ކޮވިޑް-19 ބަލީގައި އަނެއްކާވެސް މީހަކު މަރުވެ، މި ބަލީގައި މަރުވި މީހުންގެ އަދަދު 103 އަށް އަހައިފިއެެވެ.
ހެލްތް ޕްރޮޓެކްޝަން އެޖެންސީ އެޗްޕީއޭއިން ބުނީ، ހުޅުމާލޭ މެޑިކަލް ފެސިލިޓީގައި ފަރުވާދެމުންދިޔަ އުމުރުން 79 އަހަރުގެ މީހަކު ރޭ 23:14 ގައި ނިޔާވެފައިވާކަމަށެވެ.
ކޮވިޑްގައި މަރުވާ މީހުންގެ އަދަދު ދުވަހެއް ދުވަހަކަށް އިތުރުވަމުން އަންނައިރު މި ބަލީގައި ރާއްޖެއިން 103 މީހަކު މިހާތަނަށް ނިޔާވެފައިވެއެވެ.
ކޮވިޑް-19ގެ ކޭސްތައްވެސް އިތުރުވެފައިވާއިރު އިއްޔެވެސް ރާއްޖެއިން އިތުރު 1،433 މީހުން ކޮވިޑް-19 އަށް އަލަށް ޕޮޒިޓިވްވެފައިވެއެވެ. އަލަށް ޕޮޒިޓިވްވި މީހުންގެ ތެރެއިން 1،294 މީހަކު ނިސްބަތްވަނީ ގްރޭޓަރ މާލެ ސަރަހައްދަށެވެ. 134 މީހަކު ނިސްބަތްވަނީ އަތޮޅުތެރޭގެ ރަށްތަކަށެވެ. 5 މީހުން ނިސްބަތްވަނީ ރިސޯޓްތަކަށެވެ.
އަލަށް ޕޮޒިޓިވްވި 1،433 މީހުންނާއެކު، މިހާތަނަށް ކޮވިޑް-19 އަށް ރާއްޖެއިން ޕޮޒިޓިވްވި ކަމަށް ރެކޯޑު ކުރެވުނު މީހުންގެ ޖުމްލަ އަދަދުވަނީ 45،956 އަށް އަރާފައެވެ.
އެކްޓިވް ކޭސަސްގެ އަދަދު މިހާރުވަނީ 16،997 ގައެވެ. މީގެތެރެއިން 268 މީހަކަށް ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުން ގެންދާ ކަމަށް އެޗްޕީއޭއިން ބުނެފައި ވެއެވެ.