ގައުމީ ޓީވީ، ޓިވީއެމް އާއީ ރޭޑިއޯ، ދިވެހި ރާއްޖޭގެ އަޑު ހިންގާ ކުންފުނި މޯލްޑިވްސް ބްރޮޑްކާސްޓިން ކޯޕަރޭޝަން (އެމްބީސީ)ގެ ހަރަދުތައް ދެކޮޅު ނުޖެއްސި، ކަރަންޓް ބިލްތައް ނުދެއްކި ވަނިކޮށް، އިތުރު ނޫސްވެރިންތަކެއް އެ ސްޓޭޝަންގެ ވަޒީފާ އަށް ވެއްދުމުގެ މަސައްކަތް ފަށައިފި އެވެ.
މި މަހުގެ ކުރީކޮޅު ސަރުކާރުގެ ގެޒެޓްގައި ނޫސްވެރިން ހޯދުމަށް އެމްބީސީން ކުރި އިއުލާނުގައި 22 ނޫސްވެރިއަކު ހޯދުމަށް ވަނީ އިއުލާންކޮށްފަ އެވެ. އެ މަގާމުތަކަށް ކުރިމަތިލުމުގެ މުއްދަތު ވެސް ވަނީ މި މަހުގެ 11 ވަނަ ދުވަހަށް ހަމަވެފަ އެވެ. އޭގެ ތެރެއިން 10 ނޫސްވެރިން އަތޮޅުތަކަށް ފޮނުވާއިރު 12 ނޫސްވެރިން މަސައްކަތް ކުރާނީ އެ ކުންފުނީގެ މައި ނިއުސްރޫމުގައި ކަމަށް އިއުލާނުގައިވެ އެވެ.
އެމްބީސީގެ މެނޭޖިން ޑިރެކްޓާ މުހަންމަދު ޝަފީގް މަހުމޫދު މިއަދު ސަން އޮންލައިނަށް ވިދާޅުވީ އެ ކުންފުނީގެ ސްޓޭޝަންތަކުގައި މަސައްކަތް ކުރުމަށް އިތުރު 22 ނޫސްވެރިއަކު ވެއްދުމަށް ނިންމާފައި ވަނީ ނިއުސްރޫމްގެ ކެޕޭސިޓީ އިތުރުކޮށް އާންމުންނަށް ފޯރުކޮށްދޭ ހަބަރާއި މައުލޫމާތު މުއްސަނދި ކުރުމަށް ކަމަށެވެ. އަދި އާ ނޫސްވެރިން ނަގަނީ މަދު ޖާގަތަކަށް ކަމަށް ވެސް ވިދާޅުވި އެވެ.
"ނިއުސްރޫމްތެރޭގައި އެބަތިބި މިހާރު ވެސް އަތޮޅުތަކުގައި މަސައްކަތްކޮށްފައި ތިބި ހަތަރު ކުއްޖަކު، އެ މީހުން އެތަންތަނަށް އަނބުރާ ދާނެ. އެމީހުން ދިޔައިމާ މަދުމަދުވާ ތަންތަނަށް ނަގާ 12 ކުއްޖަކާއި ނިއުސްރޫމްތެރޭގައި މަސައްކަތް ކުރަން ނަގާ 10 މުވައްޒިފަކާ އެއްކޮށް އެކަން ރޭވިފައި އެ އޮތީ،" ޝަފީގް ވިދާޅުވި އެވެ.
ދިވެހިރާއްޖޭގެ އަޑާއި ޓީވީއެމް އެއްކޮަށްލައިގެން ހިންގާ ނިއުސްރޫމްގައި 33 ޖާނަލިސްޓުން މަސައްކަތް ކުރެ އެވެ.
އެމްބީސީގެ އިއުލާނުގައިވާ ގޮތުން އެމްބީސީން ނޫސްވެރިން ފޮނުވަނީ ހއ. ދިއްދޫ، ހދ. ކުޅުދުއްފުށި، ށ. ފޮނަދޫ، ބ. އޭދަފުށީ، ޅ. ނައިފަރު، އއ. ރަސްދޫ، އދ. މަހިބަދޫ، ފ. ނިލަންދޫ، ދ. ކުޑަހުވަދޫ، ތ. ވޭމަންޑޫ، ލ. ފޮނަދޫ އަދި ފުވައްމުލަކަށެވެ.
