ރާއްޖޭގެ މުޅި ޑިމޮކްރެޓިކް ނިޒާމު މިވަނީ އަސްކަރިއްޔާއިން ހިސޯރުކޮށްފައި ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެ އެވެ.
ބޭސް ފަރުވާއަށް މިވަގުތު ޖަރުމަންގައި ހުންނެވި ގާސިމް އިބްރާހީމް މިއަދު ކުރެއްވި ޓްވީޓެއްގައި ވިދާޅުވީ ރާއްޖޭގެ މުޅި ޑިމޮކްރެޓިކް ނިޒާމު އަސްކަރިއްޔާއިން ހިސޯރުކޮށްފައިވާތީ ރާއްޖޭގެ އަދުލު އިންސާފުގެ ދާއިރާއާއި ގާނޫނު ހަދާ މަޖިލީހުގެ ބާރުތައް އަލުން އިޔާދަ ކުރުމަށް އދގެ އެހީ މިވަގުތު ކޮންމެހެން ބޭނުންވާ ކަމަށެވެ.
ގާސިމް އިބްރާހީމް ވިދާޅުވީ ސްޕްރީމް ކޯޓުގެ ފަނޑިޔާރުން ހައްޔަރުކޮށް އެހެން ފަނޑިޔާރުންނަށް ކުރިމަތި ކުރުވާ ފިއްތުންތަކާއި، ރައްޔިތުންގެ މަޖިލީހުގެ މެންބަރުންނަށް ދެމުންގެންދާ ލާއިންސާނީ އަނިޔާތަކުން ފެނިގެންދަނީ ރާއްޖޭގައި ގާނޫނީ ވެރިކަން ހިނގަމުން ނުދާ މަންޒަރު ކަމަށެވެ. އެހެންކަމުން ގައުމުގެ ގާނޫނު އަސާސީ އާއި ގާނޫނީ ބާރު ފުނޑުފުނޑު ވެފައިވާ ކަމަށްވެސް ގާސިމް އިބްރާހީމް ވަނީ ވިދާޅުވެފަ އެވެ.
ރާއްޖެއަށް އދގެ އެހީ ބޭނުންވާ ކަމަށް ގާސިމް އިބްރާހިމް ވިދާޅުވެފައި މިވަނީ މިއަދު ބޭއްވި ރައްޔިތުންގެ މަޖިލީހުގެ ހާއްސަ ޖަލްސާގައި ބައިވެރިވުމަށް މަޖިލީހުގެ ބައެއް މެންބަރުންނަށް ސަލާމަތީ ބާރުތަކުން ހުރަސް އެޅުމުންނެވެ.
ރާއްޖޭގެ ހާލަތު ރަނގަޅު ކުރުމަށް އދ. ފަދަ ބޭރުގެ ޖަމިއްޔާ ޖަމާއަތްތަކުގެ އެހީތެރިކަން މިވަގުތު ރާއްޖެއަށް ބޭނުންވާ ކަމަށް ގާސިމް އިބްރާހީމް މީގެ ކުރިންވެސް ވަނީ ވިދާޅުވެފަ އެވެ. ނަމަވެސް ބޭރުގެ އެއްވެސް އަސްކަރިއްޔާ އަކުން ރާއްޖެއަށް އެރުމަކީ އެއްގޮތަކަށްވެސް ތާއީދުކުރައްވާ ކަމެއް ނޫން ކަމަށްވެސް ގާސިމް އިބްރާހީމް ގެންދަވަނީ ތަކުރާރުކޮށް ވިދާޅުވަމުންނެވެ.