ވޭޕް ބޭނުންކުރުމުގެ މައްސަލައިގައި 4 މީހަކު ޖުމްލަ 20,000 ރުފިޔާއިން ޖޫރިމަނާކޮށްފިކަމަށް ފުލުހުން މިއަދު ހާމަކޮށްފިއެވެ.
މިއީ ރާއްޖޭގައި ވޭޕް ބޭނުންކުރުން މަނާކުރުމަށްފަހު ފުރަތަމަ ފަހަރަށް މީހުން ޖޫރިމަނާކުރެވުނު މައްސަލައެވެ.ވޭޕް ބޭނުންކުރާ މީހުން 5,000 ރުފިޔާއިން ޖޫރިމަނާކުރެވޭނެއެވެ. އަދި ވޭޕް އެތެރެކުރާ ފަރާތްތައް 50,000 ރުފިޔާއިން ޖޫރިމަނާކުރެވޭނެ އިރު، ކޮންމެ ވޭޕަކަށް އިތުރު 10,000 ރުފިޔާއިން ޖޫރިމަނާކުރެވޭނެއެވެ. މީގެ އިތުރުން، ވޭޕް ވިއްކާ ފަރާތްތައް 20,000 ރުފިޔާއިން ޖޫރިމަނާކުރެވޭނެ އިރު، ކޮންމެ ވޭޕަކަށް އިތުރު 10,000 ރުފިޔާއިން ޖޫރިމަނާކުރެވޭނެއެވެ. އަދި ކުޑަކުދިންނަށް ވޭޕް ވިއްކާ ފަރާތްތައް އިތުރު 50,000 ރުފިޔާއިން ޖޫރިމަނާކުރެވޭނެއެވެ.ފުލުހުން ބުނެފައިވަނީ، ޖޫރިމަނާ ދެއްކުމަށް މެސެޖަކާއެކު ވާރު ޕޭ ލިންކެއް ފޮނުވޭނެ ކަމަށެވެ.
މި ޤާނޫނު ތަންފީޒުކުރުމުގެ މަޤްޞަދަކީ ރާއްޖޭގައި ވޭޕް ބޭނުންކުރުން ހުއްޓުވައި، ޞިއްޙަތަށް ކުރާ ނޭދެވޭ އަސަރުތަކުން ރައްޔިތުން ސަލާމަތްކުރުން ކަމަށް ފުލުހުން ބުނެފައިވެއެވެ.