އެޗްޑީސީގެ މެނޭޖިން ޑިރެކްޓާ އިބްރާހީމް ފަޒުލް ރަޝީދާއި ކުންފުނީގެ ޗެއާމަން ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން ސަސްޕެންޑުކުރުމުގެ ސަބަބުން ގޯތި ލިބުނު މީހެއްގެ ހައްގަށް އުނިކަމެއް ނުލިބޭނެކަމުގެ ޔަގީންކަން ސަރުކާރުން ދިނެވެ.
ކުރީ ސަރުކާރުން ހިންގި "ބިންވެރިޔާ" ސްކީމުގެ ދަށުން ގޯތި ލިބުނު އެއްވެސް މީހެއްގެ އެއްވެސް ހައްގަކަށް އުނިކަން ނުލިބޭނެކަމުގެ ޔަގީންކަން ސަރުކާރުން ދީފި އެވެ. 
ބިންވެރިޔާ ސްކީމުގެ ދަށުން ގޯތި ނުލިބޭ އެތައް ބަޔަކަށް ހުޅުމާލެއިން ގޯތި ދޫކޮށްފައިވާކަމުގެ ތުހުމަތު އެޗްޑީސީގެ އިސްވެރިންނަށް އަމާޒުވެ، އެ ކުންފުނީގެ މެނޭޖިން ޑިރެކްޓާގެ މަގާމުގައި ހުންނެވި އިބްރާހީމް ފަޒުލް ރަޝީދު މިއަދުވަނީ ސަސްޕެންޑުކޮށްފަ އެވެ. 
ފަޒުލްގެ އިތުރަށް ކުންފުނީގެ ޗެއާމަން ފިޔަވައި ކުންފުނީގެ ޑިރެކްޓަރުންގެ ބޯޑުގެ ހުރިހާ މެންބަރުންވެސް ސަސްޕެންޑުކޮށްފައިވާކަމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން މިއަދު އަންގާފައިވެ އެވެ. 
ފަޒުލް ސަސްޕެންޑުކޮށްފައިވާއިރު އޭނާގެ ބޭބެއަކަށް ހުޅުމާލެއިން ގޯއްޗެއް ދޫކޮށް، އެގޯތީގައި އިންފާރު ރޭނުމަށް ހުއްދަދިން މައްސަލައެއް ފަޅާއަރާފައިވެ އެވެ. އެ ގޯތީގައި އިންފާރު ރާނަން ހުއްދަދިނީ އެ ގޯއްޗަކީ އެއްވެސް ފަރާތަކަށް ދޫކޮށްފައިވާ ގޯއްޗެއް ނޫންކަން ހައުސިން މިނިސްޓްރީން އެޗްޑީސީއަށް އެންގިފަހުން ކަމަށް ބައެއް ނޫސްތަކުން ތުހުމަތުކޮށްފައިވެ އެވެ. 
ކުރެވޭ ހުރިހާ ތުހުމަތުތައް ދޮގުކުރައްވައި ފަޒުލް ވިދާޅުވެފައިވަނީ އެޗްޑީސީން އެއްވެސް ފަރާތަކަށް ބިންވެރިޔާ ސްކީމުގެ ދަށުން ދޫކުރާ ގޯތިތައް ނުދޭނެ ކަމަށެވެ. ގޯތި ދޫކުރުމާއި ރަޖިސްޓްރީ ހަވާލުކުރުން ފަދަ ހުރިހާ ކަމެއް ކުރަނީ ހައުސިން މިނިސްޓްރީން ކަމަށެވެ. 
އެޗްޑީސީން ކުރާ ކަމަކީ އެ ކުންފުނީގެ ޕޯޓަލް މެދުވެރިކޮށް މުނިސިޕަލް ހިދުމަތެއް ހޯދުމަށް ހުއްދައަށް އެދި މީހަކު ހުށަހެޅުމުން އެ ހުއްދަ ދޫކުރުން ކަމަށާއި، ހުއްދަ ދިނުމުގެ ގޮތުން އެ ހުށަހަޅާ މައުލޫމާތުގެ ސައްހަކަން ކަށަވަރުކުރުމަށް އެޗްޑީސީން ހައުސިން މިނިސްޓްރީގައި އެދޭކަމަށްވެސް ފަޒުލް ވިދާޅުވި އެވެ. 
ފަޒުލް އިތުރަށް ވިދާޅުވީ އެއިރު މައްސަލަތައް ކުރިމަތިވި ފަރާތްތަކަށް އިންފާރު ރާނަން ދޫކުރި ހުއްދަތައް ބާތިލުކުރި ކަމަށެވެ. ނަމަވެސް ބައެއް ނޫސްވެރިން ބެލިބެލުމުން ފަޒުލްގެ ބޭބެއަށް ދޫކުރިކަމަށް ބުނާ ގޯތީގައި އިންފާރުވެސް ހުރީ ރާނާފަ އެވެ. 
މިކަމާ ގުޅިގެން ފަޒުލް އަދި ބޯޑުގެ މެންބަރުން ސަސްޕެންޑުކުރިކަން ހާމަކުރައްވައި ކުރެއްވި ޓުވީޓެއްގައި ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެފައިވަނީ، ކުންފުނީގެ އެމްޑީ އަދި ބޯޑުގެ މެންބަރުން ސަސްޕެންޑުކުރި ނަމަވެސް ގޯތި ލިބުނު އެއްވެސް މީހެއްގެ ހައްގަކަށް އުނިކަމެއް ލިބިފައި ނެތްކަން އަދި ނުވެސް ލިބޭނެކަމުގެ ޔަގީންކަން ހުރިހާ އެންމެނަށް ދެއްވާ ކަމަށެވެ. 
"މިކަމާގުޅިގެން ގޯތި ލިބިފައިވާ އެއްވެސް ފަރާތެއްގެ އެއްވެސް ޙައްޤަކަށް އުނިކަމެއް ލިބިފައިނުވާކަން އަދި ނުވެސް ލިބޭނެކަމުގެ ޔަޤީންކަން ހުރިހާ ފަރާތްތަކަށް އަރުވަން،" ހީނާ އެކްސްގައި ކުރެއްވި ޕޯސްޓުގައި ވިދާޅުވި އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