މެންޗެސްޓާ (އޮގަސްޓް 30) - ބްރެޒިލްގެ ފޯވާޑް، އެންޓޮނީ، މެންޗެސްޓާ ޔުނައިޓެޑުން ރެއާލް ބެޓިސް އަށް ބަދަލުވުމަށް ކުރެވުނު މަޝްވަރާތަކުގައި މުސާރައާ ގުޅޭ ކަމެއް ނުނިމިގެން އެ ޑީލަށް ހުއްޓުމެއް އަތުވެއްޖެ އެވެ.
އަޔަކްސް ދޫކޮށް، 2022 ވަނަ އަހަރުގެ ސެޕްޓެމްބަރު މަހު، މެންޗެސްޓާ ޔުނައިޓެޑަށް އެ ކްލަބްގެ ދެ ވަނަ އަށް އެންމެ އަގުބޮޑު ޓްރާންސްފާގެ ގޮތުގައި ބަދަލުވި، އެންޓޮނީ، 25، އެ ކްލަބާ ގުޅުނީ 110 މިލިއަން ޑޮލަރަށެވެ. މީގެ ތިން އަހަރު ކުރިން، ބޮޑު އަގުގައި، ޔުނައިޓެޑާ ގުޅުމަށް އެ ލެވަލްގެ ކުޅުމެއް ނުދެއްކޭތީ ފާޑުކިޔުންތަކެއް އަމާޒުވެފައިވާ، އެންޓޮނީ ޖެނުއަރީ ޓްރާންސްފާގައި ލޯން ޑީލެއްގައި ބެޓިސް އަށް ބަދަލުވެ، ތަފާތު މޮޅު ކުޅުމެއް ދެއްކި އެވެ. އެހެންވެ، މި ފަހަރުގެ ޓްރާންސްފާގައި ގިނަ ޓީމުތަކެއްގެ އޮފާ ދޫކޮށްލާފައި އެންޓޮނީ މަޑުކޮށްގެން ހުރީ ބެޓިސް އަށް ދެވޭނެ ގޮތެއް ހޯދުމަށެވެ.
ބެޓިސް އިން ޔުނައިޓެޑާ އެކު، އެންޓޮނީގެ ޓްރާންސްފާ ކަންތަކުގައި އެއްބަސްވުމަކަށް އައިސްފައިވަނިކޮށް ކުރިމަތިވީ އެެހެން މައްސަލައެކެވެ. ޔުނައިޓެޑާއި އެންޓޮނީގެ މެދުގައި ހެދިފައި އޮތް ކޮންޓްރެކްޓްގައިވާ ގޮތުން، އޭނާ ދޫކޮށްލާނަމަ، ކޮންޓްރެކްޓްގެ ބާކީ މުއްދަތަށްވާ މުސާރައިގެ ތެރެއިން ދެ ފަރާތަށް އެއްބަސްވެވޭ އަދަދެއް ދޭން ޖެހެ އެވެ.
އެކަމަކު، ޔުނައިޓެޑްގެ މާލީ ހާލަތު އޮތްގޮތުން، ކުޑަ އަގެއްގައި، އެންޓޮނީ، ބެޓިސް އަށް ދޫކޮށްލަން އެއްބަސްވީ މުސާރައިގެ އެ ބައި، ނުދޭ ގޮތަށެވެ. އެކަމަކު، އެންޓޮނީގެ ފަރާތުން އަންނަނީ، މި ބައި، ބެޓިސް ނޫނީ ޔުނައިޓެޑްގެ ފަރާތުން ލިބެންޖެހޭ ކަމަށް ބުނަމުންނެވެ. އެހެންވެ، އެ ޑީލަށް ވަނީ ހުއްޓުމެއް އަތުވެފަ އެވެ.
ބެޓިސް އިން ބަޔާނެއް ނެރެ ބުނެފައިވަނީ، އެ ކްލަބުން އެންޓޮނީ ގެންނަން ކުރި އޮފާ މި ވަގުތަށް އަނބުރާ ގެނެސްފައިވާ ކަމަށެވެ.
މިދިޔަ ސީޒަނުގައި، ބެޓިސް އިން ޔުއެފާ ކޮންފަރެެންސް ލީގުގެ ފައިނަލަށް ދަތުރުކުރިއިރު، މޮޅު ކުޅުމެއް ދެއްކި އެންޓޮނީ ވަނީ ބެޓިސް އަށް ކުޅެދިން 25 މެޗުން އަށް ގޯލު ޖަހައި، ފަސް ގޯލު ޖަހަން ފުރުސަތު ތަނަވަސްކޮށްދީފަ އެވެ. އެންޓޮނީ ވެސް ބެޓިސްގައި މަޑުކުރަން ބޭނުންވާއިރު، އޭނާ ދާއިމީ ކޮންޓްރެކްޓެއްގައި ބެޓިސް އަށް ބަދަލުވާން ޔުނައިޓެޑުން ފުރަތަމަ ކީ އަގު އުޅެނީ، 50-65 މިލިއަން ޑޮލަރާ ދެމެދުގަ އެވެ. އެކަމަކު، މިހާރު، ޝަރުތުތަކެއް ކަނޑައަޅައި، އެ އަގު، 30 މިލިއަން ޑޮލަރަށް ކުޑަކުރަން ވެސް ޔުނައިޓެޑުން ތައްޔާރެވެ.
މުސާރައިގެ މައްސަލައެއްގައި އެންޓޮނީގެ ބެޓިސް ޑީލަށް ހުއްޓުމެއް މުސާރައިގެ މައްސަލައެއްގައި އެންޓޮނީގެ ބެޓިސް ޑީލަށް ހުއްޓުމެއް
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