ޒެޑް- ޑީއާރުޕީ ފެކްޝަނުގައި ޑީއާރުޕީގެ ޒައީމް އަދި ކުރީގެ ރައީސް މައުމޫން އަބްދުލްގައްޔޫމް ހަރަކާތްތެރިވެވަޑައިގަންނަވަނީ އަލުން ވެރިކަމަށް ވަޑައިގެންނެވުމަށް ނޫން ކަމަށާއި ޕާޓީ އަށް މި ވަގުތު ކުރިމަތިވެފައިވާ މައްސަލަތަކުން އަރައިގަތުމަށް އެންމެ ގާބިލް ބޭފުޅަކީ އެ މަނިކުފާނު ކަމަށް ވާތީ ކަމަށް ވިލިމާފަންނު ދާއިރާގެ މެމްބަރު އަހުމަދު ނިހާން ބުދަދުވަހު ވިދާޅުވެއްޖެ އެވެ.
ޒެޑް ފެކްޝަނުން ބުދަދުވަހު ހަވީރު ބޭއްވި ނޫސް ކޮންފަރެންސްގައި ނިހާން ވިދާޅުވީ ޒެޑް ޑީއާރުޕީގެ ނަމުގައި ހިންގަމުން އަންނަ ހަރަކާތަކީ ވަކި ގަބީލާއެއް ނޫން ކަމަށާއި އެއީ ވެސް ޑީއާރުޕީގެ ހަރަކާތެއް ކަމަށެވެ.
"ޒައީމް މައުމޫން ކޮންމެހެން ކަންތައްތަކެއް ބޭނުންވެގެން، ކުރިއަށް އޮތް އިލެކްޝަނަށް ކުރިމަތިލައްވާ، މި ޕާޓީ ހިސާރުކޮށް ވަކި ގޮތަކަށް މަސައްކަތްތަކެއް ބައްޓަންކުރައްވާކަށް ނޫން ވަޑައިގަތީކީ. ވަރަށް ސާފުކޮށް އަޅުގަނޑުމެންނަށް އެކަން އޮތީ،" ޑީއާރުޕީގެ ކައުންސިލްގައި ވެސް ހިމެނިވަޑައިގަންނަވާ ނިހާން ވިދާޅުވި އެވެ.
އޭނާ މިހެން ވިދާޅުވި ނަމަވެސް ޑީއާރުޕީން ބުދަދުވަހު ނެރުނު ބަޔާނެއްގައި ބުނެފައި ވަނީ މައުމޫން އިސްވެ ހުންނަވައިގެން އުފައްދަވާފައިވާ ޒެޑް ޑީއާރުޕީ އަކީ މައުމޫން އަލުން ރާއްޖޭގެ ވެރިކަމަށް ވަޑައިގަތުމުގެ ކެމްޕޭން ހަރަކާތެއް ކަމަށެވެ.
"މި ހަރަކާތަކީ އަލްއުސްތާޒް މައުމޫން އަބްދުލް ގައްޔޫމް 25 ޖެނުއަރީ 2010 ވަނަ ދުވަހު ސިޔާސީ މައިދާނުން ވަކިވެ ވަޑައިގަތް ކަމަށް ވިދާޅުވި ނަމަވެސް އަނބުރާ ސިޔާސީ މައިދާނަށް، ދިވެހިރާއްޖޭގެ ވެރިކަމަށް ވަޑައިގަތުމަށްޓަކައި ފަށާފައިވާ ކެމްޕޭނެކެވެ،" ޑީއާރުޕީގެ ބަޔާނުގައިވެ އެވެ.
ނަމަވެސް ނިހާން ވިދާޅުވީ އެ ފެކްޝަނަކީ ވެސް ޑީއާރުޕީގެ ހަރަކާތެއް ކަމަށާއި އެ ހަރަކާތް ފަށަން ޖެހުނީ ޕާޓީގެ ލީޑަރު އަހުމަދު ތަސްމީން އަލީ ތަފާތު އެކި ގޮތް ގޮތަށް ސަރުކާރާ އެކު ޑީލް ހައްދަވަމުން ގެންދަވާތީ އާއި އިދިކޮޅު ޕާޓީގެ ދައުރު އަދާކުރުމަށް ލީޑާޝިޕުން ފަސްޖެހިވަޑައިގެންފައިވާތީ ކަމަށެވެ. އަދި ޕާޓީގެ ހަރަކާތްތައް ހިންގައި ޕާޓީ ހަރުދަނާ ކުރުމުގައި ބައިވެރިވުމަކީ ޕާޓީގެ ކޮންމެ މެންބަރަކަށް ވެސް ލިބިގެންވާ ހައްގެއް ކަމަށް އޭނާ ވިދާޅުވި އެވެ.
"ވަކި އާއިލާއަކަށް ވަކި ގަބީލާއަކަށް ނިސްބަތްވާ ބައެއް ވެސް ނޫން މިކަން މިކުރަނީކީ. އެކަން ތަރުޖަމާކޮށްފި ނަމަ އެ ސިފަ ވަރަށް ރީއްޗަށް ފެންނާނެ،" ނިހާން ވިދާޅުވި އެވެ.
އޭނާ ވިދާޅުވީ ޒެޑް ފެކްޝަންގެ ހަރަކާތުގައި ސީދާ ބައިވެރިވެވަޑައިގަންނަވަނީ މައުމޫންގެ އާއިލާގެ ދެ ބޭފުޅެއް ކަމަށާއި އެއީ އަންހެނުން ގޮފީގެ ރައީސް ދުންޔާ މައުމޫނާއި ޒުވާނުން ގޮފީގެ ނާއިބު ރައީސް ޣައްސާން މައުމޫން ކަމަށެވެ. ނަމަވެސް ކައުންސިލްގައި ތަސްމީން އާއިލާގެ މާ ގިނަ ބޭފުޅުން ހިމެނިވަޑައިގަންނަވާ ކަމަށް އޭނާ ވިދާޅުވި އެވެ.
"އެ ދެ ބޭފުޅުން ހަމައެކަނި ރައީސް މައުމޫންގެ ސީދާ ގުޅުން ހުރި ބޭފުޅަކަށް އަޅުގަނޑުމެންގެ ހަރަކާތުގައި އަދި ކައުންސިލްގައި ހިމެނިވަޑައިގަންނަވަނީ. ޕާޓީގެ ލީޑަރު އަހުމަދު ތަސްމީން އަލީ އާއި އެ މަނިކުފާނުގެ އަނބިކަނބަލުން ވިޝާމް އަލީ އާއި އެ މަނިކުފާނުގެ ކޮއްކޯފުޅު ނާޝިޒް އާއި ކޮއްކޯފުޅުގެ އަނބިކަނބަލުން ރޮޒެއިނާ އާދަމްއާ އެކު ހަތަރު ބޭފުޅުން ވެއްޖެހެން އަޅުގަނޑަށް ހީވަނީ. އަދި ޅިޔަނު (މުހައްމަދު) ސަލީމާ،" ނިހާން ވިދާޅުވި އެވެ.