އިންސްޓަގްރާމް ބޭނުންކުރާ ފަރާތްތަކަށް އެއްޕޯސްޓެއްގައި ގިނަ ފޮޓޯތަކެއް ހިމަނައިގެންލާ "ކަރޫސަލް" ޕޯސްޓްތަކުގެ ކޮންމެ ފޮޓޯއަކަށް ނުވަތަ ސްލައިޑަކަށް ވަކި ހާއްސަ ކެޕްޝަނެއް ލިޔެވޭނެ އާ ފީޗާއެއް އެކުންފުނިން ތައާރަފްކޮށްފިއެވެ. މިއީ ގިނަ ދުވަސްތަކެއް ވަންދެން ޔޫޒަރުން އެދެމުންދިޔަ ބަދަލެއް ކަމަށްވާއިރު، މީގެ ކުރިން ކަރޫސަލް ޕޯސްޓެއްގައި ހިމަނާ ހުރިހާ ފޮޓޯއަކަށް ބޭނުންކުރަން ޖެހެނީ އެއް ކެޕްޝަނެކެވެ. މީގެ ސަބަބުން ގިނަ ފޮޓޯތަކެއް ހިމަނައިގެން ދައްކަން ބޭނުންވާ ވާހަކަތައް ސިލްސިލާކޮށް ގެނެސްދިނުމުގައި ޔޫޒަރުންނަށް މީގެ ކުރިން ދަތިތަކާ ކުރިމަތިވިއެވެ. މި އާ ފީޗާ ބޭނުންކުރެވޭނީ ޕޯސްޓް ކުރާއިރު ކެޕްޝަން ލިޔާ ބައިގައި އިންނަ ޓޮގްލް ބަޓަނެއް އޮން ކޮށްލައިގެންނެވެ. https://sun.mv/223119 މިއާއެކު ޔޫޒަރުން ބޭނުންނަމަ ކޮންމެ ފޮޓޯއަކަށް ވަކިން އާ ޚިޔާލުތަކާއި ޝުއޫރުތައް ކެޕްޝަންގެ ގޮތުގައި އިތުރުކުރުމުގެ އިޚްތިޔާރު ލިބިގެންދާނެއެވެ. މި ފީޗާ މިހާރު ދުނިޔޭގެ އެކި ހިސާބުތަކަށް ދޫކުރަމުންދާއިރު، ހުރިހާ ޔޫޒަރުންނާ ހަމައަށް މި ބަދަލު ފޯރުމަށް ހަފުތާއެއްހާ ދުވަސް ނަގާނެ ކަމަށް ބެލެވެއެވެ. މީގެ އަހަރުތަކެއް ކުރިން އިންސްޓަގްރާމުން ވަނީ ކަރޫސަލްއެއްގައި ހިމެނޭ ފޮޓޯގެ އަދަދު 10 އަކުން 20 އަށް އިތުރުކޮށްދީފައެވެ. އެހެންކަމުން މިހާރު 20 ފޮޓޯއާއެކު 20 ތަފާތު ކެޕްޝަން ހިމަނައިގެން މާ ފުރިހަމަ އަދި އުފެއްދުންތެރި ޕޯސްޓްތަކެއް ތައްޔާރުކުރުމުގެ ފުރުސަތު ހުޅުވިގެންދާނެއެވެ. އިންސްޓަގްރާމުން ދަނީ ފަހަކަށް އައިސް އެޕްލިކޭޝަނަށް ގިނަ ބަދަލުތަކެއް ގެންނަމުންނެވެ. އެގޮތުން އެންޑްރޮއިޑް ފޯނުތަކުގައި އެޕްގެ ކެމެރާއިން "އަލްޓްރާ އެޗްޑީއާރް" އަދި "ނައިޓް ސައިޓް" ސަޕޯޓްކުރަން ފަށާފައިވާއިރު، ޔޫޒަރުން ބޭނުންވާ ގޮތަށް އެލްގޮރިދަމް ބަދަލުކުރުމާއި ޕްރޮފައިލް ގްރިޑްގައި ހުންނަ ޕޯސްޓްތައް ބޭނުން ތަރުތީބަކުން އަތުރާލެވޭ ފީޗާތައްވެސް ދާދިފަހުން ވަނީ ތައާރަފްކޮށްފައެވެ. އިންސްޓަގްރާމަކީ މެޓާ ކުންފުނީގެ ދަށުން ހިންގަމުން އަންނަ، ދުނިޔޭގައި ވެސް އެންމެ މަގުބޫލު އެއް ސޯޝަލް މީޑިއާ ޕްލެޓްފޯމެވެ. ފޮޓޯ އާއި ވީޑިއޯ ހިއްސާކުރުމަށް ޚާއްސަ މި އެޕްލިކޭޝަނަށް ޔޫޒަރުންގެ ބޭނުންތަކާ އެއްގޮތަށް ދޭތެރެދޭތެރެއިން ބޮޑެތި ބަދަލުތަކެއް ގެންނަމުންދެއެވެ. އެގޮތުން މީގެ ކުރިން ވެސް ކަރޫސަލް ޕޯސްޓްތަކުގައި ހިމެނޭ ފޮޓޯގެ އަދަދު އިތުރުކުރުމާއި، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ފޮޓޯ އެޑިޓްކުރެވޭ ފީޗާތަކުގެ އިތުރުން ޕްރައިވެސީ ވަރުގަދަކުރުމަށް ގިނަ މަސައްކަތްތަކެއް އެޕްލިކޭޝަންގެ ތެރެއިން ވަނީ ކޮށްފައެވެ. ޓިކްޓޮކް ފަދަ ވާދަވެރި އެޕްތަކާ ކުރިމަތިލުމަށްޓަކައި އިންސްޓަގްރާމުން މިފަދަ ކޮންޓެންޓް އުފައްދާ ފަރާތްތަކަށް ފަސޭހަވާނެ އުފެއްދުންތެރި ފީޗާތައް ތައާރަފްކުރުން ފަހަކަށް އައިސް ވަނީ ވަރަށް ބޮޑަށް އިތުރުކޮށްފައެވެ.