އެމެރިކާގެ އަސްކަރިއްޔާގެ އިސް މަގާމުތަކަށް ގެންނަ ބޮޑެތި ބަދަލުތަކުގެ ތެރެއިން، ނޭވީ ސެކްރެޓަރީ ޖޯން ފީލަން "ވަގުތުން" މަގާމުން ވަކިކޮށްފި ކަމަށް ޕެންޓަގަން އިން ބުދަ ދުވަހު އިއުލާނުކޮށްފިއެވެ. މި ބަދަލަކީ ޑޮނަލްޑް ޓްރަމްޕް އަލުން ވެރިކަމާ ހަވާލުވުމަށްފަހު، އަސްކަރިއްޔާގެ އިސް ސަފު ބަދަލުކުރުމަށް ހިންގަމުންދާ ފުޅާ އޮޕަރޭޝަނެއްގެ ދަށުން ނިންމި ނިންމުމެއްކަމަށް ރިޕޯޓްތައް ބުނެއެވެ.
ޕެންޓަގަންގެ ތަރުޖަމާނު ޝޯން ޕާނެލް "އެކްސް" ގައި އާންމުކުރި ބަޔާނެއްގައި ބުނީ، ފީލަން ވަގުތުން މަގާމުން ވަކިވާނެ ކަމަށާއި، އޭނާގެ ބަދަލުގައި ވަގުތީ ގޮތުން އެ މަގާމާ ހަވާލުވާނީ އަންޑަސެކްރެޓަރީ ހަންގް ކާއޯ ކަމަށެވެ. ނަމަވެސް، މިހާ ކުއްލި ގޮތަކަށް އޭނާ މަގާމުން ވަކިކުރި އެއްވެސް ސަބަބެއް ޕެންޓަގަން އިން ހާމައެއް ނުކުރެއެވެ.
މި ބަދަލު އައިސްފައި މިވަނީ، އެމެރިކާ އާއި އީރާނާ ދެމެދު ކުރަމުންދާ ހަނގުރާމަ ވަރުގަދަވެފައިވާ ދަނޑިވަޅެއްގައެވެ. އަދި މި މަހުގެ ކުރީކޮޅު އެމެރިކާ ސިފައިންގެ އެންމެ އިސް އޮފިސަރު ޖެނެރަލް ރޭންޑީ ޖޯޖާއި އިތުރު ދެ ސީނިއާ އޮފިސަރަކު ވެސް ވަނީ މަގާމުން ވަކިކޮށްފައެވެ.
ޓްރަމްޕް ވެރިކަމާ ހަވާލުވި ފަހުން އަސްކަރިއްޔާގެ އިސްވެރިން މަގާމުން ވަކިކުރުމުގެ ސިލްސިލާއެއް ވަނީ ފަށައިފައެވެ. އެގޮތުން 2025 ފެބްރުއަރީގައި ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޗާލްސް "ސީކިއު" ބްރައުން ވެސް ވަނީ އެއްވެސް ސަބަބެއް ނެތި މަގާމުން ދުރުކޮށްފައެވެ. މީގެ އިތުރުން ނޭވީ، ކޯސްޓް ގާޑް، އެންއެސްއޭ (NSA) އަދި އެއާ ފޯސްގެ އިސް ގިނަ އޮފިސަރުންތަކެއް ވެސް ވަނީ މަގާމުން ވަކިކޮށް ނުވަތަ ރިޓަޔާކުރަން މަޖުބޫރުކޮށްފައެވެ.
ޑިފެންސް ސެކްރެޓަރީ ޕީޓް ހެގްސެތު ބުނާ ގޮތުގައި، ޓްރަމްޕް ކުރަމުންދާ ކަމަކީ އޭނާ ބޭނުންވާ ފަދަ ލީޑަރުން ހޮވުމެވެ. ނަމަވެސް، ޑިމޮކްރެޓިކް ޕާޓީގެ މެންބަރުން ދަނީ މިކަމުގެ ސަބަބުން އަސްކަރިއްޔާ ސިޔާސީ ވެދާނެތީ ކަންބޮޑުވުން ފާޅުކުރަމުންނެވެ. މި ބަދަލުތަކުގެ ތެރެއިން، ޕެންޓަގަންގެ އިސްވެރިޔާ ވަނީ އަސްކަރިއްޔާގެ ފޯ-ސްޓާ ޖެނެރަލުންގެ އަދަދު 20 ޕަސެންޓް މަދުކުރުމަށް ވެސް އަމުރުކޮށްފައެވެ.
ޓްރަމްޕްގެ މި ނިންމުންތަކަކީ އަސްކަރިއްޔާގެ ހިންގުން ހަރުދަނާކޮށް، ހަރަދު ކުޑަކުރުމުގެ ނަމުގައި ކުރިއަށްގެންދާ "ބޮޑު ސާފުކުރުމެއް" ކަމަށް މަސްރަހު ދިރާސާކުރާ ފަރާތްތަކުން ބުނެއެވެ. މި ސިޔާސަތުގެ މައިގަނޑު ބޭނުމަކީ އަސްކަރިއްޔާގެ މަތީ ފަޑީގައި ތިބި، ކުރީގެ ސަރުކާރުތަކުގެ ސިޔާސަތުތަކަށް ތާއީދުކުރާ އޮފިސަރުން ދުރުކޮށް، ޓްރަމްޕްގެ ފިކުރަށާއި އަމުރުތަކަށް ފަސްޖެހުމެއް ނެތި ކިޔަމަންވާނެ ލީޑަރުން އިސްކުރުމެވެ.