މާލެ ސިޓީ ކައުންސިލްގެ އިހުމާލުން ހާލަކުވި މާފަންނު ސަހަރާގައި ބަހައްޓާފައި ހުންނަ ޕަންޕް ސްޓޭޝަން ވަގުތީ ގޮތުން އޮޕަރޭޝަން ހާލަތަށް ގެނެސްފައިވާ ކަމަށް ކޮންސްޓްރަކްޝަން މިނިސްޓްރީން ބުނެފިއެވެ.
މާފަންނު ސަހަރާގައި ހުންނަ ސްޓޯމްވޯޓާ ޕަމްޕް ސްޓޭޝަނަކީ މާލޭގައި ފެންބޮޑުވާ މައްސަލަ ހައްލުކުރުމަށް އެމްޑަބްލިއުއެސްސީން 2014 އާއި 2018 އަހަރާ ދެމެދު މާލޭގެ އެކި ތަންތަނުގައި ބެހެއްޓި ސްޓޭޝަންތަކުގެ ތެރެއިން އެއް ސްޓޭޝަނެވެ. އެއީ މާފަންނު ސަރަހައްދުން ފެން ހިންދަން ބޭނުންކުރާ މައިގަނޑު ސްޓޭޝަނެވެ.
މި ސްޓޭޝަން ހަލާކުވެ ބޭނުން ނުކުރެވޭ ހަލަަތށް ގޮސްފައިވާ ކަން ހާމަކުރައްވައި މިއަދު ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވަނީ އެކްސްގައި ޕޯސްޓެއް ކުރައްވާފައެވެ. މުއްތަލިބް ވިދާޅުވީ، ޕަންޕް ސްޓޭޝަންގެ މަރާމާތު ކަންކަމާ ގުޅޭ ގޮތުން ބައްދަލުވުމެއް ބޭއްވުމަށް އެދި ސިޓީ ކައުންސިލުން ސިޓީއެއް ފޮނުވި ނަމަވެސް އެއީ އެ މިނިސްޓްރީން ބަލަހައްޓަމުން އަންނަ ކަމެއް ކަމަށެވެ.
މުއްތަލިބްއަށް ރައްދު ދެއްވައި މޭޔަރު އާދަމް އާޒިމް އެއަށް ވިދާޅުވީ އެ ޕަމްޕް ސްޓޭޝަންގެ ބައިތައް ރޫޅާލި އިރު، އެ ސްޓޭޝަން މަސައްކަތް ނުކުރާތާ ފަސް ވަރަކަށް މަސްދުވަސް ވެއްޖެ ކަމަށެވެ. އެ ސްޓޭޝަންގައި ހުރި ކަރަންޓު ބޯޑަށް ބަޔަކު ގެއްލުން ދީފައި ހުރި ކަމަށް އާޒިމް ވިދާޅުވިއެވެ.
ނަމަވެސް، އާޒިމްގެ މި ވާހަކަތައް ދޮގުކުރައްވައި މުއްތަލިބް ވިދާޅުވީ މި މަހުގެ ތިންވަނަ ދުވަހު މާލެއަށް ވިއްސާރަކުރި އިރު ވެސް އެ ސްޓޭޝަން މަސައްކަތްކުރި ކަމަށާއި އެއްވެސް މައްސަލައެއް އޭރު ފާހަގަކުރެވިފައި ނުވާ ކަމަށެވެ. މާލެ އަށް ވިއްސާރަކުރާ ކޮންމެ ފަހަރަކު މިނިސްޓްރީގެ މުވައްޒަފުން މާލޭގެ އެކި ތަންތަނުގައި ހުރި ޕަމްޕް ސްޓޭޝަންތަކުގެ ހާލަތު ބަލާ ކަމަށެވެ.
މިކަމާ ގުޅިގެން ކޮންސްޓްރަކްޝަން މިނިސްޓްރީން ނެރުނު ބަޔަނެއްގައި ބުނީ، ވިއްސާރައިގެ ސަބަބުން މާލެ ސިޓީގައި ފެންބޮޑުވުމުގެ ސަބަބުން މައްސަލަ ދިމާވާ ކޮންމެ ފަހަރަކު މާލޭގެ އެކި ސަރަހައްދުތަކުގައި ގާއިމްކޮށްފައިވާ ޕަންޕް ސްޓޭޝަންތައް ރަނގަޅަށް މަސައްކަތް ކުރޭތޯ ބަލަމުން ދާ ކަމަށެވެ. އެގޮތަށް ބެލިބެލުމުގައި މާފަންނު ސަހަރާގައި ގާއިމްކޮށްފައިވާ ޕަންޕް ސްޓޭޝަނަށް ގުޅާފައިވާ ހޮޅިތައް ބޭނުން ނުކުރެވޭ ވަރަށް ހަލާކުވެފައިވާ ކަން ވަނީ ފާހަގަވެފައި ކަމަށެވެ.
އެ ޕަންޕް ސްޓޭޝަނަށް ގެއްލުންވެފައި ވަނީ މާލެ ސިޓީ ކައުންސިލުން އެ ސަހަރާގައި ކުރަމުން އަންނަ މަސައްކަތެއްގެ ތެރެއިން ޕަންޕް ސްޓޭޝަނަށް ލިބިދާނެ ގެއްލުމަކަށް ބެލުމެއް ނެތި އެ ސަރަހައްދު ކޮނެފައިވާތީ ކަމަށް ކޮންސްޓްރަކްޝަން މިނިސްޓްރީން ބުނެއެވެ. އަދި އެ މަސައްކަތް އެ ކައުންސިލުން ކުރިއަށް ގެންގޮސްފައި ވަނީ ވެސް ކޮންސްޓްރަކްޝަން މިނިސްޓްރީއާ މަޝްވަރާ ނުކޮށް ކަމަށާއި އެ މަސައްކަތާ ގުޅޭ އެއްވެސް މައުލޫމާތެއް ވެސް ހިއްސާ ނުކުރާ ކަމަށް ވެސް ބުނެފައި ވެއެވެ.
މިހާރު އެ ޕަންޕް ސްޓޭޝަން ހުރީ ވަގުތީ ގޮތުން އޮޕަރޭޝަނަށް ގެނެސްފައި ކަމަށް ވެސް އެ މިނިސްޓްރީން ބުނެއެވެ. މި މަސައްކަތުަގއު އާރްޑީސީ އަދި ސްޓެލްކޯ ގެ އެހީތެރިކަން ލިބުނު ކަން އެ މިނިސްޓްރީން ފާހަގަކޮށްފައި ވެއެވެ.