ވަކި އަތޮޅުތަކެއް ބާކީކޮށް, ކައުންސިލްތަކުގެ މަޝްވަރާވެސް ހޯދުމަކާނުލާ އާބަން ސެންޓަރުތައް ކަނޑައަޅާ, ރައީސް މުއިއްޒު އެމަނިކުފާނުގެ ޚުދުމުޚުތާރުކަން މިއަދު ރައްޔިތުންނަށް ދައްކާލައިފިއެވެ.
ސަރުކާރުގެ އުމްރާނީ ތަރައްގީގެ ސަރަހައްދީ ތަސައްވުރުގެ ދަށުން އާބަން ސެންޓަރު ތަރައްޤީކުރުމުގައި ދެކުނުގެ އަތޮޅުތައް އެއްކިބާ ކުރުމަށް, މި ސަރުކާރުން އެކުލަވާލާ އާބަން ސެންޓަރުތައް މިއަދުވަނީ އިއުލާން ކޮށްފައެވެ.
އެގޮތުން ރައީސް ޑރ. މުހައްމަދު މުއިއްޒު އާބަން ސެންޓަރުތަކުގެ ގޮތުގައި ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ އަދި ލ. ފޮނަދޫ ކަނޑައެޅުއްވިއިރު، މި ލިސްޓުގައި ދެކުނުގެ އެއްވެސް އަތޮޅަކާއި ހއ. އާއި ހދ. ފަދަ ބޮޑެތި އާބާދީތައް ހިމެނޭ އަތޮޅުތައް ހިމަނާފައެއް ނުވެއެވެ.
އާބަން ސެންޓަރުތައް ތަރައްޤީކުރާނެ 7 ރަށެއް ސަރުކާރުން މިއަދު ވަނީ އިއުލާން ކުރިއިރު, އެ ރަށްތައް ކަނޑައަޅައި އިއުލާނުކުރިގޮތުން އިދިކޮޅު އެމްޑީޕީން ވަނީ އާބަން ސެންޓަރު ތަރައްޤީކުރުމުގައި ދެކުނުގެ އަތޮޅުތައް އެއްކިބާކޮށްފައިވާ ކަމަށް ބުނެފައެވެ.
މިކަމާ ގުޅިގެން އެމްޑީޕީގެ ރައީސް ޝާހިދު ކުރެއްވި ޕޯސްޓެއްގައި ވިދާޅުވެފައިވަނީ ބޮޑުތިލަދުންމައްޗާއި ދެކުނު އަތޮޅުތައް މި ލިސްޓުން އުނިވެފައިވާ ސަބަބު ސަރުކާރުން ސާފުކޮށްދޭންޖެހޭނެ ކަމަށާއި، މިފަދަ ނިންމުންތައް ނިންމުމުގައި ކައުންސިލްތަކުގެ މަޝްވަރާ ހޯދަންޖެހޭނެ ކަމަށެވެ.
ޝާހިދު އިތުރަށް ވިދާޅުވެފައިވަނީ އާބަން ސެންޓަރުތައް ކަނޑައެޅުމަކީ ލާމަރުކަޒީ އުސޫލުން ބޭރުން މައި ސަރުކާރުން ކަންކަން ނިންމަން ފެށުމަކަށް ވެގެން ނުވާނެ ކަމަށެވެ.
އެހެންނަމަވެސް ހައުސިން މިނިސްޓްރީއިން މިރޭ ނެރުނު ބަޔާނެއްގައި ބުނެފައިވަނީ، ރައީސުލްޖުމްހޫރިއްޔާގެ އުމްރާނީ ތަރައްޤީގެ ތަސައްވުރަކީ ރާއްޖޭގެ އުތުރުގެ ހަތަރު އަތޮޅު ހިމެނޭހެން އުތުރުގެ އުމްރާނީ ތަރައްޤީގެ ސަރަހައްދަކާއި ރާއްޖޭގެ ދެކުނުގެ ހަތަރު އަތޮޅު ހިމެނޭހެން އުމްރާނީ ތަރައްޤީގެ ސަރަހައްދެއް ތަރައްޤީކުރުން ކަމަށެވެ. އަދި އާބަންސެންޓަރުތައް ތަރައްޤީކުރުމަށް ރާވާފައިވާ ސަރަހައްދުތަކުގެ ތެރެއިން ދެކުނުގެ އަތޮޅުތަކުގެ ތެރޭގައި ހުވަދުއަތޮޅު އުތުރުބުރި، ހުވަދު އަތޮޅު ދެކުނު ބުރި، ފުވައްމުލައް ސިޓީ އަދި އައްޑޫސިޓީ ހިމެނޭކަމަށް ބަޔާނުގައި ބުނެފައިވެއެވެ.
މި ސަރުކާރު ވެރިކަމަށް އައުމަށްފަހު, ލާމަރުކަޒީ ނިޒާމަށް ބޮޑެތި ބަދަލުތަކެއް ގެނެސް, ކައުންސިލްތަކުގެ ބާރު ކަނޑުވާލުމަށް ގާނޫނަށް ބޮޑެތި ބަދަލުތަކެއް ގެނައުމަށް މިހާރު ވަނީ ނިންމާފައެވެ.