ޝިއުރީ ފާހަގަކުރެއްވި ގޮތުގައި ސްޕޯޓްސް ޓޫރިޒަމާއި، ފިލްމު ޓޫރިޒަމް އަދި ހެލްތު އެންޑް ވެލްނަސް ޓޫރިޒަމް ތައާރަފުކުރުމަށް އެމްއެމްޕީއާރުސީން އަންނަނީ އެކި ފެންވަރުގައި މަސައްކަތް ކުރަމުންނެވެ.
ފަތުރުވެރިކަމުގެ އާ ދާއިރާތަކެއް ނުވަތަ ސެގްމެންޓުތަކެއް ތައާރަފުކުރުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރްސީ)އިން ހާއްސަ މަސައްކަތްތަކެއް ފަށާފައިވާކަމަށް އެ ކުންފުނީގެ މެނޭޖިން ޑިރެކްޓާ އިބްރާހީމް ޝިއުރީ ވިދާޅުވެއްޖެ އެވެ. 
އެމްއެމްޓީވީގެ ބޮޑު ހަބަރު ޕްރޮގުރާމުގައި ވާހަކަދައްކަވަމުން ޝިއުރީ ވިދާޅުވީ ފާއިތުވި 50 ވަރަކަށް އަހަރު ރާއްޖޭގެ ޓޫރިޒަމް އިޝްތިހާރުކޮށްފައިވަނީ ރީތި ދޮންވެލި ގޮނޑުދޮށްތަކާއި، އިރުގެ އައްވާއި، މޫދުގެ ރީތިކަމުގެ މައްޗަށް ބިނާކޮށް، ހަނީމޫން މަންޒިލެއްގެ ގޮތުގައި ކަމަށެވެ. އަދި އެގޮތަށް ރާއްޖެ އިޝްތިހާރުކުރުމުގެ ސަބަބުން ރާއްޖެއަކީ މިހާރު ޓޫރިސްޓުންގެ މެދުގައި މަގުބޫލު ގިނަ ބަޔަކު ދަންނަ މަންޒިލަކަަށް ހެދިފައިވާކަމަށް އޭނާ ވިދާޅުވި އެވެ. 
ރާއްޖެއަކީ މިހާރު އިތުރު މަސައްކަތެއް ނުކޮށް ފަތުރުވެރިންނަށް އެނގޭ ގައުމަކަށްވާތީ މިހާރު އެ ދާއިރާ އިތުރަށް ކުރިއެރުވުމަށް ކުރަންޖެހިފައި އޮތް މަސައްކަތަކީ މި ސިނާއަތުގެ ތެރެއިން ރާއްޖޭގައި ފަތުރުވެރިންްނަށް ތަޖުރިބާކުރަން ލިބޭ ކަންކަން އިތުރުކޮށް، ރާއްޖެއަށް އަންނަ ފަތުރުވެރިންގެ ބާވަތްތައް އިތުރުކުރުމުގެ މަސައްކަތްކަމަަށް ޝިއުރީ ވިދާޅުވި އެވެ. 
ޝިއުރީ ފާހަގަކުރެއްވީ ފަތުރުވެރިކަން ސިންދަފާތުކުރުމުގެ މަސައްކަތުގެ ތެރެއިން ކުޅިވަރުގެ ފަތުރުވެރިކަން ކުރިއެރުވުމުގެ މަސައްކަތްތަކެއް ހިންގުމަށް މިހާރު ނިންމާފައިވާ ކަމެވެ. އެގޮތުން "ބުރުނަބުމަ"ގެ ނަމުގައި ބޭރުގެ ފަރާތްތަކަށްވެސް ބައިވެރިވެވޭ ގޮތަށް މަސްވެރިކަމުގެ މުބާރާތެއް ވިޒިޓް މޯލްޑިވްސް ކްލަބުގެ ފަރާތުން މިހާރު ތައާރަފުކޮށްފައިވާކަން ޝިއުރީ ފާހަގަކުރެއްވި އެވެ. 
