ރައީސް އިބްރާހިމް މުހައްމަދު ސޯލިހު އިއުލާން ކުރެއްވި ގޮތަށް ކިތަންމެ ވަރަކަށް ބޭނުންކުރިޔަސް ކަރަންޓް ބިލް ބޮޑުނުވާނެ ގޮތަށް ފްލެޓް ރޭޓެއް ކަނޑައެޅުމުން ގޭބިސީތަކުގެ މިހާރުގެ ކަރަންޓު ބިލުތަކުން 50-30 ޕަސެންޓް ކުޑަވާނެ ކަމަށް ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފު ވިދާޅުވެއްޖެ އެވެ.
މިދިޔަ ބުރާސްފަތި ދުވަހުގެ ރޭ މާވެޔޮ މަގުގައި ހުންނަ އެމްޑީޕީގެ ‘ހުވަދޫ ޖަގަހަ’ ގައި ބޭއްވި ޖަލްސާގައި ވާހަކަ ދައްކަވަމުން އެމްޑީޕީގެ ރިޔާސީ ކެންޑިޑޭޓް އަދި ރައީސް ސޯލިހު ވަނީ ކަރަންޓް ބިލު އަގުހެޔޮ ކުރުމުގެ ގޮތުން އާންމުން ދިރިއުޅޭ ހުރިހާ ގެއަކުން ކަރަންޓް ބިލު ހިސާބު ކުރުމުގައި ގެންގުޅޭ ބޭންޑްތައް އުވާލައި އެއް ރޭޓަކުން ބިލުކުރުމަށް ނިންމާފައިވާ ކަމަށް ވިދާޅުވެފަ އެވެ.
އެކަމުގެ ތަފުސީލެއް ރައީސް ސޯލިހު އެރޭ ނުދެއްވަ އެވެ.
ރާއްޖެޓީވީގެ “ފަލަ ސުރުހީ” ޕްރޮގްރާމުގައި އެ ތަފުސީލުތައް ދެއްވަމުން ޝަރީފު ވިދާޅުވީ، ކަރަންޓު ފްލެޓް ރޭޓް ކަނޑައެޅުމަކީ ވަރަށް ހިތްވަރުގަދަ، މުހިންމު އަދި ރައްޔިތުންނާ ދޭތެރޭގައި އޯގާތެރިކަމާއެކު ވިސްނަވާ ބޭފުޅަކަށް ނޫނީ ކަނޑަނޭޅޭނެ ސިޔާސަތެއް ކަމަށެވެ.
“ފްލެޓް ރޭޓެއް ކަނޑައެޅުމުން 1،000 ޔުނިޓް ބޭނުންކުރިޔަސް، 500 ޔުނިޓް ބޭނުންކުރިޔަސް އަދި ކަނޑައަޅާފައި އިންނަ ހަތް ބޭންޑު ދާނީ އެއް ބޭންޑަކަށް ކަނޑައެޅިގެން. އޭގެ ފަހުން 500 ޔުނިޓް ބޭނުންކުރާ މީހުންނަށްވެސް 1،100 ޔުނިޓް ބޭނުންކުރާ މީހުންނަށްވެސް އަދި އޭގެ މަތިން ބޭނުންކުރާ މީހުން ކަމުގައިވިޔަސް މީހުން ދިރިއުޅުމަށް ބޭނުންކުރާ މީޓަރެއް ކަމަށްވާނަމަ ފްލެޓް ރޭޓަކުން އަގު ކަނޑައެޅިގެންދާނީ،” ޝަރީފު ވިދާޅުވި އެވެ.
ގޭބިސީތަކުގައި ކަރަންޓު ބޭނުންކުރާ މިންވަރު ގިންތިކޮށް، މިހާރު ކަރަންޓު ބިލު ހަދަނީ ހަތް ބޭންޑަކަށެވެ. އެއީ:
 
ޝަރީފު ވިދާޅުވީ، ސްޓެލްކޯއިން މާލެ ސަރަހައްދުގެ އިތުރުން އއ. އަތޮޅާއި އދ. އަތޮޅާއި ކ. އަތޮޅުގެ އިތުރުން ވ. އަތޮޅުގައި ކަރަންޓުގެ ހިދުމަތް ދޭ އިރު، އެ ކުންފުނީގެ ކަރަންޓު ބޭނުންކުރާ މީހުންގެ އަދަދަކީ 77،275 ކަމަށެވެ. އޭގެ ތެރެއިން ގޭބިސީތަކުގެ އަދަދަކީ 60،509 އެވެ. އެއީ މާލެ ސަރަހައްދުން 53413 ގޭބިސީއާއި އަތޮޅުތެރޭގައި 7096 ގޭބިސީ އެވެ.
ޝަރީފު ވިދާޅުވީ، މާލޭގެ ގޭބިސީތަކުގެ ތެރެއިން 28 ޕަސެންޓަކީ 600 ޔުނިޓަށްވުރެ އިތުރަށް ކަރަންޓު ބޭނުންކުރާ ގެތައް ކަމަށެވެ. އެ މީހުންނަށް ބިލު ކުރާނީ 4.25 ރުފިޔާގެ ރޭޓުން ކަމަށެވެ.
“ފްލެޓް ރޭޓެއް ކަނޑައެޅި އިރުގައި، މިސާލަކަށް އެއީ އެންމެ ފުރަތަމަ ބޭންޑުގައި ހިމެނޭ ރޭޓަށް ކަމަށް ކަނޑައެޅިއްޖެ ކަމަށްވާ ނަމަ، އެއީ ދޮޅު ރުފިޔާގެ ރޭޓު އެއީ ފްލެޓް ރޭޓުގެ ގޮތުގައި ކަނޑައެޅިއްޖެ ނަމަ، އެއީ ގާތްގަނޑަކަށް 31 ޕަސެންޓާއި 52 ޕަސެންޓާ ދޭތެރޭގެ އަދަދަކަށް ބިލް ކުޑަކުރެވިގެންދާނެ ކަމަށް އަންދާޒާތަކުން ދައްކާ،” ޝަރީފު ވިދާޅުވި އެވެ.
އޭނާ ވިދާޅުވީ، ޓެރިފް ރޭޓު ކަނޑައެޅޭނެ މިންވަރަކީ ކޮބައިތޯ މަޝްވަރާ ކުރަމުން އަންނަ ކަމަށާއި އެއާއެކު އެކަން ތަންފީޒު ކުރަން ފެށުމުން ސްޓެލްކޯގެ އާމްދަނީ ކުޑަވާނެ މިންވަރުގެ ދިރާސާއެއް ކުރަމުން އަންނަ ކަމަށެވެ.
ޓެރިފް ރޭޓުގައި ބިލުތައް ފޮނުވަން ފެށޭނެ ސީދާ ތާރީހެއް ދަންނަވަން ނޭންގުނު ނަމަވެސް އަމާޒަކީ 2024ގެ ޖެނުއަރީ މަހުން ފެށިގެން އެ އަދަދު ކަނޑައަޅައި ބިލު ކުރަން ފެށުން ކަމަށް ވިދާޅުވި އެވެ.