ޗައިނާގެ އީކޮމާސް ޖަޔަންޓް ތެމޫއިން މިހާރު ޕޯސްޓް މެދުވެރިކޮށް މުދާ ގެނެސްދެ އެވެ. ޑައިރެކްޓް ޝިޕްކޮށްދެ އެވެ. ތެމޫ އައުމުގެ އެއް ސަބަބަކީ ރާއްޖެއާއި ޗައިނާއާ ދެމެދު ހެދި އެފްޓީއޭ އެވެ.
ދުނިޔޭގައި މިހާރު އެންމެ ބާރަށް ހިނގާ ވިޔަފާރިއަކީ އޮންލައިން ވިޔަފާރި އެވެ. މިއާއެކު ދުނިޔޭގެ އޮންލައިން ޕްލެޓްފޯމްތަކުގައި ވާދަވެރިކަން ވެސް މިވަނީ އިންތިހާ އަށް ބޮޑުވެފަ އެވެ. އޮންލައިން ވިޔަފާރީގައި ދުނިޔޭގެ ގަދަބާރު ޗައިނާ އިން މުޅި ދުނިޔެ ފަތަހަ ކޮށްފައިވާއިރު މިކަމުން ސަލާމަތް ވޭ ތޯ ވާދަވެރި އެމެރިކާ އިން މިހާތަނަށް ކުރި ހުރިހާ މަސައްކަތް ދިޔައީ ތޮޅި އަށެވެ. އެމެރިކާއި ން ޗައިނާގެ ޝެއިންއާ ޖައްސާލުމާއެކު ޗައިނާ އިން ދުނިޔޭގައި ވަރުގަދަ ކުރީ އެ ގައުމުގެ ކޮމާސް ޖަޔަންޓް ތެމޫ އެވެ. މިހާރު މި ތެމޫގެ ބާރު މިވަނީ ދުނިޔޭގައި ގަދަވެފަ އެވެ. އަގު ހެޔޮކޮށް މުދާ ވިއްކާ ޗައިނާގެ ތެމޫގެ ކަންތައް އެންމެ ބޮޑަށް މިހާރު ފެންނަ އެއް ގައުމަކަށް ރާއްޖެ ވާނެ އެވެ. މުޅި ސޯޝަލް މީޑިއާ ޕްލެޓްފޯމްތައް "ފްލަޑް" ވެފައިވަނީ ތެމޫގެ އިސްތިހާރު ތަކެވެ. އެންމެން ދައްކަނީ އެ ވާހަކަ އެވެ. 
ތެމޫ ރާއްޖެއާ ކުއްލިއަކަށް ގާތް ވެގެން މި އުޅެނީ ކީއް ހެއްޔެވެ؟ މި މީހުން ދިވެހިންނާ "އަޅައި ގަނެގެން" އުޅޭ ސަބަބެއް ވެސް އޮންނާނެ އެވެ. ދުނިޔޭގެ އެންމެ ބޮޑު ގައުމުގެ އެންމެ ވަރުގަދަ ޕްލެޓްފޯމުން ރާއްޖެ އަށް ހާއްސަކޮށް އިސްތިހާރު ކުރަނީ ކީއް ވެގެން ހެއްޔެވެ؟ ޗައިނާގެ ތެމޫއަކީ ކުރިން އޮންލައިން ވިޔަފާރި ކުރާ ދިވެހިން އެހާ ފަރިތަ އޮންލައިން "ފިހާރަ" އެއް ނޫނެވެ. އެކަމަކު މިހާރު ފޭސްބުކް އާއި އިންޓަގްރާމް ފަދަ ސޯޝަލް މީޑިއާގެ ޕްލެޓްފޯމްތައް ހުޅުވާލުމުން ވޯލްގައި ތަތްވެފައިވާތަން މުޅިންވެސް ފެންނަނީ ތެމޫގެ އިސްތިހާރު ތަކެވެ. ދުނިޔޭގެ އެކިއެކި ކޮންޓެންޓް ކްރިއޭޓަރުން ބޭނުންކޮށްގެން ތެމޫ އިން ރާއްޖެ އަށް މިހާރު ފަށާފައިވާ ވަރުގަދަ މާކެޓިން ހަރަކާތްތަކާއެކު ގިނަ ދިވެހިން ތެމޫއާ ގާތްވެވެސް ވެއްޖެކަމަށް ފެނެ އެވެ. "ފޭސްބުކް ހުޅުވޭ ވަރެއް ނޫން. މުޅި ފޭސްބުކް އަބަދު ފެންނަނީ ތެމޫ،" ރައްޓެއްސަކު ފޭސްބުކްގައި ލިޔެފައިވެ އެވެ. 
