ހދ. ހަނިމާދޫން އެ އަތޮޅު ހިރިމަދޫ މީހުންނަށް ގޯތި ދޭން އުޅޭތީ ފުލުހުންނަށް ހުށަހެޅި މައްސަލައެއް ނުބަލަން އެ ޚިދުމަތުން މިއަދު ނިންމައިފިއެވެ. ހަނިމާދޫ މީހުންނަށް ގޯތި ނުދީ، އެ ރަށަށް ހިރިމަރަދޫ މީހުން ގެންގޮސް ގޯތި ދިނުމާ މެދު އެ ރަށު މީހުން އަންނަނީ ދެކޮޅު ހަދަމުންނެވެ. އެ ރަށު ކައުންސިލްގެ ނައިބު ރައީސް ފިރާގު މުހައްމަދު މިއަދު ފޭސްބުކްގައި ކުރި ޕޯސްޓެއްގައި ވިދާޅުވީ، ސަރުކާރުން ހިރިމަރަދޫ މީހުންނަށް ހަނިމާދޫން ގޯތި ދިނުމުގެ މަސައްކަތްކުރަނީ ކައުންސިލުން ހުއްދަ ނުނަގައި، ނުވެސް އަންގާ ކަމަށެވެ. އަދި، އެ މަސައްކަތުގެ ތެރެއިން ނަގާ ރުއްގަހާއި ބަންޑާރަ ރުއްގަހުގެ ބަދަލު ވެސް ދީފައިނުވާ ކަމަށް އޭނާ ބުންޏެވެ. އެ މަސައްކަތް ކުރަމުން އަންނަނީ ކޯޓު އަމުރެއްގެ ދަށުން ބަންޑާރަ ގެއަކަށް ބަދަލު ދީފައި އޮތްތަނަކުން ފެށިގެން ކަމުން، އެ ކަން ހުއްޓާލަން މަސައްކަތްކުރާ ފަރާތަށް އަންގާފައިވާނެ ކަމަށް އޭނާ ވިދާޅުވިއެވެ. ފިރާގު ވިދާޅުވި ގޮތުގައި ހަނިމާދޫން ހިރިމަރަދޫ މީހުންނަށް ބިން ހަމަޖައްސާފައިވަނީ ލޭންޑް ޔޫސް ޕްލޭނާ ވެސް ޚިލާފަށެވެ. އެއީ ރައްޔިތުންގެ ނިންމުމާ ވެސް ޚިލާފަށް ކުރަމުން އަންނަ ކަމެއްކަން ފާހަގަކުރައްވާ އޭނާ ވިދާޅުވީ، އެ މައްސަލަ ފުލުހަށް ހުށަހަޅާފައިވާނެ ކަމަށެވެ. އެކަމަކު، ފުލުހުން ވަނީ އެ މައްސަލަ ނުބަލަން ނިންމާފައެވެ. ފުލުހުންގެ މީޑިއާ އޮފިޝަލް މިއަދު މީޑިއާތަކަށް ފޮނުވި މެސެޖެއްގައި ވިދާޅުވީ، ހަނިމާދޫން ބިން ދޫކުރުމާ މެދު ކައުންސިލްގެ ކަންބޮޑުވުންތަކެއް ފުލުހުންނާ ހިއްސާކޮށްފައިވާ ކަމަށެވެ. އެކަމަކު، އެއީ ދެ މުއައްސަސާއެއްގެ މެދުގައި ހިނގާފައިވާ އިދާރީ މުއާމަލާތެއްގެ މައްސަލަ ކަމަށް ފުލުހުން ބުންޏެވެ. "މިހާތަނަށް ބެލިބެލުމުން މިކަމުގައި ޖިނާއީ ކުށެއް އެކުލެވިގެންވާކަން ފާހަގަކުރެވިފައެއް ނުވެއެވެ،" މެސެޖުގައި މީޑިއާ އޮފިޝަލް ވިދާޅުވިއެވެ. އެހެންވެ، މި މައްސަލައިގައި ހިމެނޭ ފަރާތްތަކުން މަދަނީ ގޮތުން މި މައްސަލައަށް ގާނޫނީ ހައްލެއް ހޯދަން އިރުޝާދު ދީފައިވާނެ ކަމަށް ފުލުހުން ބުންޏެވެ. ގާތްގަނޑަކަށް އާބާދީގައި 300 މީހުން ވެސް ހަމަނުވާ ހިރިމަރަދޫ މީހުން އެ އަތޮޅު ހަނިމާދުއަށް ބަދަލުކުރަން ނިންމީ މިދިޔަ ފެބްރުއަރީ މަހެވެ. ރައީސް ޑރ. މުހައްމަދު މުއިއްޒު މީގެ ކުރިން ވަނީ ހިރިމަރަދޫ މީހުން ގިނަ ވެގެން ދޮޅު އަހަރު ތެރޭގައި ހަނިމާދުއަށް ބަދަލުކުރާނެ ކަމަށް ވިދާޅުވެފައެވެ. އެ މީހުން ބަދަލުކުރަނީ ގެ އަޅައި ނިންމާފައެވެ.