ކުރީގެ ރައީސް ޑރ.މުޙަންމަދު ވަހީދު ހަސަންގެ ޤައުމީ އިއްތިހާދު ޕާޓީ އުވާލުމަށް އެޕާޓީން ނިންމައިފިއެވެ.
 
ޤައުމީ އިއްތިހާދު ޕާޓީ އުވާލަން ފާސްކޮށްފައިވަނީ ރޭ އެޕާޓީން ބޭއްވި ކައުންސިލް ބައްދަލުވުމުގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާޤުން ކަމަށް، ޕާޓީ ޤާނޫނީ ގޮތުން އުވާލުމުގެ މަސައްކަތާއި ހަވާލުވެވަޑައިގެން ހުންނެވި ރައީސް ވަހީދު ސަރުކާރުގެ ޕޮލިޓިކަލް އެޑްވައިޒަރ އަޙުމަދު ތައުފީޤް ވިދާޅުވިއެވެ.
 
އެމްބީސީ ނިއުސްއަށް ފޯނުން މަޢުލޫމާތުދެއްވަމުން، ތައުފީޤް ވިދާޅުވީ، ރޭގެ ކައުންސިލް ބައްދަލުވުން ބޭއްވުމުގެ އެއްރޭ ކުރިން ޕާޓީގައި އިސްކޮށް ހަރަކާތްތެރިވާ ހުރިހާ މެންބަރުންނާއި ރައީސް ވަހީދު ބައްދަލުކުރައްވާ އެކަމާއި ގުޅޭގޮތުން މަޝްވަރާކުރެއްވި ކަމަށެވެ. އަދި، ޕާޓީގެ ކައުންސިލުން އެޕާޓީ އުވާލަން ނިންމީ، މިވަގުތު ރާއްޖޭގެ ސިޔާސީ މަސްރަހާއި އިޤްތިސާދީ ހާލަތު ހުރި ގޮތުން ރައްޔިތުންނާ ޤައުމަށް ފައިދާހުރި ގޮތަކީ ޕާޓީ އުވާލުން ކަމަށް ހުރިހާ މެންބަރުންނަށްވެސް ފެނިވަޑައިގަންނަވާތީ ކަމަށް އޭނާ ވިދާޅުވިއެވެ.
  
ޤައުމީ އިއްތިހާދު ޕާޓީ އުވާލުމަށް ނިންމާފައިމިވަނީ ޕާޓީ އުފެދުނުތާ ފަސް އަހަރު ފަހުންނެވެ. ޤައުމީ އިއްތިހާދު ޕާޓީ އުވާލިއިރު އެޕާޓީގައި ފަސްހާސް އަށްސަތޭކަ ފަސްދޮޅަސް ހަތަރު މެންބަރުން ތިބިކަމަށް އިލެކްޝަންސް ކޮމިޝަނުގެ ރެޖިސްޓްރީއިން ދައްކައެވެ.