މާތްﷲގެ އިރާދަފުޅާއެކު ހުޅުމާލޭގެ ދެވަނަ ފިޔަވަހީގައި ގާއިމްކޮށްފައިވާ 132 ކޭ.ވީ. ގެ ހައިވޯލްޓޭޖް ސަބްސްޓޭޝަން ގްރޭޓާމާލެ އިންޓަކަނެކްޝަން ގްރިޑާއި ގުޅާލުމަށް ކުރި މަސައްކަތް މިއަދުވަނީ ކާމިޔާބުކަމާއިއެކު ނިންމާލެވިފަ އެވެ.
މި މަސައްކަތް ކުރިއަށްގެންދިއުމަށްޓަކައި މާލޭގެ 10 ސަރަހައްދަކުން ކަރަންޓުގެ ހިދުމަތް މެދުކަނޑާލަންޖެހޭނެ ކަމަށް ކުރިން އަންދާޒާ ކުރެވުނު ނަމަވެސް، މޫސުން ތަންދިނުމާއެކު މާލޭގެ 2 ސަރަހައްދަކުން އެއްގަޑިއިރަށްވުރެވެސް މަދު ވަގުތު ކޮޅަކަށް ކަރަންޓުގެ ހިދުމަތް މެދުކަނޑައިގެން މި މަސައްކަތް ވަނީ ނިންމާލެވިފައެވެ. 
ސްޓެލްކޯއިން ބުނެފައިވަނީ އަދިވެސ ބައެއް މަސައްކަތްތައް ކުރަން އެބަހުރިކަމަށާއި އެކަންކަން ކުރަން ތައްޔާރުވުމުން އެކަމުގެ މަޢުލޫމާތު ހާމަކުރާނެ ކަމަށެވެ. އަދި މިއަދު ކުރި މަސައްކަތް މިހާ ކާމިޔާބުކަމާއިއެކު ނިންމައިލެވުނީ ސްޓެލްކޯގެ މުވައްޒިފުންނާއި ކޮންޓްރެކްޓަރުންގެ ވަރަށް ބުރަ މަސައްކަތުން ކަމަށެވެ.
"މިކުންފުނީގެ ހިދުމަތް އިތުރަށްފުޅާކޮށް، ފުރިހަމަ ކުރުމަށްޓަކައި ކުރެވޭ މިފަދަ މަސައްކަތްތަކުގައި ކަސްޓަމަރުންގެ ފަރާތުން އަބަދުވެސް ލިބެމުން އަންނަ އެއްބާރުލުމަށް ޝުކުރު ދަންނަވަން!"