ހުޅުމާލޭ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފްލެޓްތަކުގައި އަލަށް ހަރުކުރާ ލިފްޓުތަކަށް 278 މިލިއަން ރުފިޔާ ޚަރަދުވާ ކަމަށް ހައުސިންގް ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގް ޑިރެކްޓަރު އިބްރާހިމް ފަޒުލް ރަޝީދު ވިދާޅުވެއްޖެއެވެ.
ބުދަ ދުވަހު ބޭއްވި ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި މެމްބަރުން ކުރެއްވި ސުވާލުތަކަށް ޖަވާބުދެއްވަމުން ފަޒުލް ވިދާޅުވީ ހިޔާ ޓަވަރުތަކުގައި އިތުރު ލިފްޓު ހަރުކުރުމުގެ މަސައްކަތުގެ ދަށުން 32 ލިފްޓު ގަތް ކަމަށެވެ. އަދި އެކަމަށް 18 މިލިއަން ޑޮލަރު (278 މިލިއަން ރުފިޔާ) ޚަރަދުވި ކަމަށެވެ.
އެ މަސައްކަތް ކުރުމަށް މި އަހަރުގެ ބަޖެޓުގައި 200 މިލިއަން ރުފިޔާ ހިމެނި ނަމަވެސް ފަހުން އެ އަދަދު ވަނީ 100 މިލިއަން ރުފިޔާ އަށް ކުޑަކޮށްފައެވެ.
ހިޔާ ފްލެޓްތަކުގައި ދިރިއުޅެމުންދާ ފަރާތްތަކަށް ދިމާވާ ލިފްޓްގެ ދަތިކަމަށް ހައްލެއް ގެނައުމަށް ކުރަމުންދާ މަސައްކަތުގެ ތެރެއިން ކޮންމެ ޓަވަރެއްގައި އިތުރު ދެ ލިފްޓު ހަރުކުރަން ވަނީ ނިންމާފައެވެ.
ހިޔާގެ 16 ޓަވަރުގެ ތެރެއިން ކޮންމެ ޓަވަރެއްގައި 3 ނުވަތަ 4 ލިފްޓު ހުރިނަމަވެސް ލިފްޓްތައް މަދުވެ އާއްމުންނަށްއަންނަނީ ދަތިތަކާ ކުރިމަތިވަމުންނެވެ. އެއާއެކު ހިޔާ ފްލެޓްތަކުގައި ޖުމްލަ 32 ލިފްޓް ބެހެއްޓުމަށްވަނީ ހަމަޖެހިފައިއެވެ. އެއީ ސްޓްރެޗަރ ނުވަތަ ބަލިމީހުން އުފުލޭނެ ލިފްޓެއްގެ އިތުރުން 14 މީހުންގެ ޖާގައިގެ ލިފްޓެކެވެ.
ހިޔާ ފްލެޓްތަކުގައި އިތުރު ލިފްޓު ހަރުކުރުމުގެ މަސައްކަތަކީ އެޗްޑީސީން ޝެންޔަންގް ޔުއާން އިންޓެލެކްޗުއަލް ގުރޫޕާ ހަވާލުކޮށްގެން ކުރިއަށްގެންދާ މަޝްރޫއެކެވެ. ކޮންޓްރެކްޓްގައި އޮތްގޮތަށް އަހަރު ދުވަސްތެރޭ މަސައްކަތް ނިންމާލެވޭނެ ކަމަށް ވެސް އެޗްޑީސީން ވަނީ ހާމަކޮށްފައެވެ.
ހިޔާ ޓަވަރުގައި އިތުރު ލިފްޓް ހަރުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.