އުމުރު ދުވަހުގެ ޖަލު ހުކުމެއް އޮތް ދެ މީހަކު މަސްތުވާތަކެތީގެ މައްސަލާގައި ފުލުހުން ހައްޔަރުކޮށް އިއްޔެ ކްރިމިނަލް ކޯޓަށް ހާޒިރުކޮށްފައިވާ ކަމަށް އެ ކޯޓުން މިއަދު ބުނެފި އެވެ.
ކޯޓަށް ހާޒިރުކުރި މީހުންގެ ނަން ކޯޓުން ހާމައެއްނުކުރެ އެވެ. ނަމަވެސް މަސްތުވާތަކެތި ބޭނުންކުރުމާއި ގެންގުޅުމުގެ ތުހުމަތުގައި މުއްދަތަށް ގެނައި އެކަކީ މަސްތުވާތަކެތި ބޭނުންކުރުމާއި އޭގެ ވިޔަފާރީގެ ބޭނުމަށް އަތުގައި ބެހެއްޓުމުގެ ކުށް ސާބިތުވެ ޖެނުއަރީ ،30 2007ގައި އުމުރަށް ޖަލަށްލުމަށް ހުކުމްކޮށްފައިވާ މީހެއް ކަމަށް ބުންޏެވެ. އަދި ހަމަ އެ މީހާ އެ ހުކުމް ތަންފީޒުކުރަމުން ދިޔަ ދުވަސްވަރު މީހަކު މަރާލެވިދާނެ ފަދަ އެއްޗަކާ އެކު ޣައިރު ގާނޫނީ އެއްވުމެއްގައި ބައިވެރިވުމުގެ ކުށް ސާބިތުވެ ހަ މަސް ދުވަހަށް ޖަލަށްލުމަށް ވެސް މެއި ،12 2009 ގައި ހުކުމެއްކޮށްފައިވާ ކަމަށް ކޯޓުން ބުންޏެވެ.
ދެން ހާޒިރުކުރި މީހާގެ މައްޗަށް ތުހުމަތުކޮށްފައިވަނީ މަސްތުވާތަކެތި ބޭނުންކޮށްގެން ހުރެ ގޭގެ އަށް ވަދެ މުދަލަށް ގެއްލުން ދީ، ބިރު ދައްކާ ހެދުން ކަމަށާއި އޭނާ އަކީ މަސްތުވާތަކެތި ބޭނުންކުރުމުގެ ކުށުގައި ހަ އަހަރަށް ޖަލަށްލުމަށް 1999 ވަނަ އަހަރު ހުކުމްކުރުމަށް ފަހު އޭގެ ފަހުން އަބުރާ ބެހުމުގެ ކުށް 2001 ވަނަ އަހަރު ސާބިތުވެ 300ރ. އިން ޖޫރިމަނާކޮށްފައި ވަނިކޮށް މަސްތުވާތަކެތި ބޭނުންކުރުމާއި ވިއްކުމުގެ ކުށުގައި 2002 ވަނަ އަހަރު އުމުރަށް ޖަލަށްލުމަށް ހުކުމްކޮށްފައިވާ މީހެއް ކަމަށް ކޯޓުން ބުންޏެވެ. އަދި އެ ހުކުމުގެ މުއްދަތުގެ ތެރޭގައި މަސްތުވާތަކެތި ބޭނުންކޮށް އަތުގައި ބެހެއްޓުމުގެ ކުށް ސާބިތުވެ އެ މީހާގެ މައްޗަށް 12 އަހަރުގެ ޖަލު ހުކުމެއް ވެސް 2005 ވަނަ އަހަރު ކޮށްފައިވާ ކަމަށް ކޯޓުން ބުންޏެވެ.