ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު މުހައްމަދު ސައީދަށް ކޮރަޕްޝަންގެ ތުހުމަތު ކުރެވޭ މައްސަލައެއްގައި ހިމެނޭ ކައިޒާން އިންވެސްޓްމަންޓްސްއަށް 7.2 މިލިއަން ރުފިޔާ ދައްކަން އެ ކުންފުނީގެ މައްޗަށް ސިވިލް ކޯޓުން ހުކުމެއް އިއްވައިފި އެވެ.
ކައިޒާން އިންވެސްޓްމަންޓަކީ އިސްމާއިލް ޒާހިދު ކިޔާ މީހެއްގެ އަމިއްލަ ވިޔަފާރިއެކެވެ. މި މައްސަލައިގައި ހިމެނޭ އައިސް ޕްލާންޓަކީ އޭނާ ލ. މާމެންދޫގައި ގާއިމުކުރި އައިސްޕްލާންޓެކެވެ. މި އައިސް ޕްލާންޓު ގަންނަން ފެނަކައިން އެއްބަސްވީ 11.3 މިލިއަން ރުފިޔާއަށެވެ.
ޒާހިދު ކޯޓަށް މައްސަލަ ހުށަހެޅީ އައިސްޕްލާންޓަށް ދައްކަން ބުނި ފައިސާގެ ތެރެއިން ނުދައްކައިވާ 7.2 މިލިއަން ރުފިޔާ އާއި ގެއްލުމުގެ ބަދަލުގެ ގޮތުގައި 580،155.68ރ. އާއި ޝަރީއަތުގެ ހަރަދުގެ ގޮތުގައި އެއް ލައްކަ ރުފިޔާ ހިމެނޭހެން ޖުމުލަ 7.9 މިލިއަން ރުފިޔާ ނަގައިދިނުމަށް އެދި އެވެ.
މި ދައުވާއާ ގުޅިގެން ފެނަކައިން ވަނީ އައިސް ޕްލާންޓަށް ނުދައްކައިވާ 7.2 މިލިއަން ރުފިޔާ ދައްކަން ޖެހޭ ކަމަށް އެއްބަސްވެ، އަހަރަކަށް ބަހާލައިގެން ކޮންމެ މަހަކަށް ޖެހޭ ވަރު ދައްކަން ނޫނީ މަޝްވަރާ ކުރުމަށް ފަހު އެއްބަސްވާ ގޮތަކަށް ފައިސާ ދައްކަން ފުރުސަތު ދިނުމަށެވެ.
ދައުވާގެ މި ބަޔަށް އެއްބަސްވީ ނަމަވެސް، ފެނަކައިން ވަނީ ގެއްލުމުގެ ބަދަލުގެ ފައިސާ އާއި ޝަރީއަތުގެ ހަރަދުގެ ބައި އިންކާރުކޮށްފަ އެވެ. ސަބަބެއް ކަމަށް ބުނީ އެއްބަސްވުމުގައި މި ކަމަށް އެއްބަސްވެވިފައި ނުވާތީ ކަމަށެވެ.
މިކަމަށް ރައްދު ދެމުން ކައިޒާންއިން ބުނީ، ކޮންޓްރެކްޓާ ބެހޭ ގާނޫނުގެ ދަށުން އެއްބަސްވުމާ އެއްގޮތަށް ފައިސާ ނުލިބި ގެއްލުންވާ ކޮންމެ ދުވަހަކީ، އެ ގެއްލުމަށް ފެނަކައިން ޒިންމާވާން ޖެހޭނެ ދުވަހެއް ކަމަށެވެ. ނަމަވެސް ކޯޓުން ވަނީ މި ނުކުތާގައި ފެނަކަ ކޮޅަށް ބުރަވެ، ބަދަލު ނަގައިދެވޭނެ ޝަރުއީ އަދި ގާނޫނީ ހަމައެއް ނެތް ކަމަށެވެ.
ޝަރީއަތުގެ ހަރަދު ނަަގައިދިނުމާ މެދު ވެސް ކޯޓުން ބުނީ، ނަގައިދޭން އެދިފައިވާ އެއް ލައްކަ ރުފިޔާ ހަރަދު ކުރި ގޮތާއި ހަރަދު ކުރި ކަންކަމުގެ ތަފުސީލުތައް ހުށަހަޅާފައި ނެތުމުން އެ ހަރަދު ވެސް ނަގައިދެވެން ނެތް ކަމަށެވެ.
އައިސް ޕްލާންޓަށް ފައިސާ ދައްކަން އަހަރު ދުވަހުގެ މުއްދަތެއް ދޭން ފެނަކައިން އެދުނަސް، ކައިޒާންއިން ވަނީ އެކަމަށް ދެކޮޅު ހަދާފަ އެވެ. އެހެންވެ ކޯޓުން ހުކުމް ކުރީ ކައިޒާންއިން އެދުނު ގޮތަށް ފައިސާ ދައްކަން 30 ދުވަހުގެ މުއްދަތެއް ދިނުމަށެވެ.
އައިސް ޕްލާންޓު މައްސަލައިގައި އެންޓި ކޮރަޕްޝަން ކޮމިޝަނު (އޭސީސީ) އިން ވަނީ އޭނާ އާއި މި އައިސްޕްލާނުގެ އަގުމަގު ކުރި ފެނަކައިގެ ކުރީގެ އެކައުންޓެންޓް މުހައްމަދު މަސްއޫދުގެ މައްޗަށް ދައުވާ ކުރަން އެދި ޕްރޮސެކިއުޓާ ޖެނެރަލް އޮފީހަށް ފޮނުވާފަ އެވެ.