އަންނަ ސެޕްޓެމްބަރު މަހުގެ ނުވަ ވަނަ ދުވަހު ބާއްވާ ރިޔާސީ އިންތިހާބުގައި ވާދަކުރުމަށް، އިދިކޮޅު ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީންގެ ޝަރުތު ފުރިހަމަ ނުވާ ކަމަށް ބުނެ، އެމަނިކުފާނުގެ ކެނޑިޑެސީ ފޯމު އިލެކްޝަންސް ކޮމިޝަން (އީސީ) އިން ބަލައިނުގަތީ ގާނޫނާ ހިލާފަށް ކަމަށް ކުރީގެ އުއްތަމަ ފަނޑިޔާރު އަހުމަދު އަބްދުﷲ ދީދީ ވިދާޅުވެއްޖެއެވެ.
ރިޔާސީ އިންތިހާބުގައި ވާދަކުރެއްވުމަށް ޔާމީން ފޯމު ހުށަހެޅުއްވީ މިއަދު ހެނދުނެވެ. ޔާމީންގެ ފޯމު ޗެކްކުރުމަށްފަހު ގާނޫނުއަސާސީގެ 110 ވަނަ މާއްދާ އާއި ރިޔާސީ އިންތިހާބުގެ ގާނޫނުގެ ފަސްވަނަ މާއްދާގެ (ހ)ގެ ދަށުން އީސީން ނިންމީ ޔާމީން، ރައީސުލްޖުމްހޫރިއްޔާ ކަމަށް ކުރިމަތިލާން ހުށަހެޅި ހުށަހެޅުން ގަބޫލުކުރެވެން ނެތް ކަމަށެވެ.
ސަބަބެއް ކަމަށް ބުނެފައި ވަނީ، ޔާމީންގެ މައްޗަށް ޖިނާއީ ކުށެއް ސާބިތުވެ 12 މަހަށްވުރެ ދިގު މުއްދަތެއްގެ ހުކުމެއް އައިސްފައިވާ މީހަކަށް ވުމާއި އެ ހުކުމް ތަންފީޒުކޮށް ނިމިފައިނުވާކަން، ކުށުގެ ރެކޯޑަށް ބެލުމުން އެގެން އޮތުމުން، ގާނޫނުއަސާސީގެ 109 ވަނަ މާއްދާގެ (ޅ) ގައި ބަޔާންކުރާ ޝަރުތު ޔާމީންގެ ކިބައިގައި ހަމަނުވާތީ ކަމަށެވެ.
ގާނޫނުއަސާސީގެ 109 ވަނަ މާއްދާގައި ބުނެފައިވާ ގޮތުން ޖިނާއީ ކުށެއް ކުރިކަން ސާބިތުވެ އެއްއަހަރަށް ވުރެ ދިގު ހުކުމެއް އައިސްފައިވާ މީހަކު ނަމަ އެ މީހަކަށް ރިޔާސީ އިންތިހާބުގައި ވާދަކުރެވޭނީ އަދަބު ތަންފީޒުކޮށް ނިމޭތާ ތިން އަހަރު ފަހުންނެވެ.
އެކަމާ ގުޅިގެން އަބްދުﷲ ދީދީ މިރޭ ކުރެއްވި ޓުވީޓެއްގައި ވިދާޅުވީ ޔާމީންގެ ހުށަހެޅުން ބަލައި ނުގަންނަން ނިންމާފައިވަނީ ގާނޫނުއަސާސީ އާއި ގާނޫނު އަސާސީން ކަނޑައަޅާފައިވާ ދުސްތޫރީ އުސޫލުތަކާ ހިލާފަށް ކަމާމެދު އެއްވެސް ޝައްކެއް ނެތް ކަމަށެވެ.
