އަހުރެންނަކީ ތަނަވަސްކަން ލިބިގެންހުރި މީހަކީމެވެ. އަހުރެން ބޭނުންވާ ކޮންމެ ކަމަކަށް ކޮންމެ ދުވަހަކު ޚަރަދުކުރާނެ ވަރަށް އަތުގައި ފައިސާ އެބަހުއްޓެވެ. އެހުރިހާ ފައިސާޢަކުންވެސް އަހުރެންނަށް ޙާޞިލު ނުކުރެވުނު ކަމެއް އެބަ އޮތެވެ. އެއީ އަތުގައި ފައިސާ ނެތް ނިކަމެތި މީހަކަށް ސަމާލުކަން ދޭނެ އަންހެނުން ތިބޭކަން އެނގުމެވެ. 
އެއީ ޗުއްޓީ ދުވަހެކެވެ. އެންމެން ޕާކުތަކަށް ގޮސް އުޅޭނެ ދުވަހެކެވެ. ވަރަށް ބޮޑު ފަޤީރެއްގެ ސިފަ ދައްކަން ވީދިފައި އޮތް ޓީޝާޓެއް ލައިގެން ޕާކަކަށްގޮސްހުރީމެވެ. ފެންނަ އަންހެން ކުދިންނަށް ހިނިތުންވެ ވާހަކަ ދައްކަން މަސައްކަތްކުރީމެވެ. ކޮންމެ ކުއްޖަކުވެސް ބަލައިލާފައި ދަނީއެވެ. އަނގައިން ނުބުނާތަނުގައި ހިނިތުންވެސްވެނުލައެވެ. 
އެކަމަކުވެސް ހަމަ އެގޮތަށް އެތަނުގައި ހުއްޓައި ވަރަށް ރީތި ކުއްޖަކު އައިސް އަރައިހަމަވުމުން އެކުއްޖާއަށްވެސް ހިނިތުންވެލައި ވާހަކަދައްކަން މަސައްކަތްކުރީމެވެ. އެކުއްޖާ އަހުރެން ސިއްސުވައިލިއެވެ. ހިނިތުންވެގެން ހުރެ އަހުރެންނާއި ދިމާއަށް އައިސް ގާތުގައި ހުއްޓިފައި ވާހަކަދައްކަން ފެށިއެވެ. 
އެކަކު އަނެކަކަށް ތަޢާރަފްވެ ނަން ބުނުމަށްފަހު އަހުރެން ސުވާލުކުރީމެވެ. "އަހުރެން ފަދަ ފަޤީރަކަށް ހިނިތުންވެލައި ވާހަކަ ދެއްކީ ކީއްވެގެން ހެއްޔެވެ؟" އޭނާ ބުންޏެވެ. "ތަނަވަސްކަން ލިބި އެންމެ އަގު ބޮޑު ކޯޓުފަޓުލީނަމަވެސް ގިނަބައެއްގެ ހިތަކަށް އޮންނަނީ ހިލަގަނޑެކެވެ. އަހުރެންގެ ތަނަވަސް ލޯބިވެރިޔާއަށް ވަފާތެރިކަމުގައި 2 އަހަރު ހޭދަކުރިފަހުން އަހުރެން ބާކީކޮށްލީ އެންމެ ކުޑަމިނުން ސަބަބުވެސް ބުނެ ނުލައެވެ. މިއަދު އަހުރެން މިހޯދަނީ ކިތަންމެ ފަޤީރަސް އަހުރެންގެ އަގު ވަޒަންކުރާނެ މީހެކެވެ. ތިބާގެ މޫނުމަތިން އެސިފަ އެބަފެނެއެވެ. ވީމާ ލައިގެން ހުރި ޓީޝާޓް ވީދިފައި ހުރުމަކުން ކަންބޮޑެއް ނުވަމެވެ. އަހުރެން ވަޒީފާ އަދާކުރަމެވެ. ކޮންމެވެސް ވަރަކަށް އތުގައި ފައިސާ އެބަހުއްޓެވެ. އަހުރެންނާއިއެކު އަންނާށެވެ. ފޭރާން ގަނެދޭނަމެވެ." 
