އެމްޑީޕީ ވެރިކަމުގައި ފެނަކަ ކޯޕަރޭޝަނަށް ގިނަ މަޝްރޫއުތަކެއް ހިންގައިދީ މުދާ ވިއްކާފައިވާ ކުންފުންޏަކަށް ނުދައްކައި ހުރި 7.9 މިލިއަން ރުފިޔާ ދެއްކުމަށް ސިވިލް ކޯޓުން ހުކުމް ކޮށްފިއެވެ.
އެލްއެފް ކޮންސްޓްރަކްޝަން ނަމަކަށް ކިޔާ ކުންފުންޏަކުން މި މައްސަލަ ކޯޓަށް ހުށަހަޅާފައިވަނީ މަސައްކަތުގެ އަގާއި ވިއްކާފައިވާ މުދަލުގެ އަގަށްވާ 7.7 މިލިއަން ރުފިޔާ ނަގައިދިނުމަށެވެ. އަދި، މައްސަލަ ހުށަހަޅަން ވަކީލުންނަށް ހިނގި ޚަރަދު ކަމަށްވާ 40،000 ރުފިޔާ ނަގައިދިނުމަށް ވެސް ވަނީ އެދިފައެވެ.
ސިވިލް ކޯޓުން ވަނީ 15 ދުވަހުގެ ތެރޭގައި ފެނަކައިން އެލްއެފް ކުންފުންޏަށް 7.9 މިލިއަން ރުފިޔާ ދެއްކުމަށް ހުކުމް ކޮށްފައެވެ. ފެނަކައަށް ޖަވާބުދާރީވާން ދިން ފުރުސަތުގައި އެ ކުންފުނިން ޖަވާބުދާރީވެފައި ނުވާއިރު، ކޯޓުން ހުކުމް ކޮށްފައިވަނީ އެ ކުންފުނީގެ ގައިރު ހާޒިރުގައެވެ.
އެލްއެފްއިން ފެނަކަށް ކޮށްދީފައިވާ މަސައްކަތަށް ބަލާއިރު، 2019 ވަނަ އަހަރުން 2022 ވަނަ އަހަރާ ހަމައަށް ޖުމްލަ 11 މަޝްރޫއެއް ހިންގާފައިވެއެވެ. އެއީ:
ނިމުނު ރައީސް އިބްރާހީމް މުހައްމަދު ސާލިހުގެ ވެރިކަމުގައި ކޮރަޕްޝަނުގެ ހާއްޔަކަށް ހަދާފައިވާ ފެނަކަ ކުންފުނީގެ ދަރަނި ހަތަރު ބިލިއަނެއްހާ ރުފިޔާއަށް އަރައެވެ. އިންތިޚާބުތަކާ ދިމާކޮށް ބޮޑު އަގުގައި މަޝްރޫއުތައް ހިންގުމާއި، ތަނަށް ބޭނުންވާ ވަރަށް ވުރެ އިތުރަށް ސިޔާސީ މުވައްޒަފުން ނެގުމާއި މިނޫންވެސް ކޮރަޕްޝަނުގެ ގިނަ ތުހުމަތުތަކެއް ކުރެވެއެވެ.
ރަސްމީ ހައިސިއްޔަތު ނަހަމަގޮތުގައި ބޭނުންކޮށް، ކުންފުންޏަކަށް ނާޖާއިޒު މަންފާ ހޯދައިދިން މައްސަލައެއްގައި ޕްރޮސިކިއުޓާ ޖެނެރަލްގެ އޮފީހުން ވަނީ މިދިޔަ ބުރާސްފަތި ދުވަހު ފެނަކައިގެ ކުރީގެ އެމްޑީ އަހުމަދު ސައީދު އާއި އިތުރު ވެރިއެއްގެ މައްޗަށް ދައުވާ ކުރުމަށް ކޯޓަށް ވެސް ހުށަހަޅާފައެވެ.