް ކޯރެއް ކަނޑާފަ އެވެ.
ރީތި ރަށަކީ، ރީތި ރަށް ޕްރައިވެޓް ލިމިޓެޑުގެ އިންވެސްޓްމަންޓެކެވެ. އެ ކުންފުނީގެ 60 ޕަސެންޓް ހިއްސާ ކޮންޓްރޯލް ކުރަނީ، ސަލްޓާންސް އޮފް ދަ ސީސްގެ ޗެއާމަން މުހައްމަދު އާދިލެވެ. އަދި 40 ޕަސެންޓް ހިއްސާކުރަނީ އަލީ އަހުމަދު )މިނާ ކުޑޭ( އެވެ.