އެމެރިކާ އާއި އިޒްރޭލް ގުޅިގެން އީރާނާ ދެކޮޅަށް ކުރާ ހަނގުރާމަ ފުޅާވެ، ހޮރްމޫޒް ކަނޑުއޮޅި ހުރަސްކޮށް ބޯޓުތައް ދަތުރުކުރުމުގެ ބިރު ބޮޑުވެ، ތެލުގެ އަގު ތިން ވަނަ ދުވަހަށް އުފުލިއްޖެ އެވެ.
ރޮއިޓާސް ނިއުސް އޭޖެންސީން ބުނި ގޮތުގައި، މިއަދާ ހަމައަށް ބްރެންޓް ކްރޫޑް ފީފާއެއްގެ އަގުން ވަނީ 1.70 ޑޮލަރު ނުވަތަ %2.2 އުފުލިފަ އެވެ.
އިއްޔެގެ ނިޔަލަށް ތެޔޮ ފީފާއެއްގެ އަގު ވަނީ 82.37 ޑޮލަރަށް އަރާފަ އެވެ. މިއީ މިދިޔަ އަހަރުގެ ޖެނުއަރީ މަހުން ފެށިގެން ތެލުގެ އަގުތައް އެންމެ މައްޗަށް އެރި ފަހަރެވެ.
"އަވަހަށް ހަނގުރާމަ ހުއްޓިދާނެ ކަމުގެ ކޮޅުމަތި ނުފެންނާތީ އަދި ހޮރްމޫޒް ކަނޑުއޮޅި ވަރަށް ބޮޑަށް ބަންދުވެ، އީރާނުން އެ ސަރަހައްދުގެ ހަކަތައިގެ އިންފްރާސްޓްރަކްޗާއަށް އަމާޒު ހިފާފައިވާތީ އަދި ހަމަނުޖެހުން ދިގު މުއްދަތަކަށް ދެމިގެންދާ ވަރަކަށް އޭގެ ސަބަބުން އިތުރު ރިސްކްތައް އޮންނާނެ،" މާކެޓް ދިރާސާ ކުރައްވާ، އައިޖީ މާކެޓް އެނަލިސްޓް ޓޯނީ ސައިކަމޯއާ ރޮއިޓާސްއަށް ވިދާޅުވި އެވެ.