ހދ. ކުޅުދުއްފުށި ސިޓީގައި މި ރޯދަމަހު ކަރަންޓު ކެނޑޭތީ ދިމާވި ދަތިތަކުގެ ސަބަބުން މި މަހު އެ ރަށުގެ ހުރިހާ ކަރަންޓު ބިލަކަށް 50 ޕަސެންޓްގެ ޑިސްކައުންޓް ދޭން ފެނަކަ ކޯޕަރޭޝަނުން ނިންމައިފި އެވެ.
ކުޅުދުއްފުއްޓަށް ކަރަންޓު ދިނުމަށް ހަތް ޖަނަރޭޓަރު ބޭނުންކުރި ނަމަވެސް ހޫނު ގަދަވުމުގެ ސަބަބުން ލޯޑް ނުހިފެހެއްޓި، އެ ރަށުގައި ހުރި ޖަނަރޭޓަރުތަކުން ރަށަށް ބޭނުންވާ ވަރަށް ކަރަންޓު ނުއުފެއްދޭތީ ކޮންމެ ދުވަހަކު ވެސް ވަކި ގަޑިތަކެއްގައި ރަށުން ދަނީ ކަރަންޓް ކަނޑަމުންނެވެ. އެކަމާ ގުޅިގެން ކުޅުދުއްފުށި ރައްޔިތުން މިރޭ ވަނީ މުޒާހަރާއަށް ނުކުމެފަ އެވެ.