އެމެރިކާގެ ރައީސް ޑޮނަލްޑް ޓްރަމްޕް އީރާނާ ދެކޮޅަށް އިތުރު އަސްކަރީ ބާރުގެ ބޭނުން ކުރުން ހުއްޓުވުމަށް ހުށަހެޅި ގަރާރު އެމެރިކާގެ ސެނެޓުން ބަލައިނުގަނެ ބޭރުކޮށްލައިފި އެވެ.
މިއީ އެ ހަނގުރާމަ ހުއްޓުމަށް ޑިމޮކްރޭޓުން ކުރާ މަސައްކަތަށް ކުރިމަތިވި ގޮންޖެހުމެކެވެ.
އެ ގަރާރު ބޭރުކޮށްލީ 53 ވޯޓު، 47 ވޯޓުގެ ތަފާތަކުންނެވެ. މިއީ އެ ހަނގުރާމަ ހުއްޓާލުމަށް ބޭނުންވާ ސާދާ އަގުލަބިއްޔަތު ނުލިބުމެވެ.
ޕެންސިލްވޭނިއާގެ ޑިމޮކްރެޓިކް ސެނެޓަރު ޖޯން ފެޓާމަން ވެސް ވަނީ ރިޕަބްލިކަން ޕާޓީގެ ގިނަ މެމްބަރުންނާ އެއްކޮށް އެ ގަރާރު ބާތިލުކޮށްލުމަށް ވޯޓު ދެއްވައިފަ އެވެ. އަދި ކެންޓަކީގެ ރިޕަބްލިކަން ސެނެޓަރު ރޭންޑް ޕޯލް އަކީ އެ ގަރާރު އޮތް ގޮތަށް ފާސް ކުރުމަށް ވޯޓުދެއްވި އެ ޕާޓީގެ ހަމައެކަނި މެންބަރެވެ.
ވާޖީނިއާގެ ސެނެޓަރު ޓިމް ކޭން  ހުށަހެޅުއްވި އެ ގަރާރުގެ މަގްސަދަކީ އީރާނާ ދެކޮޅަށް ހިންގަމުންދާ ހަނގުރާމަތަކުން އެމެރިކާގެ އަސްކަރިއްޔާ ބޭރުކުރުމަށް މަގުފަހި ކުރުމެވެ.
އެ ހަނގުރާމަ ކުރަނީ ކޮންގްރެސްގެ ހުއްދަ ހޯދުމަކާ ނުލަ އެވެ.
އީރާނު ހަނގުރާމަ އިން ހާސިލު ކުރަން ބޭނުންވާ މަގުސަދަކީ ކޮބައިކަން ނޭނގޭތީ  ޑިމޮކްރަޓުން އަންނަނީ ކަންބޮޑުވުން ފާޅުކުރަމުންނެވެ.
ސެނެޓުގެ މައިނޯރިޓީ ލީޑަރު ޗަކް ޝޫމާ ވިދާޅުވީ ކޮންމެ ދުވަހަކު ލަނޑުދަނޑިތައް ބަދަލުވަމުންދާ ކަމަށާއި ކޮންމެ ދުވަހަކު ތަފާތު ޖަވާބުތައްދޭ ކަމަށެވެ. 
ކޮންގްރެސް އިން އެފަދަ ގަރާރެއް ފާސްކުރިޔަސް ރައީސް ޓްރަމްޕަށް އެ ގަރާރު ވީޓޯ ކުރެވިދާނެ އެވެ. އެފަދަ ނިންމުމެއް ބާތިލު ކުރުމަށް ދެ ޗެމްބަރުގެ ތިން ބައިކުޅަ ދެބައި އަގުލަބިއްޔަތު ބޭނުންވާނެ އެވެ.