އާންމު ގޭބިސީތަކުން ކަރަންޓް ބިލް ނުދައްކައިގެން ނަގާ ޖޫރިމަނާ 10ރ. އަށް ވުރެ ބޮޑު ނުކުރާ ގޮތަށް ސްޓެލްކޯ އިން ހަމަޖައްސައިފި އެވެ. އެ ކުންފުނީގެ ޗެއާމަން އަހުމަދު ޝަރީފް މިރޭ "ހަވީރަ"ށް ވިދާޅުވީ އަންނަ އަހަރުން ފެށިގެން އާންމު ގޭބިސީތަކުން 10ރ. އަށް ވުރެ ބޮޑު ޖޫރިމަނާއެއް އަރާ ނަމަ އެއަށް ވުރެ އިތުރަށް ޖޫރިމަނާ ނުނަގާނެ ކަމަށެވެ. ނަމަވެސް ޖޫރިމަނާ އަރާ ވަރު 10ރ. އަށް ވުރެ ކުޑަ ނަމަ، މިހާރެކޭ އެއްގޮތަށް ނުދައްކާ ބިލްގެ ޖުމްލަ އަދަދުގެ ދެ ޕަސެންޓް ޖޫރިމަނާ ކުރެވޭނެ ކަމަށް ވެސް ޝަރީފް ވިދާޅުވި އެވެ. ސްޓެލްކޯއިން މިހާރު ޖޫރިމަނާ ނަގަނީ ނުދައްކާ އޮންނަ ބިލްގެ ޖުމްލަ އަދަދުގެ ދެ ޕަސެންޓެވެ."އޭރުން ބިލްގެ ޖޫރިމަނާ 10ރ. އަށް ވުރެ ބޮޑު ނުވާނެ ކަމުގެ ޔަގީންކަން ލިބޭނެ. އެ އަދަދުގެ ތެރޭގައި ޖޫރިމަނާ ހިފެހެއްޓިގެން ދާނެ. ބައެއް ގޭގެ އެބަހުރި ވަރަށް ބޮޑަށް ޖޫރިމަނާ އަރާފައި ހުރި. މި ބަދަލުގެ ސަބަބުން އެ ފައިސާ ދެއްކުމަށް ފަސޭހަވެގެން ދާނެ،" ޝަރީފް ވިދާޅުވި އެވެ. އޭނާ ވިދާޅުވި ގޮތުގައި އާންމު ގޭބިސީތައް ޖޫރިމަނާ ކުރުމުގައި ލުއިދިން ނަމަވެސް ކުންފުނިތަކާއި ސަރުކާރުގެ އޮފީސްތަކުން ނުދައްކާ ބިލްތަކަށް މިހާރު ވެސް ނަގާ އުސޫލުން ޖޫރިމަނާ ނަގާނެ އެވެ.  ޝަރީފް ވިދާޅުވީ އެގޮތަށް ހަމަޖެއްސީ އެ ކުންފުނިން ދޭ ހިދުމަތްތަކުން އާންމުންނަށް ލުއިތަކެއް ދިނުމަށް ކަމަށެވެ. މި ސަރުކާރުގެ 100 ދުވަހުގެ ތެރޭގައި އިއާދަކުރަނިވި ހަކަތަ އުފެއްދުމުގެ ޕްރޮގްރާމްތަކަށް އިސްކަން ދޭނެ ކަމަށް ވެސް އޭނާ ވިދާޅުވި އެވެ. އަދި ޝަރީފް ވިދާޅުވި ގޮތުގައި ކަރަންޓްގެ އަގު ހެޔޮކޮށް ޑީސަލަށް ބަރޯސާވުން ކުޑަކުުރުމަށް މަސައްކަތް ކުރާނެ އެވެ. "މި ކުންފުނީގެ ހިދުމަތްތަކުގެ އަގު ހެޔޮކޮށް ރައްޔިތުންނަށް ލުއިފަސޭހަ، ފެންވަރު ރަނގަޅު ހިދުމަތެއް ފޯރުކޮށްދިނުމަށް އަޅުގަނޑުމެން ކުރިއަށް މި އޮތް 100 ދުވަހުގައި މަސައްކަތް ކުރާނެ،" ޝަރީފް ވިދާޅުވި އެވެ.