ބޮލީވުޑްގެ ކުރީގެ މަޝްހޫރު ފިލްމީ ތަރި ގޯވިންދާގެ ދަރިފުޅު ޔަޝްވަރްދަން އަހޫޖާ ފިލްމު އިންޑަސްޓްރީއަށް ތައާރަފުވާ ފިލްމުގެ ނަމަކީ "ހަންޑްރެޑް" ކަމަށް ރިޕޯޓުތަކުން ބުނެފިއެވެ. މި ފިލްމަކީ މަގުބޫލު ކޮމެޑީ ފިލްމުތަކެއް ބެލުންތެރިންނަށް ގެނެސްދިން ޑައިރެކްޓަރު ސާޖިދު ޚާން އުފައްދާ ފިލްމެކެވެ. ހޮރޯ-ކޮމެޑީއެއް ކަމަށްވާ "ހަންޑްރެޑް"ގެ މަސައްކަތް މިދިޔަ ހުކުރު ދުވަހު އިންޑިއާގެ މުމްބާއީގައި ފަށާފައިވާ ކަމަށް މީޑިއާތަކުން ވަނީ ބުނެފައެވެ. މި ފިލްމު ގެނެސްދޭނީ ކުޅަދާނަ ފިލްމު ޕްރޮޑިއުސަރު އެކްތާ ކަޕޫރުގެ ބާލާޖީއާއި ޕްރޮޑިއުސަރު އަމަރު ބޫތާލާގެ ގިލްޓީ ބާއި އެސޯސިއޭޝަން މީޑިއާ ގުޅިގެންނެވެ. އަމަރު ބުތާލާ ޕްރޮޑިއުސްކޮށްފައިވާ ފިލްމުތަކުގެ ތެރޭ ސިދާތް މަލްހޯތްރާއާއި ރަޝްމިކާ މަންދަންނާގެ ފިލްމު "މިޝަން މަޖްނޫ"، "މިޝަން މަންގަލް" އަދި "ކޭސަރީ" ހިމެނެއެވެ. ޔަޝް ބައްޕަ އަދި ކުރީގެ އެކްޓަރު ގޯވިންދާއާ އެކު ސްޓޭޖް ޕާފޮމެންސެއްގައި ބައިވެރިވަނީ--ފޮޓޯ/ފިލްމުފެއަ ފިލްމީ ޚަބަރުތައް ބުނާގޮތުން ޔަޝްއާ އެކު "ހަންޑްރެޑް"ގެ ބަތަލާގެ ރޯލުން ފެންނާނީ ފިލްމު "ލާޕަތާލޭޑީސް"އިން ގިނަ ބައެއްގެ ސަމާލުކަން ލިބުނު ނިތާންޝީ ގޮއެލްއެވެ. ފިލްމު "ހަންޑްރެޑް"އަކީ ފިލްމީ މަސައްކަތްތަކާ ސާޖިދު ދުރުގައި އުޅުމަށް ފަހު އުފައްދާ ފުރަތަމަ ފިލްމެވެ. މަގުބޫލު ފިލްމުތައް ކަމަށްވާ "ހެއި ބޭބީ"، "ހައުސްފުލް" އަދި "ހިއްމަތުވާލަ" ފަދަ ފިލްމުތައް ގެނެސްދިން ސާޖިދު އެންމެ ފަހުން ޑައިރެކްޓްކޮށް ރިލީޒްކޮށްފައިވަނީ 2014 ވަނަ އަހަރު ރިލީޒްކުރި ފިލްމު "ހަމްޝަކަލްސް"އެވެ. ސާޖިދު ވަނީ 2022 އިން 2023އަށް ގެނެސްދިން ކަލަސްގެ ރިއަލިޓީ ޝޯ "ބިގް ބޮސް 16"ގައި ބައިވެރިވެފައެވެ. ގޯވިންދާއާއި ސުނީތާގެ ދަރިފުޅު ޔަޝްގެ ފިލްމު މަސައްކަތް ފަށާފައިވާއިރު ދާދި ފަހުން ސުނީތާ މީޑިއާއަށް ދިން އިންޓަވިއުއެއްގައި ބުނެފައިވަނީ ކުދިންގެ ދިރިއުޅުމުގެ ކަންކަމުގައި، ޚާއްސަކޮށް ޔަޝްގެ ފިލްމީ ކެރިއަރު ބިނާކުރުމުގައި ގޯވިންދާގެ ފަރާތުން އެއްވެސް ވަރަކަށް އެއްބާރުލުމެއް ނުލިބޭ ކަމަށެވެ.