ބިދޭސީއަކު ހިންގަމުން ގެންދިޔަ ވިޔަފާރިއެއް އިމިގްރޭޝަނާއި ފުލުހުން ހިމެނޭ ޓާސްކް ފޯސް އިން ރޭ ރެއިޑްކޮށް ބިދޭސީއަކު އިމިގްރޭޝަންގެ ބަންދަށް ގެންގޮސްފިއެވެ.
އިމިގްރޭޝަނުން ބުނީ ގަވާއިދާ ހިލާފަށް ވިޔަފާރި ކުރަމުންދާ ބިދޭސީން ހޯދުމަށް ކުރަމުންދާ މަސައްކަތުގެ ތެރެއިން، ޓާސްކުފޯހުން ރޭ ކުރިއަށްގެންދިއަ ރެއިޑް އޮޕަރޭޝަނެއްގައި ވަނީ މާލެ ސަރަހައްދުގައި ބިދޭސީން ވިޔަފާރި ކުރަމުންދިއަ ތަނެއް ބަލައި ފާސްކޮށްފައި ކަމަށެވެ.
އެތަނުން ސައްހަ ވިސާއެއް ނެތި ގަވާއިދާ ހިލާފަށް މަސައްކަތް ކުރަމުންދިއަ ބިދޭސީއެއް އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށް އިމިގްރޭޝަނުން ބުންޏެވެ. ނަމަވެސް އިމިގްރޭޝަންގެ ބަންދަށް ގެންދިޔައީ ކޮން ގައުމެއްގެ މީހެއް ކަމެއް އިމިގްރޭޝަނުން ނުބުނެއެވެ.
އިމިގްރޭޝަނުން ފާއިތުވި ހަފްތާއެއްހައި ދުވަސް ތެރޭގައި ވެސް ފަންސާހަކަށް ބިދޭސީން ވަނީ ހައްޔަރުކޮށްފައެވެ. އޭގެތެރޭގައި އިއްޔެ ރޭ ފަތިހުން ފެށިގެން ހީނާމާގެ ސަރަހައްދުގައި ހިންގި އޮޕަރޭޝަނެއްގައި ހައްޔަރުކުރި 17 ބިދޭސީއަކު ވެސް ހިމެނެއެވެ.
ފާއިތުވި އަހަރު އިމިގްރޭޝަނުން ވަނީ 5600 ބިދޭސީން ރާއްޖޭން ޑީޕޯޓް ކޮށްލާފައެވެ.