ޝަފީގް ވިދާޅުވީ އަލަށް ނަގާ ނޫސްވެރިންނަށް ތިން މަސް ދުވަހުގެ ތަމްރީން ޕްރޮގްރާމެއް ކުރިއަށް ގެންދަން ރާވާފައިވާ ކަމަށެވެ. އަދި އަލަށް ވައްދާ ނޫސްވެރިންނާ އެކު ނޮވެމްބަރު ޑިސެމްބަރުގައި އެ ކުންފުނީގެ ހިއުމަން ރިސޯސް ރިސާޗެއް ކުރިއަށް ގެންދާނެ ކަމަށާއި އެއަށް ފަހު ނިއުސްރޫމާއި ޕްރޮޑަކްޝަން ޑިޕާޓްމަންޓުން މުވައްޒަފުން މަދުކުރަން ޖެހޭ ނަމަ އެކަން ވެސް ކުރާނެ ކަމަށެވެ.
"އަޅުގަނޑުމެން ބަލަމުން މިދަނީ ހިއުމަން ރިސޯސް ރިސާޗެއް ހަނދަމުން. އެގޮތުން ނިއުސްރޫމާއި ޕްރޮޑަކްޝަން މިހެން ގޮސް ޑިޕާޓްމަންޓްތަކުގައި ތިބެން ޖެހޭ މުވައްޒަފުންގެ ސީދާ އަދަދު ހޯދޭނެ. އޭގެ ޑްރާފްޓް ރިޕޯޓު ވެސް ލިބި ބޯޑުގައި ވެސް މަޝްވަރާކޮށްފައި ވަނީ. ފައިނަލް ރިޕޯޓް ނޮވެމްބަރު ޑިސެމްބަރުގައި ލިބުނީމާ މަދު ކުރަން ޖެހޭ ނަމަ މަދުކުރާނެ. ހަމަ މީހުންތަކެއް ވައްދަނީއެއް ނޫން. އޭގެ އަނެއް ފަރާތުން މިބައި ވެސް ހިނގަމުންދާނެ،" ޝަފީގް ވިދާޅުވި އެވެ.
އެމްބީސީން ކޮށްފައިވާ އިއުލާނުގައި އެސިސްޓެންޓް ޖާނަލިސްޓެއްގެ ބޭސިކް މުސާރައަށް 5000ރ. ހިމަނާފައިވާ އިރު 3000ރ.ގެ އެލަވަންސަކާ އެކު ނޫސްވެރިއަކަށް 8000ރ.ގެ މުސާރައެއް ކަނޑައަޅާފައިވެ އެވެ.
އަލަށް ވައްދާ 22 ނޫސްވެރިންގެ މުސާރަ އާއި އެލަވަންސަށް އެމްބީސީން މަހަކު 176،000ރ. އިތުރަށް ހަރަދު ކުރަން ޖެހޭނެ އެވެ.
އެމްބީސީންގެ ފަސް މަސް ދުވަހުގެ ކަރަންޓް ބިލް ނުދައްކައިގެން އަރާފައިވާ 1.7 މިލިއަން ރުފިޔާ ނުލިބިގެން މިދިޔަ އާދިއްތަ ދުވަހު ސްޓެލްކޯ އިން ވަނީ އެ ކުންފުނީގެ މައި ސްޓޭޝަން، އެމްބީސީން ކަރަންޓް ކަނޑާލަން ގޮސްފަ އެވެ. އެއާ އެކު އެ ކުންފުނިން މިހާރު ވަނީ އެ ކުންފުނިން ކުރިއަށް ގެންދާ ބައެއް ޗެނަލްތަކުގެ ޓްރާންސްމިޝަން ކޮންމެ ވަގުތަކު ވެސް މެދުކަނޑާލަން ޖެހިދާނެ ކަމުގެ އިންޒާރު ދީފަ އެވެ.
ޝަފީގު ވިދާޅުވީ އެ ކުންފުންޏަށް ފައިސާގެ ތާށިކަމެއް ކުރިމަތިވެގެން އުޅެނީ ބަޖެޓް ނުލިބިގެން ކަމަށެވެ. އަދި ބަޖެޓް ލިބުމުން އެ މައްސަލަތަކަށް ހައްލު އަންނާނެ ކަމަށް ވެސް ވިދާޅުވި އެވެ.
އެމްބީސީން ރޭ ބުނެފައި ވަނީ އެ ކުންފުނީގެ ކަރަންޓް ބިލްތައް ނުދެއްކިގެން ކަރަންޓް ކަނޑާލާ ހިސާބަށް މައްސަލަ ދިޔަ އިރު އެ ކުންފުނީގެ ފޯނު ބިލްތަކާއި އެހެނިހެން ވެސް ގިނަ ބިލްތަކަކަށް ފައިސާ ނުދައްކައި ހުރި ކަމަށާއި އެ ބިލްތައް ވެސް ދެއްކުމަށް އެ ފަރާތްތަކުން ވެސް އަންގަމުން އަންނަ ކަމަށެވެ. އަދި އެ ކުންފުނިން ގިނަ ހިދުމަތްތަކެއް ހޯދަމުން އަންނަނީ ކްރެޑިޓަށް ކަމަށް ވެސް ބުނެފައިވެ އެވެ.