35 މިލިއަން ރުފިޔާގެ ކޮރަޕްޝަން މައްސަލާގައި، އެތައް ހާސް ރައްޔިތުންނެއް ހީނާ އާއި ޚަލީލުގެ އިސްތިއުފާއަށް ގޮވާލުމުންވެސް އެއްވެސް ލަދެއްނެތި ގަދަ ދައްކައި މަޤާމުގައި އިސްތިއުފާ ނުދީ ދެމިތިބޭން ނިންމާފައިވާކަމުގެ މައުލޫމާތު ދިޔަވަރު ނޫހަށް ލިބިއްޖެއެވެ.
ޚަލީލުގެ އޮޅުވާލައިގެން، މަކަރާއި ހީލަތުން އެތައް ކޮރަޕްޝަނެއް ހިންގައި ފެއިލެވެފައިވާ ގޮތުގެ ލިޔުމެއް ދިޔަވަރު ނޫހުން ވަނީ ކުރިން ގެނެސް ދީފައެވެ.
މައުލޫމާތު ލިބޭ ގޮތުގައި ޓީވީއެމް އާއި ގުޅުމުގެ ކުރިން ހީނާ މަސައްކަތް ކޮށްފައިވަނީ އެއަރޕޯޓްސް ކޮމްޕެނީގައެވެ. އެތަނުން އޭނާ އިސްތިއުފާ ދޭން މަޖުބޫރުވީ ފައިސާއަށް ހިޔާނާތްތެރިވެގެން ކަމަށް ދިޔަވަރު ނޫހަށް މައުލޫމާތު ލިބިފައިވެއެވެ.
އޭގެ ފަހުން، ޓީވީއެމް އާއި ގުޅި ކުއްޓި ނަޝީދުގެ ގާތް މީހެއް ގޮތުގައި ހުރެ، މަގާމުގެ ނާޖާއިޒު ކުރިއެރުން ހީނާ ހޯދަމުން އައެވެ. އޭގެ ފަހުން ޕީޕީއެމްގައި ސިޔާސީ ކަންކަމަށް ނުކުމެ އަދުރޭ އާއި ގާތް އެކުވެރި ކަމެއް ބޭއްވުމަށްފަހު، އެ ގުޅުން އަދުރޭގެ ދަރިފުޅު ފައިސަލް އާއި ބޭއްވިއެވެ. މަޖިލީހަށް 2019 ވަނަ އަހަރު ކުރިމަތިލީ މި ގުޅުންތަކުގެ ތެރެއިންނެވެ.
އެއަށް ފަހު، ޕީއެންސީ އަށް ވެރިކަން ލިބުމުގެ ކުރިން ދެން ހީނާ އުޅުނީ ސަން ސިޔާމުގެ އެހީތެރިކަން ލިބިގެންނެވެ. ހީނާގެ ދަރަނިތައް އަދާ ކޮށްދީފައިވަނީ ސަންސިޔާމް ކަމުގައި ވެއެވެ.
ހީނާއާއި ހަލީލުއާއި ގާތް ގުޅުންތަކެއް އުފެދިފައިވަނީ، ޓީވީއެމްގައި މަސައްކަތް ކުރި އިރުއެވެ. އޭރު ޚަލީލުގެ އެޕާރޓްމެންޓް ހުންނަނީ “ޕޮލްރައިޒް” ކިޔާ ގެއެއްގައެވެ.
ނޫސްވެރިންނަށް އަނިޔާވެރިވުމަށް، ޚަލީލު ރައީސް މުއިއްޒަށް ލަފާ ދެމުންދާއިރު، އަދި ބޮޑެތި ކޮރަޕްޝަންތައް ހިންގަމުންދާއިރު، ދިވެހި ރައްޔިތުންނަށް މި މީހުންގެ ފަސްބައި ވަރަށް ތަފްސީލުކޮށް އެނގެއެވެ. އަނިޔާވެރިކަން އިތުރުވަމުންދާ މިންވަރުން ރައްޔިތުން އެވާހަކަ ދައްކާ އަޑުވެސް ގަދަ ވާނެއެވެ. އަނިޔާވެރިވުމަށް، މުއިއްޒަށް އަދި އެހެން ފަރާތްތަކަށް ދެއްވާ އިރުޝާދުތައް ރައްޔިތުންނަށް ނޭނގޭނެ ކަމަށް ވިސްނުމަކީ ވަރަށް ބޮޑު ކުށް ހީއެކެވެ.
މިއަދު މަޤާމުގައި އެތިބީ އެއްވެސް ވަރެއްގެ ލަދުވެތި ކަމެއް ނެތުމުންނެވެ. މަގާމުގައި އެތިބީ، ރައްޔިތުން ތަމްސީލް ކުރާ ބަޔަކަށް އެމީހުން ނުވާކަމަށް އެމީހުންނަށް ޤަބޫލު ކުރެވޭތީއެވެ. މި ދެމީހުންގެ އިސްތިއުފާއަށް ގޮވުން ހުއްޓޭނީވެސް ދިވެހިން ބޭނުންވީމައެވެ.