އީރާނުގެ އުޅަނދެއް އިންޑިއާގެ ކޮޗިންގައި ބަނދަރުކުރުމުގެ ހުއްދަ ދީފައިވާ ކަމަށް އިންޑިއާ ސަރުކާރުގެ މަސްދަރުތަކާ ހަވާލާދީ އެންޑީީޓީވީން ރިޕޯޓުކޮށްފިއެވެ. މިދިޔަ ބުދަ ދުވަހު، އެމެރިކާގެ ސަބްމެރިންއަކުން ޓޯޕީޑޯ ހަމަލާއެއްދީ، އީރާނުގެ އައިރިސް ޑެނާ ވަނީ ލަންކާގެ ކަނޑުގެ ސަރަހައްދު ކައިރިއަށް ފައްތާލައިފައެވެ. އޭރު އޭގައި ތިބި 130 މީހުންގެ ތެރެއިން ޒަޚަމްތަކާ އެކު 32 މީހަކު ސަލާމަތްވެފައި ވާއިރު، 90 މީހެއްގެ ހަށިގަނޑު ހޯދައި ލަންކާއަށް ވަނީ ގެންގޮސްފައެވެ. އެންޑީޓީވީން ބުނީ މިދިޔަ ހަފުތާ ތެރޭގައި، ތަމްރީންތަކަށް އީރާނުގެ އިތުރު އުޅަނދެއް ވެސް ނުކުމެ އުޅުނު ކަމަށެވެ. އައިރިސް ލަވާންގެ ނަން ދީފައިވާ އެ މަނަވަރުން ބަނދަރުކުރުމުގެ ހުއްދައަށް އިންޑިއާގައި އެދުނީ ހަނގުރާމައިގެ ފުރަތަމަ ދުވަސް ކަމަށްވާ ފެބްރުއަރީ 28 ވަނަ ދުވަހެވެ. އެ އުޅަނދަށް ހުއްދަ ދިނީ އޭގެ އެއްދުވަސް ފަހުން ކަމަށް އެންޑީޓީވީން ރިޕޯޓުކުރިއެވެ. ނަމަވެސް މަނަވަރު ކޮޗިންގައި ބަނދަރުކުރީ ބުދަ ދުވަހު ކަމަށާއި އެއީ ލަންކާއިން އެހީވި، އައިރިސް ޑެނާއަށް ހަމަލާ ދިން ދުވަސް ކަމަށްވެސް އެންޑީޓީވީން ރިޕޯޓުކޮށްފައިވެއެެވެ. އައިރިސް ލާވާންގައި ތިބި ޖުމްލަ 183 ފަޅުވެރިން މިހާރު ތިބީ އެ ސަރަހައްދުގެ ކަނޑުގެ ސިފައިންގެ ފެސިލިޓީތަކުގައި ކަމަށް މައުލޫމާތު ލިބިފައިވާ ފަރާތްތަކުން ބުނެއެވެ. އީރާނުގެ ބޯޓެއް ފައްތާލި ފަހުން، އެ ގައުމުގެ އިތުރު މަނަވަރެއް ކަމަށްވާ، އައިރިސް ބުޝެހެރް ވެސް ވަނީ ލަންކާގެ ޓްރިންކޮމަލީ ބަނދަރަށް ވަދެފައެވެ. ކޮޗިން ބަނދަރަށް ދިޔަ އައިރިސް ލަވާން އަކީ ވެސް، އައިރިސް ޑެނާ އަދި އައިރިސް ބުޝެހެރްއާ އެކު މިދިޔަ މަހު އިންޑިއާގައި އޮތް ނޭވަލް އެކްސަސައިޒެއްގެ ފްލީޓް ރިވިއުއެއްގައި ބައިވެރިވި އުޅަނދެކެވެ. މިދިޔަ ހޮނިހިރު ދުވަހު އެމެރިކާ އާއި އިސްރާއީލުން ގުޅިގެން އީރާނަށް ހަަމަލާދޭން ފެށި ފަހުން އީރާންގެ 30 އަށް ވުރެ ގިނަ އުޅަނދު ފައްތާލާފައިވާނެ ކަމަށް އެމެރިކާއިން ބުނެއެވެ.