ހދ. ވައިކަރަދޫ އިންޖީނުގެ އަވަށު މެދުގައި ހުރުމުގެ ސަބަބުން ރައްޔިތުންނަށް އުދަގޫތައް ކުރިމަތިވާކަމަށް ވައިކަރަދޫ ކައުންސިލުން ބުނެފިއެވެ.
ވީނިއުސްއަށް ދެއްވި އިންޓަވިއުއެއްގައި ހދ. ވައިކަރަދޫ ކައުންސިލްގެ ރައީސް އަހްމަދު ނަސީމް ވިދާޅުވީ، އިންޖީނުގެ މީހުން ދިރިއުޅޭ އަވަށު މެދުގައި ހުރުމުން އެސަރަހައްދުގައި ހުރި ގެތަކުގައި ހުންނަ ގަސްގަހާގެއްސައް ދުމުގެ އަސަރު ކުރާކަމަށެވެ. އެގޮތުން ގަސްތަކުގައި އިންޖީނުން އަރާ ކަޅުދުމުގެ އަސަރު ހުންނަ ކަމަށާއި، ގަސްތަކުގައި އަޅާ މޭވާ ބޭނުން ނުކުރެވޭވަރުވެފައި ވާކަމަށެވެ. އަދި ބައެއްގަސްތައް މަރުވާކަމަށެވެ.
ނަސީމް ވިދާޅުވީ އިންޖީނުގެ ހުންނަ ސަރަހައްދުގައި ހުރި ގެތަކުގެ މީހުން އެސަރަހައްދުގައި އުޅެން އުދަގޫވާތީ ގެތަށް ދޫކޮއްފައި މިހާރު ގޮސްފައިވާ ކަމަށެވެ.
މިމައްސަލަ ހައްލުކުރުމަށް ފެނަކައަށް އިންޖީނުގެ އެޅުމަށް ކައުންސިލުން ބިން ދޫކޮށްފައިވާ ކަމަށާއި، ނަމަވެސް ފެނަކައިން އަދި އަމަލީ މަސައްކަތް މިހާތަނަށްވެސް ފެށިފައި ނުވާކަމަށް ނަސީމް ވިދާޅުވިއެވެ.
ނަސީމް ވިދާޅުވީ، ވައިކަރަދޫ އިންޖީނުގެއިން ރަށަށް ބޭނުންވާވަރަށް ކަރަންޓް ފޯރުކޮށްނުދެވޭކަން ފާހަގަ ކުރެވޭ ކަމަށެވެ. އެގޮތުން އިންޖީނުގެ ލޯޑުބޮޑުވެ ދޭތެރެ ދޭތެރެއިން ކަރަންޓް ކެނޑޭ ކަމަށާއި، އެކަމުގެ ސަބަބުން ރައްޔިތުން ބޭނުންކުރާ އިލެކްޓްރިކް ސާމާނުތައް ހަލާކުވާ މައްސަލައިގައި ކައުންސިލަށް ޝަކުވާ އަންނަ ކަމަށްވެސް ނަސީމް ވިދާޅުވިއެވެ.
މިމައްސަލާގައި ފެނަކައިގެ ބޭފުޅުންނާއި މަޝްވަރާކުރުމުން އިންޖީނަށް ބޭނުންވާ ސްޕެއަރޕާޓް ނުލިބެނީކަމަށް ވިދާޅުވެފައިވާ ކަމަށްވެސް ނަސީމް ވިދާޅުވިއެވެ.
އާބާދީގައި 1855 މީހުން ދިރިއުޅޭ ވައިކަރަދޫއަށް ކަރަންޓް ފޯރުކޮށްދިނުމަށް ބޭނުންކުރަނީ އެންމެ އިންޖީނެއް ކަމަށްވެސް އެރަށު ކައުންސިލުން ބުނެއެވެ.