ގޭންގުތަކާއި ޑްރަގުގެ އިތުރުން ގަވާއިދާ ހިލާފަށް އުޅޭ ބިދޭސީންގެ ކިބައިން ގައުމު ސަލާމަތްކޮށް ކުށުގެ ވެށީގައި އުޅޭ ކުދިން ހަމަ މަގަށް އެޅުވެންދެން ކެނޑިނޭޅި މަސައްކަތް ކުރުމަށް އަލަށް ދަސްވެނިވި ފުލުހުންގެ ކިބައިން ހޯމް މިނިސްޓަރު އިހުސާން އެދިވަޑައިގަންނަވައިފި އެވެ.
އައްޑޫގައި ރޭ އޮތް ފުލުހުންގެ އިނީޝަލް ޓްރެއިނިން ކޯހުގެ ދަސްވެނިންނާ މުހާތަބުކުރައްވައި ވާހަކަދައްކަވަމުން އިހުސާން ވިދާޅުވީ ދިވެހި ރައްޔިތުން އެދެނީ ދިވެހިރާއްޖޭގެ ކޮންމެ މަގަކީ އަދި ކޮންމެ ރަށަކީ ވެސް ރައްކާތެރިކަން ކަށަވަރުވެފައި އޮތް ތަނަކަށް ހެދުމަށް ކަމަށެވެ. އެކަން ހާސިލު ކުރުމަށްޓަކައި ފުލުހުންނާ މިޝަންތަކެއް ހަވާލުކޮށްފައިވާ ކަމަށް އޭނާ ވިދާޅުވި އެވެ.
އެ މަސައްކަތްތަކަކީ ދިވެހިރާއްޖެއިން ޑްރަގުގެ ވަބާ އެއްކޮށް ނައްތައިލުމާއި ދިވެހިރާއްޖޭގައި ގޭންގު ހަދައިގެން ކުށް ކުރަމުން މި އަންނަ ގްރޫޕުތައް އެއްކޮށް ގާނޫނުގެ ކުރިމައްޗަށް ގެނައުމާއި އަދި އެ މީހުންގެ ފަރާތުން މި މުޖުތަމައު ސަލާމަތް ކުރުން ކަމަށް އިހުސާން ވިދާޅުވި އެވެ.
އޭގެ އިތުރުން ދިވެހިރާއްޖޭގައި ގަވާއިދާ ހިލާފަށް އުޅެމުންދާ ބިދޭސީންގެ މައްސަލަ އެއްކޮށް ހައްލު ކުރުމާއި ކުށުގެ މާހައުލުގައި އުޅެމުންދާ ތުއްތު ކުދިން ކުށުގެ މާހައުލުން ނެރެ އެ ކުދިންނަށް ބޭނުންވާ ތަމްރީނާއި އެ ކުދިންނަށް ބޭނުންވާ އެކިއެކި ޕްރޮގުރާމުތައް ހިންގައި ކުށުގެ މާހައުލު އެއްކޮށް ނައްތައިލުމަކީ ވެސް ފުލުހުންނާ ހަވާލުކޮށްފައިވާ މިޝަންއެއް ކަމަށް އޭނާ ވިދާޅުވި އެވެ.
"ކޮންމެ ދުވަހަކީ މި ދެންނެވި ފަދަ ނުރައްކާތެރި ފަރާތްތަކާއި ނުރައްކާތެރި މާހައުލުތަކުގައި ފުލުހުން ހިދުމަތް ކުރަންޖެހޭނެ ދުވަހެއް، މި ކަމަށް ތިޔަ ފުލުހުން ތިޔަ ތިބީ ތައްޔާރަށް، މި ކަމަށްޓަކައި މާދަމާއިން ފެށިގެން ކެނޑިނޭޅި މި މިޝަންތައް ހާސިލުވަންދެން މަސައްކަތް ކޮށްދެއްވުމަކީ ތިޔަ އެންމެހާ ފުލުހުންގެ ކިބައިން އަޅުގަނޑު އެދޭ އެދުން،" އިހުސާން ވިދާޅުވި އެވެ.
ރައްޔިތުން އެދެނީ ދިވެހިރާއްޖޭގެ ސަލާމަތާއި ރައްކާތެރިކަން 100 ޕަސެންޓު ކަށަވަރުވެފައި އޮންނަން ކަމަށް އޭނާ ވިދާޅުވި އެވެ. ފުލުހުން މަސައްކަތް ކުރަންޖެހެނީ އެކަން ހާސިލުކޮށް އެފަދަ މާހައުލެއް ރާއްޖޭގައި ގާއިމުކުރަން ކަމަށް އިހުސާން ވިދާޅުވި އެވެ.
އެ މަސައްކަތުގައި ފުލުހުން އުޅޭއިރު، ކޮރަޕްޝަންގެ މުޑުދާރު ފައިސާ އާއި މަގާމުގެ ކުރިއެރުން ދިނުމަށް ވެސް މީހުން ވައުދުވާނެ ކަމަށް އިހުސާން ވިދާޅުވި އެވެ. އެހެން ނަމަވެސް، ފުލުހުންގެ ކޯހުން ދަސްވި އެއްޗެއްގެ ބޭނުން ހިފައި ސާބިތުކަން ދޫކޮށް ނުލުމަށް އޭނާ ދަސްވެނިންނަށް ގޮވައިލެއްވި އެވެ.
"ތިޔަ ހެއްދެވި ތަމްރީނާއި މިއަދު ތިޔަ ތިއްބެވި ސާބިތުކަން ދޫކޮށްލައިގެން ނުވާނެ، އަޅުގަނޑުމެންގެ މި މުއައްސަސާގައި އެބްސޮލިއުޓް ޒީރޯ ޓޮލެރެންސް އޮންނާނީ ކޮރަޕްޝަންއަށް، އެހެންވީމާ މިފަދަ ބަލިމަޑުކަމެއްގައި އެއްވެސް ފުލުހަކު ނުޖެހުމަކީ އަޅުގަނޑު ދޭ ނަސޭހަތެއް،" އިހުސާން ވިދާޅުވި އެވެ.
ގައުމީ ހިދުމަތައް ދަރިން ނެރުމަކީ އާއިލާއަކަށް ކުރެވޭނެ އެންމެ ބޮޑު ގައުމީ އެއް ހިދުމަތް ކަމަށް ވިދާޅުވެ، ރޭ ދަސްވެނިވި ފުލުހުންގެ އާއިލާތަކަށް އިހުސާން ޝުކުރު އަދާކުރެއްވި އެވެ.
ފުލުހުންގެ 41 ވަނަ އިނީޝަލް ޓްރެއިނިން ކޯސް ފުރިހަމަކުރި 185 ފުލުހަކު ރޭ ދަސްވެނިވި އެވެ. އޭގެތެރެއިން 96 ފުލުުހުންނަކީ އަންހެނުންނެވެ.
މިފަހަރުގެ ފުލުހުންގެ އިނީޝަލް ކޯހުން އެއްވަނަ ހާސިލުކުރީ ވެސް އަންހެން ފުލުހެކެވެ. ފުލުހުންގެ ތާރީހުގައި ވެސް އިނީޝަލް ޓްރެއިނިން ކޯހުގެ އެއްވަނަ ހާސިލުކޮށްގެން ތާރީހުން ޖާގަ ހޯދީ އިމްޝާ އަބްދުލް ލަތީފް އެވެ.