އެމްޑީ ވިދާޅުވި ގޮތުގައި މި މުބާރާތަކީ އަހަރަކު އެއްފަހަރު ރާއްޖޭގެ ރިސޯޓުތަކާއި ބޭރުގެ ފަރާތްތަކަށްވެސް ބައިވެރިވެވޭ ގޮތަށް ބާއްވަން ނިންމާފައިވާ މުބާރާތެކެވެ. އަދި މިގޮތަށް މި މުބާރާތް އަހަރަކު އެއްފަހަރު ބޮޑު ހަރަކާތެއްގެ ގޮތުގައި ބާއްވަން ފެށުމުން އެ މުބާރާތުގައި ބައިވެރިވުމަށް ފަތުރުވެރިން އައިސް ރިސޯޓުތަކުގައި ތިބެ އެ ރިސޯޓުތަކުން އެހެނިހެން ހިދުމަތްތައް ހޯދާނެ ކަމަށެވެ. އެކަމުގެ ސަބަބުން ރާއްޖެއަށް އެ ގެނެވެނީ ކުރިން ރާއްޖެއަށް ނުގެނެވޭ ސެގްމެންޓެއްގެ ފަތުރުވެރިން ކަމަށް އޭނާ ވިދާޅުވި އެވެ. 
ސްޕޯޓްސް ޓޫރިޒަމުގެ އިތުރަށް ފިލްމު ޓޫރިޒަމް ތައާރަފުކުރުމަށްވެސް މަސައްކަތްތަކެއް ކުރައްވާކަން ފާހަގަކުރައްވަމުން ޝިއުރީ ވިދާޅުވީ އެހެން ގައުމުތަކުގައި ފިލްމު ޓޫރިޒަމަށް ފުރުސަތު ދިނުމަށް ޓެކްސް ލުއިތައް ދިނުން ފަދަ ބައެއް ކަންކަން އޮތް ނަމަވެސް ރާއްޖޭގައި އެފަދަ ނިޒާމެއް ނެތް ކަމަށެވެ. ނަމަވެސް އެ ބާވަތުގެ ފަތުރުވެރިކަން ރާއްޖޭގައި ކުރިއެރުވުމަށް ކުރިއަށް އޮތް ތަނުގައި މަސައްކަތްކުރެވޭނެ ގޮތްތައް ބެލުމަށް އެ ދާއިރާގެ މާހިރުންނާއެކު މަސައްކަތްތަކެއް ކުރައްވަމުންދާކަން އޭނާ ހާމަކުރެއްވި އެވެ. 
ހެލްތު އެންޑް ވެލްނެސް ޓޫރިޒަމް ތައާރަފުކުރުމަށް އަލިއަޅުވައިލައްވަމުން ޝިއުރީ ވިދާޅުވީ ދިވެހި ބޭހާ ގުޅޭ ޑޮކިއުމެންޓަރީއެއް ތައްޔާރުކޮށްފައިވާ ކަމަށެވެ. އެ ޑޮކިއުމެންޓަރީ ތައްޔާރުކުރީ އެންމެ ދިވެހި ބޭހަށް އެންމެ މަޝްހޫރު އެއް ރަށްކަމަށްވާ ބ.ކެންދޫ ކައުންސިލާ ގުޅިގެންނެވެ. 
ޝިއުރީ ފާހަގަކުރެއްވި ގޮތުގައި ދިވެހި ބޭހުގެ އިތުރަށް އެހެނިހެން ބައެއް ކަހަލަ ހިދުމަތްތައްވެސް ރަށްރަށުގައި ގާއިމުކޮށް އެ ހިދުމަތްތައް އެ ރަށްރަށުން ލިބޭކަން އިޝްތިހާރުކުރުމަކީ ކުރެވިދާނެ ކަމެކެވެ. އެގޮތުން އެކިއުޕަންޗާ ފަދަ ކަންކަމަކީ ތައާރަފުކުރެވިދާނެ ހިދުމަތްތަކެއްކަން އޭނާ ފާހަގަކުރެއްވި އެވެ. 
ޝިއުރީ ވިދާޅުވީ ހެލްތް އެންޑް ވެލްނެސް ޓޫރިޒަމް ތައާރަފުކުރުމަށް ހެލްތު ޓޫރިޒަމް ފުޅާކޮށް އެ ދާއިރާ އިޝްތިހާރުކުރުމަށް ރާއްޖޭގެ އެންމެ ބޮޑު އަމިއްލަ ހޮސްޕިޓާކަމަށްވާ އޭޑީކޭއާއެކު މަސައްކަތްތަކެއް ކުރުމަށް އެމްއެމްޕީއާރުސީން މިހާރު ގާއިމުކޮށްފައިވާ އެމްއޯޔޫގެ ތެރެއިންވެސް ގިނަ މަސައްކަތްތަކެއް ކުރިއަށް އޮތް ތަނުގައި ކުރެވޭނެ އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