މާދަމާ އަލުން ބާއްވާ ރިޔާސީ އިންތިޚާބުގެ ފައިނަލް ވޯޓާސް ލިސްޓުގެ ސޮފްޓް ކޮޕީ އިލެކްޝަންސް ކޮމިޝަނުން ފޮނުވާފައިވާ ކަމަށް ޖުމްހޫރީ ޕާޓީން މިއަދު ބުނެފި އެވެ.ޖޭޕީގެ ރިޔާސީ ކެންޑިޑޭޓް ގާސިމް އިބްރާހީމްގެ މަންދޫބު އުމަރު ނަސީރު ވިދާޅުވީ ސޮފްޓް ކޮޕީ ލިބުނީ މިއަދު ހަވީރު ހަތަރެއް ޖަހާކަންހާއިރު ކަމަށެވެ. އަދި މިހާރު އެ ލިސްޓާއި އިލެކްޝަންސް ކޮމިޝަނުން ކުރިން ފޮނުވި ލިސްޓް އަަޅާ ކިޔަމުންދާ ކަމަށް އޭނާ ވިދާޅުވި އެވެެ."ކުރިން އިލެކްޝަންސް އިން އަޅުގަނޑުމެންނަށް ފޮނުވި ލިސްޓުން ވެސް ފާހަގަވި ދެހާހެއްހާ މައްސަލަ. އަޅުގަނޑުމެންނަށް މި ލިބުނު ފައިނަލް ލިސްޓުގައި އެ މައްސަލަތައް ރަނގަޅު ކޮށްފައިވޭތޯ ބަލާނަން. އެއީ ފުރަތަމަ ކުރަންޖެހޭ ކަންތައް. ދެން މަރުވެފައި ތިބި މީހުންގެ ނަންތައް ހުރިތޯ އާއި ނަންތައް ޑަބަލް ވެފައިވޭތޯ ބަލާނެ،" އުމަރު ވިދާޅުވި އެވެ. އޭނާ ވިދާޅުވި ގޮތުގައި ފައިނަލް ވޯޓާސް ލިސްޓް އަޅާ ކިއުމަކީ ފަސޭހަ ކަމަކަށް ނުވާނެ އެވެ. އަދި އެކަމަށް ވަގުތު ނަގާނެ ކަމަށް އުމަރު ވިދާޅުވި އެވެ. "ކުރިން ފޮނުވި ލިސްޓަށް ވެސް ނެގި ދެ ދުވަހެއް ވަރު. އެހެންވީމާ ވަރަށް ވަގުތު ނަގާނެ ކަމެއް މިއީ،" އުމަރު ވިދާޅުވި އެވެ.އުމަރު މިއަދު މެންދުރު ވިދާޅުވީ މިހާތަނަށް ފައިނަލް ވޯޓާސް ލިސްޓް އިލެކްޝަންސުން ނުދިނުމަކީ އެ ލިސްޓުގައި ޖުމްހޫރީ ޕާޓީން ސޮއިނުކޮށް ލަސްވާ މައިގަނޑު ސަބަބު ކަަމަށެވެ.ފައިނަލް ވޯޓާސް ލިސްޓްގެ ސޮފްޓް ކޮޕީ ލިބުނަސް 73،000 މީހުން ރީރެޖިސްޓްރީ ސައްހަތޯ
ބެލުމަށް އޭގެ ފަސް ޕަސެންޓް ފޯމުގައި ޖަހާފައިވާ އިނގިލީގެ ނިޝާންގެ
ސައްހަކަން ވެސް ބަލަން ޖޭޕީން ބޭނުންވެ އެވެ.އުމަރު ވިދާޅުވީ
ފިންގާޕްރިންޓް ދިމާވޭތޯ ޗެކްކުރަން ބޭނުންވަނީ ފުލުހުންގެ އޮޓަމޭޓެޑް
ފިންގާ ޕްރިންޓްސް ސިސްޓަމްގެ އެހީގައި ކަމަށެވެ. އަދި ހަމައެކަނި ބަލަން
ބޭނުންވަނީ ފުލުހުންގެ އަތުގައި މައުލޫމާތު ހުރި މީހުންގެ އިނގިލީގެ ނިޝާނާ
ފައިނަލް ވޯޓާސް ލިސްޓާ ދިމާވޭތޯ ކަމަށް އޭނާ ވިދާޅުވި އެވެ."އޭގެ
ބޭނުމަކީ ރީރެޖިސްޓްރި ފޯމުތަކުގެ ތެރޭގައި ފޭކް ފޯމުތަކެއް އުޅޭތޯ
ބެލުން. އަޅުގަނޑުމެން ބޭނުންވަނީ ރެންޑަމްކޮށް ފިންގާޕްރިންޓް ބަލަން،"
އުމަރު ވިދާޅުވި އެވެ. "އަޅުގަނޑުމެން ބޭނުމެއް ނުވޭ ރައްޔިތުންގެ ހައްގު
ގެއްލޭ ގޮތަށް ލިސްޓްގައި ސޮއިކުރާކަށް. އެއީ ލިސްޓް ރަނގަޅަށް ނުބަލައި
މިއަދު ވެސް އޭގައި އަޅުގަނޑުމެން ސޮއިކޮށް މާދަމާ އިންތިޚާބު
ބާއްވައިފިއްޔާ މައްސަލައެެއް ދިމާވެއްޖެ ނަމަ އެތައް ބައެއްގެ ހައްގަށް
އުނިކަން އަންނާނެ. ރެޖިސްޓްރީކުރި ތަން ނޫން އެހެން ތަންތަނުގައި
މީހުންގެ ނަން ޖަހާފައި ހުރެދާނެ."ފައިނަލް ވޯޓާސް ލިސްޓުގައި މިހާތަނަށް ސޮއިކުރަމުން ދަނީ އެމްޑީޕީން އެކަންޏެވެ. ޖޭޕީ އާއި ޕީޕީއެމްގެ މައިގަނޑު މައްސަލަ އަކީ އެ ލިސްޓް ސައްހަ ކުރެވޭނެ ގޮތެއް އިލެކްޝަންސް އިން ފަހިކޮށްދީފައި ނެތުމެވެ. މިދިޔަ މަހު ބޭއްވި އިންތިޚާބު ބާތިލުކޮށް ސުޕްރީމް ކޯޓުން ކުރި ހުކުމްގައި
ވަނީ އެންމެ ފަހުގެ ވޯޓާސް ލިސްޓުގައި އިލެކްޝަންސް ކޮމިޝަނާއި
ކެންޑިޑޭޓުން ނުވަތަ ކެންޑިޑޭޓުންގެ މަންދޫބުން ސޮއިކޮށް އިނގިލީގެ ނިޝާން
ޖަހަން ޖެހޭނެ ކަމަށެވެ. އެކަން އެހެން ކުރަނީ އެ ނޫން އެހެން ލިސްޓެއް
އެއްވެސް ދާއިރާއެއްގައި ބޭނުން ނުކުރެވޭނެކަން ކަށަވަރު ކުރުމަށް ކަމަށް
ވެސް ހުކުމްގައިވެ އެވެ.