"ބުނެވުނެ ކެންޑިޑަސީ ގަބޫލުނުކުރުމަށް އިލެކްޝަންސް އިން ނިންމި ސަބަބަކީ ގަނޫނުއަސާސީގެ 109 ވަނަ މާއްދާގެ (ޅ) ގައި ބުނާ ޝަރުތު ފުރިހަމަ ނުވުންކަމަށް ބުނެފައިވާ އިރު، އެމާއްދާގެ އެ އަކުރުގައި ބުނެފައިވާ ޖިނާއީ ހުކުމަކީ ތަންފީޒީ ބާރު ލިބިގެންވާ އެކްޒެކިއުޓަބަލް ހުކުމެއްގެ ވާހަކަ ކަން ބުނެވުނު 109 ވަނަ މާއްދާގެ (ޅ) އަށް އެއްކޮށް ބެލުމުން އެނގޭ. ޖިނާއީ ހުކުމަކަށް ތަންފީޒީ ބާރު ލިބޭނީ އެ ހުކުމެއް ނިހާއީ ހުކުމަކަށް ވެގެން. ހުކުމެއް ނިހާއީ ހުކުމަކަށް ވާނީ އާންމު އުސޫލެއްގެ ގޮތުން، އިސްތިއުނާފުކުރުމުގެ ހައްގު ލިބިގެންވާ ފަރާތުން އެ ހައްގު ސަރީހާކޮށް ދޫކޮށްލުން ނުވަތަ އިސްތިއުނާފު ކުރުމުގެ މުއްދަތުގައި އިސްތިއުނާފު ނުކުރުން ނުވަތަ އިސްތިއުނާފުގެ ޝަރްއީ އެންމެހައި މަރްހާލާތައް ހުކުމަށް ތާއީދުކޮށްގެން ނިމުން،" އަބްދުﷲ ދީދީ ވިދާޅުވިއެވެ.
އެހެންކަމުން ޔާމީނަކީ ހުކުމެއް ތަންފީޒުކުރަމުންދާ މީހެއް ކަމަށް އީސީން ބުނާ އިރު، އެ ހުކުމަކީ އިސްތިއުނާފު ކުރުމުގެ ސަބަބުން ގާނޫނީ ގޮތުން ހުއްޓިފައިވާ ހުކުމެއް ކަމަށް އަބްދުﷲ ދީދީ ވިދާޅުވިއެވެ. ޝަރުއީ ނިޒާމުތަކާ އަދި ގާނޫނާ ހިލާފު ހުކުމެއް، ތަންފީޒުކުރަން ބަންދުގައި ޔާމީން ހުރުމަކީ އެއީ ތަންފީޒުކުރަމުންދާ ހުކުމެއް ކަމަށް ބަލަންޖެހޭ ސަބަބެއް ނޫން ކަމަށްވެސް އަބްދުﷲ ދީދީ ވިދާޅުވިއެވެ.
ޔާމީންގެ ކެންޑިޑެސީ ބަލައިނުގަންނަން އީސީން ނިންމި މައްސަލަ ސުޕްރީމް ކޯޓަށް ހުށަހަޅާނެ ކަމަށް ޔާމީންގެ ރަނިންމޭޓު އަދި އެ މަނިކުފާނުގެ ގާނޫނީ ވަކީލު ޑރ. މުހައްމަދު ޖަމީލު އަހުމަދު ވަނީ މިއަދު ވިދާޅުވެފައެވެ.
ވ. އާރަށް ކުއްޔަށް ދިނުމުގައި ކޮރަޕްޝަނާއި މަނީލޯންޑާ ކުރިކަން ސާބިތުވުމުގެ ސަބަބުން ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރަމުންނެވެ.
ގާނޫނު ބުނާގޮތުން އީސީއަށް ކެނޑިޑެންސީ ފޯމު ހުށަހަޅާތާ، 48 ގަޑިއިރު ހަމަވުމަށްފަހު، ފަސް ދުވަހުގެ ތެރޭގައި އެ މައްސަލަ ސުޕްރީމް ކޯޓަށް ހުށަހަޅަން ފަސް ދުވަހުގެ މުއްދަތެއް ލިބޭނެއެވެ. އެއީ އީސީއަށް ފޯމު ހުށަހެޅުމުން އިސީން ޖަވާބުދޭން ޖެހޭ މުއްދަތެއް ކަމަށް ގާނޫނުގައި ކަނޑައަޅާފައިވަނީ 48 ގަޑިއިރު ކަމަށްވާތީއެވެ. އަދި އެ މައްސަލަ ސުޕްރީމް ކޯޓަށް ހުށަހަޅާތާ ހަތް ދުވަހުގެ ތެރޭގައި އެ މައްސަލަ ނިންމަން ސުޕްރީމް ކޯޓަށް ގާނޫނު ލާޒިމް ކުރެއެވެ.