ކުޑަކުޑަ ރާއްޖޭގެ މާކެޓަށް ތެމޫގެ މުހިންމުކަން ބޮޑުވުމުގައި ގިނަ ސަބަބު ތަކެއްވެ އެވެ. މީގެ އެއް ސަބަބަކީ ތެމޫ އާއި ރާއްޖޭގެ ގައުމީ ޕޯޓްސްޓުގެ ހިދުމަތް މޯލްޑިވްސް ޕޯސްޓް ލިމިޑެޓްއާއެކު މިދިޔަ ރޯދަ މަހު ވެވުނު އެއްބަސްވުމެވެ. މި އެއްބަސްވުމާއެކު ތެމޫ އިން މިހާރު ޑައިރެކްޓްކޮށް ރާއްޖެއަށް ޝިޕް ކޮން ދޭން ފަށައިިފި އެވެ. އަނެއް ސަބަބަކީ ރާއްޖެ އާއި ޗައިނާއާ ދެމެދު ހެދި ފްރީޓްރޭޑް އެއްބަސްވުމެވެ.ތެމޫ އާއި އާއްމުކޮށް ދިވެހިން ތަކެތި ގަންނަ އަލީ އެކްސްޕްރެސް ފަދަ ޕްލެޓްފޯމްތަކާ ތަފާތުކަމެއް ހުރެ އެވެ. މި ޕްލެޓްފޯމުން ވިޔަފާރި ކުރާނަމަ އެންމެ މަދުވެެގެން 10 ޑޮލަރުގެ ވިޔަފާރި ކުރަން ޖެހެ އެވެ. އަދި މި ތެމޫގެ ވިޔަފާރީގެ ފަލްސަފާގައި ވެސް ކަސްޓަމަރުން ޝައުގުވެރި ކުރުވާނެ ގިނަ ސިފަތަކެއްވެ އެވެ. މިގޮތުން ޝެއިން ފަދަ ޕްލެޓްފޯމްތަކުގައި އޮންނަ ގޮތަށް ގަންނަ ހުރިހާ އެއްޗެއް އެ ޕެކޭޖެއްގެ ގޮތުގައި ހަދާފައި ރާއްޖެއަށް ފޮނުވާލަ ދެ އެވެ. އަދި ތެމޫގެ އެންމެ މުހިންމު އެއް ކަމަކީ ގަންނަ ކޮންމެ މުދަލެއް ވެސް ހަފުތާއެއްގެ ތެރޭގައި ރާއްޖެއަށް ފޯރުމެވެ. އަދި ޕެކޭޖުގެ ޓްރެކިން ވެސް ލިބުމެވެ.މި ޕްލެޓްފޯމް އިން ވެސް ވިޔަފާރި ކުރުމުގައި މުދަލުގެ ކޮލެޓީ ޔަގީން ކުރަން ޖެހެ އެވެ. އެކަން ކުރެވޭނީ ކަސްޓަމަރުންގެ ރިވިއުއިންނެވެ. އެކަމަކު ތެމޫގައި ދިވެހިންގެ ގިނަ ބަޔަކު ބޭނުންވާނެ އަދި ވިޔަފާރީގައި ބޭނުން ކުރެވިދާނެ ގިނަ ބާވަތްތަކުގެ މުދާ ހުރެ އެވެ. ހާއްސަކޮށް ޒުވާނުންގެ މެދުގައި މަގުބޫލް ސްޕޯޓްސް ފިޝިން ފަދަ ކަންކަމަށް ބޭނުން ކުރާ ގިނަ ބާވަތްތަކުގެ މުދާ އަގު ހެޔޮކޮށް ލިބެން ހުރެ އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