ސިޙުރުހެދުމަކީ އެންމެ ބޮޑެތި ފާފަތަކުގެ ތެރޭގައި ހިމެނޭ ފާފައެއް ނަމަވެސް ސިޙުރު ހެދުން މިވަނީ ވަރަށް ޢާންމު ކަމަކަށްވެފައެވެ. އެކަމުގެ ގެއްލުން އެކި ގޮތް ގޮތަށް ލިބެމުން އަންނަ މީހުން ވަރަށް ގިނައެވެ. ސިޙުރުޖެހުމުން ސަލާމަތްވެ ތިބެވޭނެ ގޮތަކާއިމެދު ގިނަ ބައަކު ސުވާލުކުރެއެވެ. 
ސުވާލުކުރާ ފަރާތްތަކަށް މިގެނެސްދެނީ ވަރަށް އާދައާ ޚިލާފް، އަދި އެހައިމެ ޢިބްރަތްތެރި ވާހަކައެކެވެ. ވިދާޅުވެލައްވާށެވެ! އަދި އެކުއްޖާ ފަދައިން ޢަމަލުކުރަންވެސް މަސައްކަތްކުރާށެވެ! ސަލާމަތްކަން ދެއްވަވާނެތެވެ. އިން ޝާ ﷲ 
އަޅުގަނޑުގެ ޢުމުރުން 12 ވަރަކަށް އަހަރުން ފެށިގެން މަންމަ ނެތި އަޅުގަނޑަށް ދުނިޔޭގައި އުޅެންޖެހިއްޖެނަމަ ކަންކަން ކުރާނެ ގޮތް ކިޔައިދޭން ފަށައިފިއެވެ. އެއިގެ އިތުރުން ކިޔަވައިގެން ކަންކަން ކުރަންވީ ގޮތާއި ކައިވެނި ކުރަން ކަންކަންކުރަންވީ ގޮތާއި ކައިވެނިކުރެވުމުން ކަންކަން ކުރަންވީ ގޮތާއި މިހެން ގޮސް ދިރިއުޅުމުގެ ހުރިހާ މަރުޙަލާތަކެއްގައި ޢަމަލުކުރަންވީ ގޮތް ކިޔައިދޭން ފަށައިފިއެވެ. ދޮންމަންމަ އަކާއިއެކު އުޅެން ޖެހިއްޖެ ނަމަ ޢަމަލުކުރަންވީގޮތްވެސް ވަރަށް ރަނގަޅަށް ކިޔައިދިނެވެ. 
އެކިދުވަސްމަތިން އެކިއެކި ކަންކަން ކިޔަމައިދެމުން އަންނަތާ 2 ވަނަ އަހަރު، އަޅުގަނޑުގެ ޢުމުރުން 14 އަހަރުގައި ގަދަހުމެއް އައިސްފައި މަންމަ ނިޔާވެއްޖެއެވެ. މަންމަ ނިޔާވުމުން ހިތަށް އެރިއެވެ. "އަޅެ އެހައިކުރިން މަންމައަށް މަންމަ މަރުވާން ގާތްވެއްޖެކަން އެނގުނީބާވައެވެ! ނޫނީ އަންހެންދަރިއަކު ހުރުމުން ކުރިއާލައި ކަންކަން ކުރަންވީ ގޮތް ދަސްކޮށްދިނީ ބާވައެވެ!" 
ކޮންމެއަކަސް މަންމަ ނިޔާވެ އަހަރެއްހައިދުވަސްވީތަނާ ބައްޕަ ދޮންމަންމައަކު ގެއަށް ގެނެސްފިއެވެ. އެކަމާ ބައްޕަ ކުށްވެރިއެއްވެސް ނުކުރަމެވެ. ސަބަބަކީ ބައްޕަގެ ޢުމުރުން އެއިރު އަދިކިރިޔާ 45 އަހަރެވެ. އެހެންވީމާ އަންތބަކު ބޭނުންވާނެކަން ޤަބޫލުކުރެވޭތީއެވެ. 
ފުރަތަމަކޮޅު ދޮންމަންމަ ވަރަށް ރަނގަޅެވެ. ކަންތައްތައްކުރީ ވަރަށް ހެޔޮކޮށެވެ. 2 އަހަރެއްހައި ދުވަސް ފާއިތުވިފަހުންވެސް ދޮންމަންމަގެ ބޭރުފުށުގެ ޢަމަލުތައް ފެންނަނީ ވަރަށް ރަނގަޅަށެވެ. ނަމަވެސް އަޅުގަނޑު އޯލެވެލް ހަދައި ނިމުނުތަނާހެން ދޮންމަންމަގެ ކޮއްކޮއަކާއި އަޅުގަނޑާއި ގުޅުވަން މަސައްކަތް ފެށުމުން ކަންބޮޑުވިއެވެ. 
