މިނިވަން ދުވަހާ ގުޅިގެން އަންނަ އަންގާރަ ދުވަހު އޮންނަ އެކިއެކި ހަރަކާތްތަކާއެކު އެދުވަހުގެ ހަވީރު 6:00 އިން ފެށިގެން ރޭގަނޑު 11:00 އާ ދެމެދު މާލޭގައި ފައިމަގުގައި އުޅޭ ގޮތަށް ސަރުކާރުން ހަމަޖައްސައިފި އެވެ.
ވީނިއުސްއާ ވާހަކަ ދައްކަވަމުން ސަރުކާރުގެ އިސް އޮފިޝަލަކު ވިދާޅުވީ، އަންގާރަ ދުވަހުގެ ހަވީރު 6:00 އިން ރޭގަނޑު 11:00 އަށް ފައިމަގުގައި އުޅޭ ގޮތަށް ހަމަޖައްސާފައިވާ އިރު މާދަމާގެ ވަކި ވަގުތެއްގައި ވެސް ފައިމަގުގައި އުޅޭގޮތަށް ހަމަޖައްސަން މިހާރު ދަނީ މަޝްވަރާ ކުރަމުން ކަމަށެވެ.
މިނިވަން 50 އާއި ގުޅިގެން އަންގާރަ ދުވަހާއި ބުދަ ދުވަހު މާލޭގެ ބޮޑެތި މަގުތަކުގައި ފުޅަނދުބުރު ބޭއްވުމަށް ވަނީ ހަމަޖެހިފައެވެ. އަދި މިނިވަން 50 އާ ގުޅިގެން ބާއްވާ ސްކައި ޑައިވްގެ ހަރަކާތްތައް ބޭއްވުމަށް ހަމަޖެހިފައި ވަނީ އަންނަ ބުދަ ދުވަހު މާފަންނު ސްޓޭޑިއަމްގައެވެ. އެ ހަރަކާތުގައި އައިލޭންޑް އޭވިއޭޝަންގެ މަތިންދާ ބޯޓަކުން ފުންމާލައިގެން 15 ދިވެހިން ސްޓޭޑިއަމަށް ފައިބާނެއެވެ.
ކުޅިވަރާއި ހެވިކަމުގެ ހަރަކާތްތައް މާދަމާރޭ ގަލޮޅު ދަނޑުގައި ބާއްވަން ކުރިން ހަމަޖައްސާފައި އޮތުމަށްފަހު މިހާރު އެ ހަރަކާތްތައް ވަނީ އަންނަ ހުކުރު ދުވަހުގެ ރެއަށް ފަސްކޮށްފައެވެ. ހޯމް މިނިސްޓްރީން ބުނީ އެހަރަކާތްތައް ފަސްކުރީ މޫސުން ގޯސްވެދާނެ ކަމަށް ބަލާފައި ކަމަށެވެ.
މިނިވަން 50އާ ގުޅިގެން ބާއްވާ ކުޅިވަރުތައް ފަސްކުރި ނަމަވެސް މިރޭ ބާއްވާ މިނިވަން ދުވަހުގެ ރަސްމީ ޖަލްސާ ކުރިންވެސް ތާވަލް ކުރެވިފައި އޮތް ގޮތަށް ބޭއްވުމަށް ވަނީ ހަމަޖެހިފަ އެވެ. މިޖަލްސާ އޮންނާނީ އުސްފަސްގަނޑުގަ އެވެ. މިރަސްމިއްޔާތުގައި ސްރީލަންކާގެ ރައީސް މައިތިރިޕާލާ ސިރިސޭނާ ބައިވެރިވެވަޑައިގަތުމަށް ވަނީ ހަމަޖެހިފަ އެވެ.