ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން 15 މުވައްޒަފަކު ވަޒީފާއިން ވަކިކޮށްފިއެވެ. މި މަޢުލޫމާތު ހާމަކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މީޑިއާއަކަށް ދެއްވި އިންޓަވިއުއެއްގައެވެ.ރައީސް މުޢިއްޒު ވިދާޅުވީ، "މިއަދު އެޗްޑީސީން ވަނީ ބައެއް ފަރާތްތައް ވަކިކޮށްފައި. އަޅުގަނޑު ބޭނުމެއް ނޫން ސަރުކާރުގެ އެއްވެސް މުއައްސަސާއެއްގައި ކޮރަޕްޝަނަށް މަގުފަހިވާކަމެއް ކުރަން ފުރުޞަތު ލިބޭކަށެއް ބޭނުމެއް ނޫން. އެހެން ކުންފުންޏެއްގައިވެސް އެކަހަލަ ކަމެއް ހިނގާކަން އަޅުގަނޑު ފުރުޞަތެއް ނުދޭނަން." މިހެންނެވެ.ލިބިފައިވާ މަޢުލޫމާތުތަކަށް ބަލާއިރު، މި މުވައްޒަފުން ވަޒީފާއިން ވަކިކޮށްފައިވަނީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތި ލިބުނުކަމުގެ ލިޔުން ދޫކުރި މައްސަލައާ ގުޅިގެންނެވެ. ނަމަވެސް، ވަކިކުރެވުނު މުވައްޒަފުން ކުރަމުންދިޔައީ ކޮން މަސައްކަތެއްކަމެއް ނުވަތަ އެ މުވައްޒަފުންގެ މައްޗަށް ކުރެވޭ ވަކި ތުހުމަތުތަކެއް އަދި ހާމަކޮށްފައެއް ނުވެއެވެ.މި މައްސަލައާ ގުޅޭ އިތުރު ތަފްސީލުތައް ހާމަކުރުމަށް އެޗްޑީސީން އަދި އެއްވެސް ބަޔާނެއް ނެރެފައެއް ނުވެއެވެ. އަދި މި މައްސަލަ ތަޙްޤީޤު ކުރުމަށް ކަމާބެހޭ އިދާރާތަކުން އެއްވެސް ފިޔަވަޅެއް އަޅާފައިވާކަން އަދި އެނގިފައެއް ނުވެއެވެ.