1 ފެބްރުއަރީގައި ސުޕްރީމް ކޯޓުން ނެރެފައިވާ އަމުރު ތަންފީޒު ކުރުމަށް ގޮވާލައި މާލޭގެ މަޖީދީ މަގުގެ އެކި ސަރަހައްދުތަކަށް އެތައްހާސްބަޔަކު ޖަމާވެ ކުރަންފެށި އިހުތިޖާޖުގެ ތެރެއިން ހައްޔަރުކުރި އެންމެން ވަގުތުން ދޫކޮށްލުމަށް ޖުމްހޫރީ ޕާޓީން ގޮވާލައިފިއެވެ.
ޖުމްހޫރީ ޕާޓީގެ ސެކްރެޓަރީ ޖެނެރަލް އަހްމަދު ސަމީރު ކުނޫޒްގައި ހުންނަވައި ވީޓިވީއަށް ދެއްވި އިންޓަރވިއުއެއްގައި ވިދާޅުވީ، ފުލުހުން އެބޭފުޅުން ހައްޔަރު ކޮށްފައިވަނީ ސުލްހަވެރިކަމާއެކު އިހުތިޖާޖު ކުރައްވަން އެތައްހާސް ބަޔަކާއެކު ތިއްބަވަނިކޮށް ކަމަށެވެ.
އިހުތިޖާޖުގެ ބައިވެރިންނާ ދެކޮޅަށް ފުލުހުން އިންޒާރު ދިނުމެއްނެތި، ބާރުގެ ބޭނުންކޮށް ޕެޕަރ ސްޕްރޭ ޖެހިކަން ސަމީރު ފާހަގަ ކުރައްވާފައި ވެއެވެ.
އަދި ޖުމްހޫރީ ޕާޓީގެ ޑެޕިއުޓި ލީޑަރ އަބްދުﷲ ރިޔާޒްއާއި، މަޖިލީހުގެ ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދާއި، ދިއްދޫ ދާއިރާގެ މެމްބަރު އަބްދުއްލަތީފް މުހަންމަދުވެސް ހިމެނޭގޮތުން މިއަދުގެ ހަވީރުގެ އިހުތިޖާޖުގެ ތެރެއިން 14 ވަރަކަށް މީހުން ފުލުހުން ހައްޔަރު ކޮށްފައިވާ ކަމަށް އަހްމަދު ސަމީރު ފާހަގަ ކުރެއްވިއެވެ.
"ގާނޫނާ ޚިލާފަށް މިގޮތަށް މީހުން ނެގުމުގެ ސަބަބުން، އެމީހުންގެ ހައްގުތައް ގެއްލެމުންމިދަނީ. މިއީ ޣައިރުގާނޫނީ އަމަލުތަކެއް. ރައްޔިތުން ގައިތަޅައި އަނިޔާކުރުމަކީ ގަބޫލު ކުރެވޭނޭ ކަމެއްނޫން. އެ އެންމެން ވަގުތުން ދޫކޮށްލުމަށް ގޮވާލަން" ސަމީރު ވިދާޅުވިއެވެ.
ސަމީރު ވިދާޅުވީ، ފުލުހުން ހައްޔަރު ކުރި ބޭފުޅުން ތަމްސީލް ކުރެއްވުމަށް ގާނޫނީ ވަކީލުން ދިއުމުން ފުލުހުން އެ ފުރުސަތު ނުދިން ކަމަށެވެ.
"އެ ފުރުސަތު ނުދީ މިހާރު ދޫނިދޫއަށް ގެންގޮސްފައިވާ ކަމުގެ މައުލޫމާތު ލިބޭ. އެކަން ފުލުހުން ހާމަކޮށްދިނުމަށް ގޮވާލަން. އެބޭފުޅުންނާމެދު އަމަލުކުރަމުންދާގޮތް ރައްޔިތުންނަށް ހާމަކޮށްދޭންޖެހޭ. މާޒީގައި ކަން ހިނގާފައިވާ ގޮތަށް ބަލާއިރު، އެބޭފުޅުންނާމެދު ކަންބޮޑުވޭ. އެފުރުސަތު ނުދޭކަމަށް ވަންޏާ، އެއީ ވަރަށް ބޮޑު އަނިޔާވެރިކަމެއް" ސަމީރު ވިދާޅުވިއެވެ.
ޖޭޕީގެ ސެކްރެޓަރީ ޖެނެރަލް ވިދާޅުވީ، ފުލުހުން ހައްޔަރުކުރާ ފަރާތްތަކަށް އިންސާނިއްޔަތާ ޚިލާފަށް ފެން ނުދިނުމާއި، ބަލިހާލު ބޮޑުވިޔަސް ޑޮކްޓަރަށް ނުދެއްކުމާއި، ފެން ފޮދަކަށް އެދުމުން ފާޚާގައިހުރި ފެން ބުއިމަށް ބުނަމުންދާ ކަމުގެ ރިޕޯޓްތައް ލިބެމުންދާ ކަމަށެވެ.
އެހެންވެ، ސަމީރުވަނީ ހިއުމަން ރައިޓްސް ކޮމިޝަންވެސް ނިދިން ހޭލައިގެން ރައްޔިތުންނަށް މިނިވަން ކަމާއެކު މަސައްކަތް ކުރުމުގެ ފުރުސަތު ހޯދައިދިނުމަށް މަސައްކަތް ކޮށްދެއްވުމަށް ގޮވާލައްވާފައެވެ.
ސަމީރު ވިދާޅުވީ، ގުޅިފައިވާ ޕާޓީތަކުން މިރޭވެސް އިހުތިޖާޖަށް ނުކުންނާނޭ ކަމަށާއި، މާލޭގެ މަގުތަކުގައި މިހާރުވެސް އެތައް ބަޔަކު އެބަތިބި ކަމަށެވެ. މި އަނިޔާވެރި ވެރިކަމުން ދިވެހިރައްޔިތުން ސަލާމަތް ކުރުމަށް ކުރެވެންހުރި ހުރިހާކަމެއް ކުރަމުން ގެންދަވާނޭ ކަމަށްވެސް ސަމީރު ވިދާޅުވިއެވެ.