މާފަރުން ކަރަންޓު ގޮސް، ރައްޔިތުން ކަނު އަނދިރީގައި ތިބެން ޖެހި ކަންބޮޑުވުން ފާޅުކުރަން ފަށައިފިއެވެ. އެ ރަށުން "ސަން"އާ ވާހަކަ ދެއްކި މީހަކު ބުނީ އެންމެ ފުރަތަމަ މިރޭ ކަރަންޓު ދިޔައީ މަޣްރިބް ނަމާދު ވަގުތުގައި ކަމަށެވެ. އެ ވަގުތު މާ ގިނައިރުތަކެއް ނުވެ ކަރަންޓު އައި ނަމަވެސް، 8:30 ހާއިރު އަނެއްކާ ވެސް ކަރަންޓު ދިޔަ ކަމަށް އޭނާ ކިޔައިދިނެވެ. ކަރަންޓުގެ މައްސަލަ ހައްލުކުރުމަށް އެ ރަށު ފެނަކައިގެ ސްޓާފުން މަސައްކަތް ކުރަމުން އަންނައިރު، އިރުކޮޅަކަށް ކަރަންޓު ދެވުނަސް ކަރަންޓު ނުހިފަހައްޓާ ކަމަށް މައުލޫމާތު ލިބެއެވެ. މާފަރު ކައުންސިލްގެ ރައީސް މުހައްމަދު އަދުނާން "ސަން"އަށް ވިދާޅުވީ ކުއްލި ކުއްލިއަށް ކަރަންޓު ދާތީ ރައްޔިތުންގެ ކަންބޮޑުވުން އެބައޮތް ކަމަށެވެ. އަގުބޮޑެތި އިލެކްޓްރިކް ސާމާނު ވެސް މި ކަމުގެ ސަބަބުން ހަލާކުވުމުގެ ކަންބޮޑުވުން އެބައޮތެވެ. އަދިވެސް އެ ރަށުގެ ރައްޔިތުންނަށް ކަރަންޓުގެ ޚިދުމަތް ނުލިބޭއިރު މި ކަމާ ގުޅިގެން އެ ރަށު ރައްޔިތުން އަންނަނީ ނުރުހުން ފާޅުކުރަމުންނެވެ. ރޭ ވެސް މާފަރުން ކަރަންޓު ދިޔަ ކަމަށް އެ ރަށުން ވާހަކަ ދެއްކި މީހުން ބުންޏެވެ.