ދިވެހިރާއްޖޭގެ ރީތިކަމާއި ރާއްޖެއިން ފަތުރުވެރިންނަށް ލިބެންހުރި ތަފާތު ތަޖުރިބާތައް ދައްކާލުމަށް "މޯލްޑިވްސް ކާނިވަލް 2025، 'މޯލްޑިވްސް މަހައުތުސަވް' ނަމުގައި ހާއްސަ ހަރަކާތެއް ކުރިއަށްގެންގޮސްފިއެވެ.
ޕިކްޔޯޓްރޭލްއިން އިންތިޒާމްކޮށްގެން މިމަހުގެ 11 އިން 12 އަށް އިންޑިއާގެ ގަރގައޮންގެ އެމްބިއަންސް މޯލްގައި ކުރިއަށް ގެންދިޔަ މި ހަރަކާތަކީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ ވިޒިޓް މޯލްޑިވްސް) އިން އެންޑޯޒްކޮށްގެން ކުރިއަށް ގެންދިޔަ ހަރަކާތެކެވެ.
މި ހަރަކާތް އިފްތިތާޙުކޮށްދެއްވީ ދިވެހިރާއްޖެއިން އިންޑިޔާއަށް ކަނޑައަޅުއްވާފައި ހުންނަވާ ހައި ކޮމިޝަނަރު އައިޝަތު އަޒީމާއެވެ. ދެ ދުވަހުގެ ހަރަކާތުގައި އިންޓަރެކްޓިވް ހަރަކާތްތަކާއި އިމަރސިވް ތަޖުރިބާތައް ބޭނުންކޮށްގެން ދިވެހިރާއްޖޭގެ ރީތިކަމާއި ރާއްޖެއިން ފަތުރުވެރިންނަށް ލިބެންހުރި ތަފާތު ތަޖުރިބާތައް ދައްކާލާފައިވާކަމަށް އެމްއެމްޕީއާރްސީން ވިދާޅުވެއެވެ.
މޯލްޑިވްސް ކާނިވަލް 2025 ގައި 17 ރިސޯޓެއް ބައިވެރިވެ، މި ކާނިވަލަށް ޒިޔާރަތްކުރާ ފަރާތްތަކަށް ޕްރީމިއަމް ރިސޯޓް އޮފާތަކާއި ދިވެހިރާއްޖޭ އެކިއެކި ރަށްތަކުގެ މައުލޫމާތުތައް ދީފައިވެއެވެ. އަދި ކޮންމެ ސްޓޯލްއެއްގައި ވެސް ޚާއްސަ ޕިކްޔޯޓްރެއިލްގެ މަންދޫބުން ތިބެ، ޕާސަނަލައިޒްޑް މައުލޫމާތު ފޯރުކޮށްދިނުމާއި، ބައިވެރިންނާ ގުޅިގެން ދަތުރުފަތުރުގެ ލަފާ ދިނުމުގެ ހަރަކާތްތައް ކުރިއަށްދިޔަކަމަށްވެސް އެމްއެމްޕީއާރްސީން ވިދާޅުވެއެވެ. މީގެ އިތުރުން، ދިވެހިރާއްޖޭގެ ބްރޭންޑް އިތުރަށް ޕްރޮމޯޓްކުރުމަށް ފަރުމާކޮށްފައިވާ އެކިއެކި ހަރަކާތްތަކުގައި ބައިވެރިވުމުގެ ފުރުސަތުތައްވެސް މި ކާނިވަލުން ވަނީ ފަހިކޮށްދީފައެވެ.
މި ހަރަކާތަކީ އިންޑިއާގެ ފަތުރުވެރިންނަށް ދިވެހިރާއްޖޭގެ ރީތިކަމާއި ލަގްޒަރީ ތަޖުރިބާތައް ދައްކުވައިދޭ ހަރަކާތެކެވެ. އެމްއެޕްޕީއާރްސީން ވިދާޅުވީ ޕިކްޔޯޓްރޭލްގެ މި އިސްނެގުމަކީ ރާއްޖޭގެ ރިސޯޓްތަކުގެ ޚާއްޞަ ހުށަހެޅުންތައް އިންޑިއާގެ މާކެޓަށް ދައްކާލުމަށް މުހިންމު ޕްލެޓްފޯމެއް ލިބި، ޓްރެވަލް ސްޓޭކްހޯލްޑަރުންނާއި ގަންނަން ބޭނުންވާ ފަރާތްތަކާ ދެމެދު ވަރުގަދަ ގުޅުންތަކެއް ބަދަހިކުރުމަށް އެހީވެދިން ހަރަކާތެއްކަމަށެވެ.
މޯލްޑިވްސް ކާނިވަލްގެ މަގުސަދަކީ އާއިލީ ޗުއްޓީތަކާއި، ރޮމޭންޓިކް ގެޓްއަވޭތަކާއި، އެޑްވެންޗާ ތަޖުރިބާތަކަށް އެންމެ އެދެވޭ މަންޒިލެއްގެ ގޮތުގައި ދިވެހިރާއްޖެ ދައްކާލުމެވެ.
ޕިކްޔޯޓްރެއިލްއަކީ ބައިނަލްއަޤްވާމީ ދަތުރުފަތުރުގެ ތާވަލުތަކަށް ޚާއްޞަވެފައިވާ ދަތުރުފަތުރާއި ޓެކްނޮލޮޖީގެ ޕްލެޓްފޯމެކެވެ. 2014 ވަނަ އަހަރު އުފެއްދުނު މި ޕްލެޓްފޯމް ބޭނުންކުރާ ފަރާތްތަކަށް އެމީހުންގެ ދަތުރުގެ ކޮންމެ ބައެއްވެސް އަމިއްލައަށް ފަރުމާކުރުމުގެ ފުރުޞަތު ދެއެވެ. މީގެ ތެރޭގައި ވައިގެ ދަތުރުތަކާއި، ހުރުމުގެ އިންތިޒާމުތަކާއި، ހަރަކާތްތަކާއި އަދި ތަޖުރިބާތައް ހިމެނެއެވެ.
މި ޕްލެޓްފޯމުން އަމާޒު ހިފަނީ ދިވެހިރާއްޖެ ފަދަ މަޤްބޫލު މަންޒިލުތަކަށް އެއްވެސް ދަތިކަމެއް ނެތި ފަސޭހަކަމާއެކު ދަތުރު ރޭވުމުގެ އިންތިޒާމް ފޯރުކޮށްދިނުމެވެ.