މިދިޔަ އަހަރު އޯ ލެެވެލް ނިންމި ދަރިވަަރުންނަށް ހާއްސަކޮށްގެން މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ)ގައި އޯޕަން ޑޭ އެއް މިއަދު ހަވީރު ބާއްވަން ނިންމައިފި އެވެ.
އެ ޔުނިވާސިޓީން ބުނީ އެތަނުގެ މައި މަރުކަޒުގެ ގޯތިތެރޭގައި ހަވީރު 4:00 އިން 6:00 އަށް ކޯސްތަކާ ގުޅޭ މައުލޫމާތު ދޭނެ ކަމަށެވެ.
ކޯސްތަކަށް ޝަރުތު ހަމަވާ ދަރިވަރުންނަށް، ކޯހުން ވަގުތުން ޖާގަ ދޭނެ ކަމަށް ވެސް އެމްއެންޔޫ އިން ބުންޏެވެ. މީގެ އިތުރުން ކުރިއަށްދާނެ ވަކި ދާއިރާއެއް ނޭނގިފައި ތިބި ދަރިވަރުންނަށް ކެރިއާ ގައިޑަންސް ވެސް ދޭނެ އެވެ.
"ކޯހުގައި ޖާގަ ހުރެފައި، އެ ކޯހަކަށް ދަރިވަރުގެ ޝަރުތުތައް ހަމަވަންޏާ ވަގުތުން ފުރުސަތު ދެވޭނެ. އެއީ ވަރަށް ބޮޑު ފަސޭހައެއް. އެހެންނޫނީ ކިއުއެއްގައި ޖެހިގެން ނަންބަރު ނަގައިގެން ފޯމު ހަވާލުކުރެވޭނީ. ކޯސް ލިބުނު ކަން ވެސް އެނގޭނީ ފަހުން،" ގައުމީ ޔުނިވާސިޓީގެ އޮފިޝަލަކު ވިދާޅުވި އެވެ.
އޭ ލެވެލް ނިންމި ދަރިވަރުންނަށް ހާއްސަކޮށްގެން އަންނަ ހޮނިހިރު ދުވަހު ވެސް އޯޕަން ޑޭ އެއް ބާއްވަން ވަނީ ނިންމައިފަ އެވެ.
މި މަހު ފަށާ ކޯސްތަކަށް 4479 ދަރިވަރުން ކުރިމަތިލާފައި ވެ އެެވެ. އޭގެ ތެރެއިން ޝަރުތު ފުރިހަމަވާ 2853 ދަރިވަރުންނަށް ފުރުސަތު ދީފައިވާއިރު، މިހާރު ވެސް ކިޔަވަމުން އަންނަ 7070 ދަރިވަރުންނާއެކު، މި ސެމިސްޓާގައި ގާތްގަނޑަކަށް 9000 ދަރިވަރުން ކިޔަވާނެ އެވެ.