ރ. އުފުލަންދޫއަކީ މަޑުއްވަރީގެ ބައެއްގެ ގޮތުގައި ހަމަޖައްސަވައި، އެރަށަށް ދިމާވެފައިވާ ބިމުގެ ޖާގައިގެ މައްސަލައަށް ފުރިހަމަ ޙައްލެއް ގެނެސްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. ރައީސުލްޖުމްހޫރިއްޔާ މިޔަޤީންކަން ދެއްވީ މަޑުއްވަރީ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ރިޔާސީ އިންތިޚާބުގެ ކެމްޕޭންގައި، މަޑުއްވަރީ ރައްޔިތުންގެ އުންމީދުތަކުގައި ކުލަ ޖައްސައިދެއްވާނެކަމަށް ވަޢުދުވެވަޑައިގެންފައިވާކަމަށާއި، އެހެންކަމުން، އެމަނިކުފާނު އެރަށަށް މިވަޑައިގަތީ، ރަށުގެ ތަރައްޤީއަށް ބޭނުންވާ ކަންކަން ފުރިހަމަކޮށްދެއްވާނެކަމުގެ ޔަޤީންކަންދެއްވުމަށްކަމަށެވެ.
ރައީސްގެ ވާހަކަފުޅުގައި މަޑުއްވަރީއަށް އޮތް އެންމެ ބޮޑު މައްސަލައަކީ ބިމުގެ ދަތިކަންކަން ފާހަގަކުރައްވާ ވަނީ، އެރަށް ހިއްކެން އޮތް މިންވަރަށް ހިއްކަވާނެކަމުގެ ޔަޤީންކަންދެއްވާފައެވެ. އެރަށުގައި މިވަގުތު އޮތީ ހައެއްކަ ހެކްޓަރުގެ ބިން ހިއްކެންކަން ފާހަގަކުރައްވާ ރައީސް ވިދާޅުވީ، އެމަޝްރޫޢު މިއަހަރުގެ ބަޖެޓުގެތެރެއިން ކުރެއްވުމަށް ނިންމަވާފައިވާކަމަށެވެ. އަދި އެ މަޝްރޫޢު މިއަހަރު ފުރިހަމަކުރައްވާނެކަމަށްވެސް ރައީސް ވިދާޅުވިއެވެ.
ރައީސް ވަނީ މަޑުއްވަރީގައި އިތުރު މައްސަލަތައްވެސް އެބަހުރިކަމަށް ވިދާޅުވެފައެވެ. އޭގެތެރޭގައި ބަނދަރާއި ގިރާ ސަރަހައްދު ހިމާޔަތްކުރުންފަދަ މަސައްކަތް ކުރަން ހުރިކަމަށް އެމަނިކުފާނު ވިދާޅުވިއެވެ. އެހެންކަމުން ބަނދަރުގެ މައްސަލައާއި، ގިރާ ސަރަހައްދު ހިމާޔަތްކުރުމާއި، ހިއްކާ ސަރަހައްދު ހިމާޔަތްކުރުމާއި، ބަނދަރުގެ ބޭރު ތޮށީގައި އުޅަނދު އެޅޭނެގޮތަށް ހުރިހާކަމެއް އެކުއެކީގައި ކުރިއަށް ގެންދަވާނެކަމަށާއި ހުރިހާ ކަމެއްވެސް ގުޅިލާމެހޭގޮތަށް ކުރިއަށްގެންދަވާނެކަމަށް ރައީސް ވިދާޅުވިއެވެ.
"ހައެއްކަ ހެކްޓަރު މިރަށަށް އިތުރުކުރެވެން އޮތީ. އެއަކުން ގެދޮރުގެ މައްސަލަ ހައްލުނުވާނެ. ރަށުގައި ހުރި އިޤްތިޞާދީ ބޭނުންތަކަށް ބޭނުންކުރާ ތަންތަން ރަށުގެ ބޭރަށް ގެންދިއުމަކީ ބިމުގެ ބޭނުން އެންމެ ބޮޑަށް ހިފޭނެގޮތް. މިރަށުގައި ފައިބަރުގެ މަސައްކަތްކުރާއިރު ކެންސަރުގެ މައްސަލަވެސް ބޮޑު. އެހެންވީމަ އިރާދަކުރެއްވިއްޔާ ތިބޭފުޅުންގެ މިހުރިހާ މައްސަލައެއް ހައްލުވާގޮތަށް އުފުލަންދޫ މިރަށުގެ އިޙްތިޞާސްގެތެރޭގައި ހިމަނައިދޭނަން. އެކަމުގެ ޤާނޫނީ ލިޔެކިޔުންތައް ހަމަޖެހިގެންދާނެ. އެއާއެކު ދިރިއުޅޭ ސަރަހައްދުގައި ހުންނަންނުޖެހޭނެ ކަންކަން އެތަނަށް ބަދަލުކުރުމަށް އެދެން ރައީސުލްޖުމްހޫރިއްޔާ ވިދާޅުވިއެވެ.
މިއާއެކު ބޯހިޔާވަހިކަމާއި އެނޫންވެސް މައްސަލަތަކަށް ޙައްލު އަންނާނެކަމަށް ރައީސް ވިދާޅުވިއެވެ.
ރައީސް ވިދާޅުވީ މަޑުއްވަރީގައި 50 ހައުސިންގ ޔުނިޓް އެޅުމަށް ވަޢުދުވެފައިވާކަމަށާއި، އެރަށް ހިމެނޭހެން ހުރިހާ ރަށެއްގެ ހައުސިން މަޝްރޫޢު ހިންގުމަށް މިމަހު އިއުލާންކުރައްވާނެކަމަށެވެ. ސަރުކާރުގެ ފަރާތުން އެކަމުގައި ކުރަންޖެހޭ ހުރިހާކަމެއް ކުރައްވާނެކަމަށް ރައީސް ވިދާޅުވިއެވެ. މީގެ އިތުރުން އެރަށުގެ މަގު ހެދުމުގެ މަޝްރޫޢުވެސް ކުރިއަށްގެންދަވާނެކަމަށާއި، ސިއްޙީ މަރުކަޒަށް ޖާގައިތުރުކޮށްދެއްވާނެކަމުގެ ޔަޤީންކަންވެސް ރައީސް ދެއްވިއެވެ. މީގެއިތުރުން ކުޅިވަރުގެ ވަސީލަތްތައް ޤާއިމްކުރުމުގެ މަސައްކަތަށް އަލިއަޅުއްވާލައްވާ ރައީސް ވިދާޅުވީ، ލަސްވެގެން އަންނަމަހުގެ ނިޔަލަށް ފުރިހަމަ ފުޓުބޯޅަ ދަނޑެއް މަޑުއްވަރީގައި ތަރައްޤީކޮށްދެއްވާނެކަމަށެވެ.