ޢަލީ އިޙްޞާން ފިރާޤް
 
މުޢާވިޔަތުގެފާނުގެ ޢިލްމުވެރިކަން:
އަމީރު މުޢާވިޔަތުގެފާނަކީ ޞަޙާބީންގެ ތެރެއިން ޢިލްމުވެރިކަމުގެ ރޮނގުން މަޝްހޫރު ބޭކަލެކެވެ. އެކަލޭގެފާނުވަނީ މާތް ރަސޫލާގެ ޙަދީޘް ބަސްފުޅުތައް ރިވާކުރެއްވުމުގެ ޝަރަފު ހާސިލު ކުރައްވައިފައެވެ. އެއްވެސް މެދުވެރިއެއްނެތި ސީދާ މާތް ރަސޫލާގެ ޙަދީޘް ބަސްފުޅުތައް ރިވާކުރެއްވުމުގެ އިތުރުން މުޢާވިޔަތުގެފާނަކީ ޞަޙާބީންގެ ތެރެއިން ކުރިއަށް ތިއްބެވި ބޭކައުކަނބަލުންގެ ފަރާތްޕުޅުންވެސް ޙަދީޘް ރިވާކުރައްވައިފައެވެ. 
އަމީރު މުޢާވިޔަތުގެފާނު އެބޭކައުކަނބަލުންގެ ފަރާތްޕުޅުން ޙަދީޘް ރިވާކުރެއްވި ޞަޙާބީންގެ ތެރޭގައި، އަމީރުލް މުއުމިނީން އަބޫބަކުރުއް ޞިއްދީޤު ރަޟިޔަﷲ ޢަންހުއާއި، އަމީރުލް މުއުމިނީން ޢުމަރު ބުނުލް ޚައްޠާބު ރަޟިޔަﷲ ޢަންހުއާއި، އުއްމުލް މުއުމިނީން އުއްމުޙަބީބާ ރަޟިޔަﷲ ޢަންހާ ފަދަ ބޭފުޅުން ހިމެނިވަޑައިގަންނަވައެވެ. 
ޞަޙާބީންގެ ތެރެއިން ދަރަޖަ މަތިވެރި ބޭކަލުންވެސް އަމީރު މުޢާވިޔަތުގެފާނުގެ އަރިހުން ޙަދީޘް ރިވާކުރެއްވިއެވެ. އޭގެ ތެރޭގައި އިބްނު ޢައްބާސްގެފާނާއި، އިބްނު ޢުމަރުގެފާނާއި، އިބްނު ޒުބައިރުގެފާނާއި، ޖަރީރުގެފާނާއި، މުޢާވިޔަތު ބިން ޚުދައިޖާއި، ނުޢުމާން ބިން ބަޞީރު އާއި އަބޫ ސަޢީދުލް ޚުދުރީއާއި، އަބޫއުމާމަތުގެފާނު ހިމެނިވަޑައިގަންނަވައެވެ. 
ޠާބިޢީންގެ ތެރެއިން ވަރަށް ގިނަ އަދަދެއްގެ ބޭކަލުން އަމީރު މުޢާވިޔަތުގެފާނުގެ އަރިހުން ޙަދީޘް ރިވާކުރެއްވިއެވެ. އޭގެ ތެރޭގައި ޖުބައިރުގެފާނާއި، އަބޫ އިދްރީސުލް ޚައުލާނީއާއި، ސަޢީދު ބިން މުޞައްޔަބާއި، އަބޫޞާލިޙާއި، ޢަބްދުﷲ ބިން ޙާރިޘާއި، ޤައިސް ބިން ޙާޒިމް ފަދަ ބޭކަލުން ހިމެނިވަޑައިގަންނަވައެވެ. 
އަމީރު މުޢާވިޔާ ރަޟިޔަﷲ ޢަންހުގެ އަރިހުން މުޅިއަކު 163 ޙަދީޘް ރިވާވެގެން އައިސްފައިވެއެވެ. އޭގެ ތެރެއިން ބުޚާރީއާއި މުސްލިމު އިއްތިފާޤުވެވަޑައިގެންފައިވަނީ ހަތަރު ޙަދީޘަކާމެދުގައެވެ. މީގެ އިތުރަށް ބުޚާރީގައި ހަތަރު ޙަދީޘް، މުސްލިމުގައި ފަސް ޙަދީޘް ރިވާވެގެން އައިސްފައިވެއެވެ.{ޙަކީމުލް އުއްމަތި މުފްތީ އަޙްމަދު ޔާރް ޚާން ނަޢީމީ، އަ ރިފްލެކްޝަން އެޕޯން އަމީރު މުޢާވިޔާ ރަޟިޔަﷲ ޢަންހު، ޞަފްޙާ 70-71} 
ފިޤުހުވެރި މުޖްތަހިދެއް: 
އަމީރު މުޢާވިޔަތުގެފާނަކީ ދީނުގެ ޙުކުމްތަކާއި ޙިކުމަތްތައް ވަރަށް ރަނގަޅަށް ދެނެވަޑައިގަންނަވާ ބޭކަލެކެވެ. ދީނުގެ ފިޤުހުވެރިއެކެވެ. މުޖުތަހިދެކެވެ. އިމާމު ބުޚާރީ ރިވާ ކުރައްވައިފައިއެވެ. އެއްފަހަރަކު އިބްނު ޢައްބާސް ރަޟިޔަﷲ ޢަންހުގެ އަރިހުގައި މީހަކު ދެންނެވިއެވެ. އަމީރު މުޢާވިޔަތުގެފާނު ވިތުރި ކުރައްވާއިރު ކުރައްވަނީ އެންމެ ރަކުޢަތެކެވެ. އެހިނދު އިބްނު ޢައްބާސްގެފާނު ވިދާޅުވިއެވެ. [އެކަލޭގެފާނަކީ ފިޤުހުވެރިއެކެވެ.] މުރާދަކީ އެކަލޭގެފާނު ކަންތައް ކުރެއްވީ ރަނގަޅަށެވެ. އެއީ މުޖުތަހިދެކެވެ. 
އިބްނު ޢައްބާސްގެފާނަކީ ޙިބްރުލް އުއްމަތުގެ ނަންފުޅުން މަޝްހޫރުވެވަޑައިގެންފައިވާ ބޭކަލެކެވެ. ޢިލްމުގެ ކަނޑުގެ ގޮތުގައި މަޝްހޫރުވެވަޑައިގެންފައިވާ ބޭކަލެކެވެ. ޤުރްއާން ތަފްސީރު ކުރައްވަން އެންމެ މޮޅު ޞަޙާބީއެވެ. އެކަލޭގެފާނުވެސް އެވަނީ މުޢާވިޔަތުގެފާނުގެ ޢިލްމުވެރިކަމަށް އިޢުތިރާފުވެވަޑައިގެންފައެވެ.{ޙަކީމުލް އުއްމަތި މުފްތީ އަޙްމަދު ޔާރް ޚާން ނަޢީމީ، އަ ރިފްލެކްޝަން އެޕޯން އަމީރު މުޢާވިޔާ ރަޟިޔަﷲ ޢަންހު، ޞަފްޙާ 63-64}