ޖުމްހޫރީ ޕާޓީގެ ލީޑަރު ގާސިމް އިބްރާހީމާއި އެ ޕާޓީގެ ރައީސް އަލީ ވަހީދު މާލެ ވަޑައިގަންނަވާނީ މާދަމާ ކަމަށް އެ ޕާޓީން ބުނެފި އެވެ.
ޖުމްހޫރީ ޕާޓީން ބުނިގޮތުގައި ކުރިން މިއަދު މާލެ ވަޑައިގަންނަވަން ހަމަޖެހިފައި އޮތް ނަމަވެސް ބައެއް ގާނޫނީ ކަންކަން ހަމަޖައްސަން ޖެހުމުން މާދަމާ އަށް އެ ދަތުރު ފަސްކޮށްފައިވާ ކަމަށެވެ. އެއީ އެ ބޭފުޅުންނަކީ ސިޔާސީ ހިމާޔަތް ހޯއްދަވައިގެން، ރާއްޖެ އިން ބޭރުގައި ދިރިއުޅުއްވަމުން ގެންދަވާ ބަޔަކަށް ވާތީ، ރާއްޖެ ވަޑައިގަތުމުގެ ކުރިން ނިންމަންޖެހޭ ގާނޫނީ ކަންތައްތަކެއް ކަމަށް އެ ޕާޓީން ބުނެ އެވެ.
އެ ދެ ބޭފުޅުން މާލެ ވަޑައިގަންނަވަނީ މާދަމާ މެންދުރެވެ.
ގާސިމާ އެކު މިއަދު މާލެ ވަޑައިގަންނަވާ ގޮތަށް ކުރިން ހަމަޖެހިފައިވާ ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު މިހާރު ރާއްޖެ ވަޑައިގަންނަވާ ގޮތަށް ނިންމަވާފައި ވަނީ އަންނަ ހޮނިހިރު ދުވަހު އެވެ.
ރިޝްވަތުގެ މައްސަލައެއްގައި ތިން އަހަރުގެ ހުކުމެއް އިއްވާފައިވާ ގާސިމް ޖަރުމަނުވިލާތުގައި ސިޔާސީ ހިމާޔަތް ހޯއްދަވައިގެން ގިނަ ދުވަސްތަކެއް އުޅުއްވުމަށް ފަހު ރާއްޖެ ވަޑައިގަތުމަށް ނިންމެވީ، ކަފާލާތުގެ ދަށުން ބަންދުން ދޫކޮށްފައި ބެހެއްޓުމަށް ހައި ކޯޓުން އަމުރުކުރުމާ ގުޅިގެންނެވެ.
އެމްޑީޕީގެ ކުރީގެ ޗެއާޕާސަން އަލީ ވަހީދު އިނގިރޭސިވިލާތުން ސިޔާސީ ހިމާޔަތް ހޯއްދެވީ، 2015 ވަނަ އަހަރުގެ މޭމަހު މާލޭގައި ބޭއްވި "މޭޑޭ" ބޮޑު މުޒާހަރާ އަށް ފަހު ޖަލު ބަންދުގައި ދުވަސްތަކެއް ހޭދަކުރެއްވުމަށް ފަހުގަ އެވެ.