މަންމަ ނިޔާވިއިރުވެސް ގިނަ ރޭރޭ އަޅުގަނޑު ދަމުނަމާދަށް ހޭލައްވައެވެ. މަންމަ ގޮވީމާ ނުހޭލެވިއްޖެ ރެއަކު ގަދަކަމުން ހޭލައްވާކަށް ނުއުޅެއެވެ. ނަމަވެސް އަނެއް ދުވަހު ވަރަށް ނަޞޭޙަތްދޭނެއެވެ. މަންމަ ނެތް ދުވަހަކުން ހޭލައްވާނެ މީހަކު ނުހުންނާނެކަމަށާއި ހުރިހާ ކަމަކަށްވުރެ ދަމުނަމާދަށް އިސްކަންދިނުމަށް ނަޞޭޙަތްތެރިވެއެވެ. އެހެންވެ މަންމަ ނިޔާވުމާއިއެކު އެ ވަޞިއްޔަތުގައި ހިފަހައްޓަން ވަރަށް މަސައްކަތްކުރީމެވެ. 
ދޮންމަންމަގެ އެޖެންޑާއަކީ ދޮންމަންމައަކު ޢަމަލުކޮށްފާނެ ގޮތްކަމަށްބުނެ މަންމަ ވަރަށް ގިނައިން ވާހަކަތައް ކިޔައިދިން ޙާލަތެކެވެ. އެހެންވެ އަޅުގަނޑުހުރީ ވަރަށް ބޮޑަށް ހޭލުންތެރިވެގެންނެވެ. ދޮންމަންމަ އެކަންތައްގަނޑު ހިންގުވަން އުޅެނީ ބައްޕަ ގޭގައި ނުއުޅޭ ވަޤުތުތަކުގައެވެ. ބައްޕަގާތުގައި އެވާހަކަ ދެއްކުމުން ބައްޕައަށް ޤަބޫލެއް ނުކުރެވެއެވެ. ބައްޕަ ހީކުރަނީ އަޅުގަނޑު ދޮންމަންމައަށް ޙަސަދަވެރިވަނީކަމަށެވެ. އެހެންވެ ފަހުން އެވާހަކައެއް ނުދައްކަމެވެ. 
ދޮންމަންމަ އަޅުގަނޑާއިމެދު ރާވާ ކަންކަން އަޅުގަނޑަށް ހުވަފެނުން ފެނެއެވެ. ހުވަފެނުން ފެންނަ ކަންކަން ހަމައެގޮތަށް ލޮލަށްވެސް ފެނެއެވެ. އެހެންވެ ދަމުނަމާދުކުރުމުގަ ގިނަ ވަޤުތު ހޭދަކުރަންފެށީމެވެ. 
ދޮންމަންމަ ކާންދޭން އުޅޭ ފޮނިކާއެއްޗެތި އަޅުގަނޑު ނުކާތީ ފަހުން ހަދާގޮތަކީ ބައްޕަ އިންދައި ގެނެސްދެނީއެވެ. ދެމީހުންނަށް ގެންނާނީ 2 ތަށީގައެވެ. ނުކައިފިނަމަ ބައްޕަ ރުޅިއަންނާތީ ކާން މަޖުބޫރުވެއެވެ. އެހެންވެ މިކެވެނީ ސިޙުރުކަން އެނހުރެވެސް ކާން މަޖުބޫރުވެއެވެ. ކަނީ ﷲ އަށް ވަކީލްކުރުމާއިއެކު ޞިޙުރުން ސަލާމަތްކުރެއްވެވުން އެދި ދުޢާކުރަމުންނެވެ. 
އަޅުގަނޑު ކިޔަވައި ނިމި ވަޒީފާއަކަށް ވަދެ ވަޒީފާގައި އުޅެމުން ބައްދަލުވި ވަރަށް ތަޤްވާވެރި ޒުވާނަކާއި ކައިވެނިކުރަންދެންވެސް ދޮންމަންމަ އެކުޅިގަނޑު ކުޅުނެވެ. ނަމަވެސް ﷲ ގެ ރަޙްމަތްފުޅުން އެހެދި އެއްވެސް ސިޙުރެއް އަޅުގަނޑަކަށް ނުޖެހުނެވެ. 
ކައިވެނިކުރެވުމުން ފިރިމީހާގެ ގެއަށް ބަދަލުވާން އުޅުނުއިރު އެކަމަށް ބައްޕަ ދެކޮޅު ހެދުމުން ދޮންމަންމަ އާއި އޭނާގެ ކޮއްކޮ އާއި ފިރިމީހާގެ ޙާޒިރުގައި ބުނީމެވެ. "ބައްޕާއެވެ! އަޅުގަނޑު ބައްޕަދެކެ ވަރަށް ލޯބިވެއެވެ. ނަމަވެސް މިގޭގައި އުޅުން އަޅުގަނޑަށް ފަސޭހައެއް ނޫނެވެ. އަބަދުވެސް ހުންނަންޖެހެނީ ދޮންމަންމަ ހަދައިފާނެ ސިޙުރަކަށް ބިރުންނެވެ. އެޙާލުގައި އުޅޭތާ 5 އަހަރަށްވުރެ ގިނަވީއެވެ. ބައްޕައަށް ޤަބޫލުނުކުރެވުނު ނަމަވެސް ދޮންމަންމަ އައީ ސިޙުރުހަދަމުންނެވެ. މިވެނި އެވެނި ކަންކަން ދޮންމަންމަ ކުރިއެވެ. ދޮންމަންމަގެ ކިބައިގައި ތެދުވެރިކަމުގެ އަސަރެއްވެސް ހުރިނަމަ މިކަންކަން ދޮގެއް ނުކުރާނެއެވެ." 