އަހުރެން އޭނާ އާއިއެކު ގޮސް ފިހާރައަކަށްވަދެ އޭނާއަށް އެންމެ ރީތިވި ފޭރާން ދެއްކުމުން ހަރުގަނޑުން ނަގައިގެންގޮސް ފިޓިންގރޫމަށްވަދެ ލައިގެން ނުކުމެ ފައިސާދައްކަން ކައުންޓަރަށް ގޮސް ފައިސާ ދައްކަން އޭނާ އުޅުމުން މަޑުކޮށްލަން ބުނެފައި އަހުރެންގެ ގޯލްޑްކާޑު ނަގައި ދިއްކޮށްލުމުން ޢޭނާ ދިއައީ ސިއްސައިގެންނެވެ. 
ދެމީހުން އެކުގައި ނުކުތުމަށްފަހު ހިނގަމުން ގޮސް އަހުރެންގެ ކާރަށް އެރީމެވެ. ކާރުފެނުމުންވެސް އޭނާ ދިއައީ ސިއްސައިގެންނެވެ. ކާރަށް އެރުމަށްފަހު އަހުރެންގެ ޙަޤީޤަތް ކިޔައިދިނީމެވެ. އަދި ބުނީމެވެ. "މިއަދަކީ އަހުރެން ފާއިތުވި 3 އަހަރު މަގުތަކާއި ޕާކުތަކުގައި ހޯދަން އަތްފުނާއަޅަމުން އައި ކުއްޖާއާއި ބައްދަލުވި ދުވަސްކަމަށް އުންމީދުކުރަމެވެ. އަހުރެން އެކުއްޖާ އާއި މިނިޓަކަށްވެސް ވަކިވާކަސް ބޭނުމެއް ނޫނެވެ. ތިބާގެ މައިންބަފައިން ތިބިނަމަ އެމީހުން ދިރިއުޅޭ އެދްރެސް ބުނާށެވެ!" 
އަހުރެން އޭނާ ގޮވައިގެން ގޮސް އޭނާގެ މައިންބަފައިންނާއި ބައްދަލުކުރީމެވެ. އެދެމަފިރިންނާއި ވާހަކަދެއްކުމަށްފަހު ދެމަފިރިންވެސް ގޮވައިގެން އަހުރެންގެ ގެއަށް ދިއައިމެވެ. ޖެހިގެން އައި ދުވަހުގެ ރޭ ކައިވެނިކުރީމެވެ. 
އެކައިވެނީގައި މިހާރު 19 އަހަރުވެގެންދިއައީއެވެ. ހިތްހަމަނުޖެހި ނުރުހުމުގެ ނަޒަރަކުން ބަލައިލަންޖެހުމުގެ ފުރުޞަތުވެސް އަނބިމީހާ ނުދެއެވެ. ދުނިޔޭގެ ހުރިހާ އެންމެންނަށް އަހުރެން ބުނަން އޮތީ ކައިވެނި އުފަލުގައި ދެމެހެއްޓޭނީ ތަނަވަސްކަމަކުން ނޫނެވެ. ޠޯހިރު ހިތެއް ލިބިފައިވާ ބައިވެރިއަކު ލިބިއްޖެނަމައެވެ. 
މިއީ އަޅުގަނޑު ކިޔާފައިވާ ވާހަކައެކެވެ. އެމީހާ އެދިން މެސެޖުގެ އަގުބޮޑުކަމުން މިއަދުނޫހުގެ ކިޔުންތެރިންނަށް ޙިއްބާކޮށްލަން ބޭނުންވީއެވެ. ހެޔޮލަފާ ރަނގަޅު ފިރިއަކު ހޯދަން ބޭނުންވާ އަންހެނުންނަށްވެސް އަގުހުރި ފިލާވަޅަކަސްވާނެ ކަމަށް އުންމީދުކުރަމެވެ.
 
- މިއަދުނޫހުގެ ކިޔުންތެރިއެއް