އަންހެނުންނަކީ އިންސާނުންކަމަށް އަފްޣާނިސްތާނުގެ ތާލިބާނުން ނުދެކޭކަމަށް ނޯބެލް ޕީސް އެވޯޑް ހާސިލް ކުރައްވާފައިވާ އިންސާނީ ހައްގުތަކަށް ވަކާލާތު ކުރާ ޕާކިސްތާނުގެ އެކްޓިވިސްޓް މަލާލާ ޔޫސުފްޒައި ވިދާޅުވެއްޖެއެވެ.
އިސްލާމީ ޤައުމުތަކުގައި އަންހެންކުދިންގެ ތަޢުލީމާ ބެހޭގޮތުން ޕާކިސްތާނުން ބޭއްވި ބައިނަލްއަޤްވާމީ ބައްދަލުވުމެއްގައި ވާހަކަ ދައްކަވަމުން މަލާލާ ވަނީ އަފްޣާނިސްތާނުގައި ތާލިބާން ސަރުކާރުން އަންހެނުންނާއި އަންހެން ކުދިންނާއި މެދު ހިންގަމުންދާ ޢަމަލުތަކާ ދެކޮޅަށް ނުކުތުމަށް މުސްލިމް ލީޑަރުންނަށް ގޮވާލައްވާފައެވެ.
މަލާލާ ވިދާޅުވީ، އަންހެނުންނާއި އަންހެން ކުދިންނަށް ތަޢުލީމާއި ވަޒީފާގެ ފުރުޞަތު ނުދިނުން ފަދަ ސިޔާސަތުތަކަކީ އިސްލާމް ދީނާއި ގުޅުމެއް ނެތް ސިޔާސަތުތަކެއް ކަމަށާއި، އަންހެނުންނަކީ އިންސާނުން ކަމުގައި ތާލިބާނުން ނުދެކޭކަމަށެވެ.
Advertisement
2012 ވަނަ އަހަރު އުމުރުން 15 އަހަރުގައި އަންހެން ކުދިންގެ ތަޢުލީމާއި އެއްކޮޅަށް ވަކާލާތު ކުރުމާއި ގުޅިގެން ތާލިބާނަށް ނިސްބަތްވާ ހަނގުރާމަވެރިއެއްގެ އަމާޒަކަށްވެ، ބޮލަށް ވަޒަން އަރައި ވަރަށް ބޮޑެތި އަނިޔާތަކެއް ލިބުނު މަލާލާ ވިދާޅުވީ، ތާލިބާން ސަރުކާރުން އަނެއްކާވެސް ޖިންސީ ތަފާތުކުރުމުގެ ނިޒާމެއް އުފައްދާފައިވާ ކަމަށެވެ.
މިގޮތުން މަލާލާ ވަނީ އެމީހުންގެ ޤާނޫނުތަކާ ޚިލާފުވާން ކެރޭ އަންހެނުންނާއި އަންހެން ކުދިން ހައްޔަރުކޮށް އަނިޔާކުރަމުންދާކަމަށާއި، މީހުންގެ ކުށްތައް ސަގާފަތާއި ދީނީ ކަމަކަށް ހަދާކަމަށް ތުހުމަތުކުރައްވައި، އެއީ އިސްލާމް ދީން ތަމްސީލް ކުރާކަންކަން ނޫންކަމަށް ވިދާޅުވެފައެވެ. 
މުސްލިމް އަޣުލަބިއްޔަތު އޮތް ޤައުމުތަކުގެ އެތައް ވަޒީރުންނަކާއި ޢިލްމުވެރިން ހިމެނޭހެން އިސްލާމީ އެއްބައިވަންތަކަމުގެ ޖަމްޢިއްޔާ (އޯއައިސީ)، ޕާކިސްތާން ސަރުކާރު އަދި މުސްލިމް ވޯލްޑް ލީގުން ހިންގި މި ބައްދަލުވުމަށް ތާލިބާން ސަރުކާރުގެ ލީޑަރުންނަށް ދަޢުވަތު ދެވުނު ނަމަވެސް އެމީހުން ބައިވެރިވެފައެއްނުވެއެވެ.
މިކަމާއި ގުޅޭގޮތުން މީގެ ކުރިން ތާލިބާނު ސަރުކާރުން ބުނި ގޮތުގައި، އަފްޣާން ސަގާފަތާއި އިސްލާމީ ޝަރީޢަތުގެ އެމީހުންގެ މާނަކުރުމާ އެއްގޮތްވާ ގޮތުގެމަތިން އަންހެނުންގެ ޙައްޤުތަކަށް އިޙްތިރާމްކުރާ ކަމަށެވެ.
މިހާރު އަފްޣާނިސްތާނަކީ ދުނިޔޭގައި އަންހެނުންނާއި އަންހެން ކުދިންނަށް ސާނަވީ އަދި މަތީ ތަޢުލީމު ހޯދުން މަނާކޮށްފައިވާ ހަމައެކަނި ޤައުމަށްވާއިރު، މިދިޔަ އަހަރުގެ ޑިސެންބަރު މަހު ތާލިބާނުގެ ސަރުކާރުން ވަނީ އެގައުމުގެ އަންހެނުންނަށް މިޑްވައިފުންނާއި ނަރުހުންގެ ގޮތުގައި ތަމްރީނުވުންވެސް ވަނީ މަނާކުރެވިފައެވެ.