ދޮންމަންމަ އެހައި ސިއްރުން ކުރި ކަންކަން އަޅުގަނޑަށް އެނގުމުން ދޮންމަންމައަށް ލިބުނީ ވަރަށް ބޮޑު ޙައިރާންކަމެކެވެ. ޤަޞްދުގައިކަމެއް ބޭއިޚްތިޔާރުގައިކަމެއް ބުނާކަށް ނުއެނގެއެވެ. ތުރުތުރު އަޅާވަރުން ވާހަކަދައްކަން އުޅެއުޅެ ވާހަކައެއް ނުދެއްކުނެވެ. ބުނާއެއްޗެއް ސާފުވާނެގޮތަކަށް ނުބުނެވުނެވެ. ލޮލުން ފެންބާލަމުން ދެއްކި ވާހަކަތަކުން ސާފުވީ ހަމައެކަނި "ދޮންމަންމައަށް މާފުކުރާށެވެ!" ބުނި ތަންކޮޅެވެ. 
އެއިރު ބައްޕައަށްވެސް ރޮވެއެވެ. ރޮމުން ބައްޕަބުނީ ދެމަފިރިން ކޮޓަރިއަށް ވަނުމަށެވެ. އެހެން ބުނުމުން ކުޑައިރު ފަދައިން ބަސްއަހައިގެން ކޮޓަރިއަށް ވަނީއެވެ. ފަތިސްނަމާދުކޮށްގެން ނުކުތްއިރު އާދައިގެމަތިން ބައްޕަ ކިޔަވަން އިނެވެ. އަޅުގަނޑު ފެނުމުން ގެންގޮސް ގާތުގައި ބައިންދާފައި ބުނީ ދޮންމަންމަ ގެއިން ފޮނުވާލައިފިން ކަމަށާއި ބައްޕަ އެކަނިކޮށްފައި ގެއިން އަޅުގަނޑު ނުދިއުމަށެވެ. ބައްޕައަށް ކުރިން ޤަބޫލުނުކުރެވުނުކަމަށްޓަކައި މާފުކުރުމަށެވެ. 
އަޅުގަނޑު ބައްޕައަށް މާފުކުރީމެވެ. ދުވަސްކޮޅެއް ފަހުން ބައްޕަ ބަލަހައްޓައިގެން އުޅޭނެ ހެޔޮލަފާ އަންހެނަކު ހޯދައި ކައިވެނިވެސް ކުރުވީމެވެ. ދިރިއުޅެމުން މިދަނީ ހަމަ ދޮންމަންމައަކާއިއެކުގައެވެ. ނަމަވެސް މިހާރުގެ ދޮންމަންމައަކީ ވަރަށް ޚުލްޤް ރަނގަޅު އަންހެނަކަށްވުމުން ކަންބޮޑުވެގެން އުޅޭކަށް ނުޖެހެއެވެ. އަޅުގަނޑު އޮފީހަށްދާ ވަގުތުތަކުގައި ދަރިންވެސް ބަލައިދެއެވެ. އެކުދިން ދެކެވެސް ވަރަށް ލޯބިވެއެވެ. 
މިއަދުނޫހުގައި ސިޙުރާއި ބެހޭ ގޮތުން ލިޔާ ލިޔުންތައް ކިޔާފައި އަޅުގަނޑު އަމިއްލައަށް ތަޖުރިބާކުރި ކަންކަން މިކިޔައިދިނީ އެންމެންނަށް ފިލާވަޅަކަށެވެ. ދޮންމަންމަ ހަދަމުން ދިއަ ޞިޙޫރުތަކުން ސަލާމަތްވާން ވަރަށް ގިނަ މަސައްކަތްކުރީމެވެ. އެއިގެ ތެރެއިން އެއްކަމަކީ ކިޔެވޭ ގޮތަށް ހުރިނަމަ ކޮންމެ ދުވަހަކުވެސް ފަތިސްނަމާދުކޮށްގެން ބަޤަރާ ސޫރަތް ކިޔެވުމެވެ. އެކަމަށް ހޭދަވަނީ ގިނަވެގެން ގަޑިއެއްހައިއިރެވެ. ޢާންމުކޮށް ކުރަން ފެށުމުން އެކަމަށް ހިތްޖެހި އެކަން ނުކޮށް އެހެންކަމެއް ކުރާހިތްވެސް ނުވެއެވެ. 
އަޅުގަނޑުގެ މިވާހަކައިން މިއަދުނޫހުގެ ކިޔުންތެރިންނަށް ފައިދާއެއް ކުރާނެ ކަމަށް އުންމީދުކުރަމެވެ. އަދި ޢިބްރަތަކަށްވާނެ ކަމަށްވެސް އުންމީދުކުރަމެވެ.
 
- އަޒްލީނާ / މިއަދުނޫހުގެ ކިޔުންތެރިއެއް