އައިޖީއެމްއެޗްގައި ގާއިމްކުރާ 75 އެނދުގެ ވޯޑު އަންނަ މެއި މަހުގެ ތެރޭގައި ހުޅުވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައްޔިތުންނާ އެކު" ސިލްސިލާ ޕޮޑްކާސްޓްގެ 2 ވަނަ އެޕިސޯޑްގައި ވާހަކަފުޅު ދައްކަވަމުން ރައީސް ވިދާޅުވީ ސިއްހީގޮތުން ރަނގަޅު ހިދުމަތްތަކެއް ދިނުމަށް އިސްކަންދެއްވާ ކަމުގައެވެ.
އައިޖީއެމްއެޗްގެ ފެންވަރު ދަށްކަން ފާހަގަކުރައްވާ ރައީސް ވިދާޅުވީ އައިޖީއެމްއެޗްގެ ފެންވަރު ރަނގަޅުކުރުމަށް މަސައްކަތްތަކެއްކޮށްފައިވާ ކަމަށެވެ. އެގޮތުން ބަލާއިރު ދެން އެންމެ އަވަހަށް ހުޅުވިގެންދާނީ ނިމިފައިވާ 75 އެނދުގެ ޕްރޮޖެކްޓް ކަމަށް ރައީސް ވިދާޅުވިއެވެ.
އެ ވޯޑް ހުޅުވުމާއެކު ވަރަށް ބޮޑުތަނުން ޖާގަ އިތުރުވެގެންދާނެ ކަމަށާއި މިހާރު އައިޖީއެމްއެޗަށް ދިމާވެފައިވާ ޖާގައިގެ ދަތިކަން ވަރަށް ބޮޑުތަނުން ހައްލުވެގެންދާނެ ކަމަށް ރައީސް ވިދާޅުވިއެވެ. އަދި މި ވޯޑު މޭ މަހުގެ ތެރޭގައި ހުޅުވިގެންދާނެ ކަމަށް ރައީސް ވަނީ ވިދާޅުވެފައެވެ.
ރައީސް ވިދާޅުވީ މި ވޯޑުގައި ޖެނެރަލް 44 އެނދު، ހައި ޑިޕެންޑެންސީގެ 15 އެނދު އަދި ޕްރައިވެޓް 14 ޔުނިޓް ހުންނާނެ ކަމަށެވެ.
މީގެއިތުރުން ކުޑަކުދިންނަށް ހާއްސަ އީއާރެއް ގާއިމްކޮށްފައިވާކަން ރައީސް ފާހަގަކުރެއްވިއެވެ. އަދި މިކަމުގެ ސަބަބުން އެންމެ މައިގަނޑުކޮށް ހުންނަ އީއާރަށް ލުއިތަކެއް ލިބޭކަން ރައީސް ފާހަގަކުރެއްވިއެވެ. ނޮވެމްބަރު މަހުގައި 16 އަހަރުން ދަށުގެ ކުދިންނަށް ހާއްސަ އިމަޖެންސީ ހިދުމަތް ދޭން ފެށިފަހުން މިހާތަނަށް 10،393 ކުދިން އެތަނުން ހިދުމަތް ހޯދާފައިވާ ކަމަށް ރައީސް ވިދާޅުވިއެވެ.