ލީޑަރެއްގެ އަޒުމް ހުންނަން ޖެހޭނީ ދަގަނޑުން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އުމަރު މިހެން ވިދާޅުވެފައިވަނީ ރާއްޖޭގައި މަރުގެ ހުކުމް ތަންފީޒު ކުރުމާ ގުޅޭގޮތުން އިދިކޮޅު ލީޑަރު ރައީސް ޔާމީން އަބްދުލްގައްޔޫމް ދެއްކެވި ވާހަކަފުޅާ ގުޅިގެންނެވެ.
ޖަލު ބަންދުން މިނިވަންވެވަޑައިގެން ނޫސްވެެރިންނާ ވާހަކަފުޅު ދައްކަވަމުން ޔާމީން ވިދާޅުވީ މަރުގެ އަދަބު ދިނުމަކީ އަބަދުވެސް ގަބޫލުކުރައްވާ އަދި ތާއީދުވެސް ކުރައްވާ ކަމެއް ކަމަށާއި ނަމަވެސް މަރުގެ އަދަބު ތަންފީޒުކުރުމަށް ދިމާވާ ބައިވަރު ހުރަސްތަކެއް އެބަހުރި ކަމަށެވެ.
މަރަށް މަރު ހިފަން ބަލާއިރު ރާއްޖޭގެ ޝަރުއީ ނިޒާމު އޮންނަ ގޮތާމެދު އެމަނިކުފާނު ވަނީ ސުވާލު އުފައްދަވާފައެވެ. އެގޮތުން ރާއްޖޭގައި ތަހުގީގުތައް މިހާރު ކުރެވޭ ގޮތާއި ރާއްޖޭގައި ކުރެވޭ ޖިނާއީ ތަހުގީގުތަކާ ދޭތެރޭ ރައްޔިތުންގެ އެއްވެސް ކަހަލަ އިތުބާރެއް އޮތްކަމާމެދު އެމަނިކުފާނު ސުވާލު އުފެއްދެވިއެވެ.
މަރުގެ ހުކުމް ތަންފީޒު ކުރުމަކީ، އުނދަގޫ އަދި ގޮންޖެހުންތައް ހުރި ކަމެއް ކަމަށް އުމަރުވެސް ގަބޫލު ކުރައްވައެވެ. އެހެންނަމަވެސް އެގޮންޖެހުންތަކާއެކުވެސް ގައުމު ހަމަ މަގަށް އަޅުވަން ޖެހޭ ކަމަށް ވިދާޅުވިއެވެ.
މާތް ރަސްކަލާނގެއަށް ބިރުވެތިވެ، އަދުލުވެރިވާންވާނެ. އޭރުން ހުރިހާ ގޮންޖެހުމެއް ގިރާ ކުރެވޭނީ.
ރައީސް ޔާމީންގެ ވެރިކަމުގައި މަރުގެ ހުކުމް ތަންފީޒު ކުރަން މަސައްކަތްތަކެއް ކުރައްވާފައިވެއެވެ. ރާއްޖޭގައި މަރުގެ ހުކުމް ތަންފީޒު ނުކުރާތާ 60އަށްވުރެ ގިނަ އަހަރު ވެފައިވާއިރު، ވެރިކަން ލިބިވަޑައިގެންފިނަމަ، އެކަން ކުރައްވާނެ ކަމަށް އުމަރު ވަނީ ވިދާޅުވެފައެވެ.